മുഹമ്മദ് അമീന് റിയാദ്: ഗാസ മുനമ്പിന്റെ വടക്കന് ഭാഗത്തേക്ക് ഒരു കിലോമീറ്ററോളം കാലാള്പ്പടയും ടാങ്കുകളും കടന്നുകയറിയതായി ഇസ്രയേല് സേന പറഞ്...
മുഹമ്മദ് അമീന്
റിയാദ്: ഗാസ മുനമ്പിന്റെ വടക്കന് ഭാഗത്തേക്ക് ഒരു കിലോമീറ്ററോളം കാലാള്പ്പടയും ടാങ്കുകളും കടന്നുകയറിയതായി ഇസ്രയേല് സേന പറഞ്ഞു. ഒറ്റരാത്രികൊണ്ട് ഗാസയിലേക്ക് പരിമിതമായ ഒരു മുന്നേറ്റം നടത്തിയെന്നാണ് സേന വെളിപ്പെടുത്തിയിരിക്കുന്നത്.
യുദ്ധം പൊട്ടിപ്പുറപ്പെട്ടതിനുശേഷം ഗാസയില് 'ടാര്ഗെറ്റഡ് റെയ്ഡ്' നടത്തിയെന്നാണ് സേന പറയുന്നത്.
ഹമാസ് ഭീകര ഗ്രൂപ്പിനെ ഇല്ലാതാക്കാന് പൂര്ണ്ണ തോതിലുള്ള അധിനിവേശത്തിന് തയ്യാറെടുക്കുകയാണ് സേന.
ഗിവാറ്റി ഇന്ഫന്ട്രി ബ്രിഗേഡിന്റെയും നൂറ്റിഅറുപത്തിരണ്ടാം കവചിത വിഭാഗത്തിന്റെയും നേതൃത്വത്തില് നടത്തിയ റെയ്ഡ് - 'യുദ്ധത്തിന്റെ അടുത്ത ഘട്ടങ്ങള്'ക്കായി അതിര്ത്തി പ്രദേശം തയ്യാറാക്കുന്നതിന്റെ ഭാഗമായിരുന്നുവെന്നാണ് ലഭിക്കുന്ന വിവരം.
ഇന്നലത്തെ മുന്നേറ്റത്തില് നിരവധി ഭീകരരെ വധിച്ചുവെന്നു സേന അവകാശപ്പെടുന്നു. ഹമാസിന്റെ അടിസ്ഥാന സൗകര്യങ്ങള്, ആന്റി-ടാങ്ക് ഗൈഡഡ് മിസൈല് വിക്ഷേപണ സ്ഥാനങ്ങള് എന്നിവ തകര്ത്തു.
റെയ്ഡിന് ശേഷം സൈനികര് ഇസ്രായേലി പ്രദേശത്തേക്ക് മടങ്ങിയെന്ന് ഐഡിഎഫ് കൂട്ടിച്ചേര്ത്തു. ഓപ്പറേഷന് ഏതാനും മണിക്കൂറുകള് നീണ്ടുനിന്നതായും സൈനികര്ക്ക് പരിക്കേറ്റിട്ടില്ലെന്നും ഐഡിഎഫ് വക്താവ് റിയര് അഡ്മിറല് ഡാനിയല് ഹഗാരി പറഞ്ഞു.
ഒക്ടോബര് 7-ലെ ആക്രമണത്തില് കാണാതായ ഇസ്രായേലികളുടെ മൃതദേഹങ്ങള് തിരയുന്നതിനും ഹമാസ് ഭീകരര് ഉപേക്ഷിച്ച സ്ഫോടകവസ്തുക്കള് നീക്കം ചെയ്യുന്നതിനുമായി അതിര്ത്തിക്കടുത്തുള്ള പ്രദേശങ്ങളില് സൈനികര് നടത്തുന്ന ദൈനംദിന ''പ്രാദേശിക റെയ്ഡുകള്''ക്കുപരിയായിരുന്നു ഈ മുന്നേറ്റം.
ഗാസയിലെ സിവിലിയന്മാര്ക്കു ദോഷം കുറയ്ക്കുന്നതിനൊപ്പം ഹമാസിനെ ഉന്മൂലനം ചെയ്യുമെന്നും ഇസ്രായേല് ആവര്ത്തിക്കുന്നു. ഹമാസിന്റെ നേതൃത്വത്തില് മറ്റ് തീവ്രവാദ ഗ്രൂപ്പുകളും സംഘടിച്ച് നടത്തിയ ആക്രമണത്തില് 2,500 ഓളം ഭീകരര് അതിര്ത്തി കടന്ന് ഗാസ മുനമ്പില് നിന്ന് കര, വായു, കടല് മാര്ഗങ്ങളില് ഇസ്രായേലിലേക്ക് മിന്നലാക്രണം നടത്തുകയും 1,400 ഓളം പേരെ കൊല്ലുകയും 228 പേരെ പിടികൂടി ബന്ദികളാക്കുകയും ചെയ്തു. ആയിരക്കണക്കിന് റോക്കറ്റുകളാണ് ഇസ്രായേലി പട്ടണങ്ങളിലേക്കു തൊടുത്തത്.
അടിസ്ഥാന സൗകര്യങ്ങള്, കമാന്ഡ് സെന്ററുകള്, തുരങ്കങ്ങള്, റോക്കറ്റ് ലോഞ്ചറുകള് എന്നിവയുള്പ്പെടെ ഹമാസിന്റെ 250-ലധികം സൈറ്റുകളില് ഇസ്രായേല് കഴിഞ്ഞ ദിവസം വ്യോമാക്രമണം നടത്തിയതായി സൈന്യം അറിയിച്ചു. ഖാന് യൂനിസിലെ ഒരു പള്ളിക്കും കിന്റര്ഗാര്ട്ടനോടും ചേര്ന്ന് സ്ഥിതി ചെയ്യുന്ന ഹമാസ് മിസൈല് വിക്ഷേപണ സ്ഥാനം ഇസ്രയേലി നാവികസേന ആക്രമിച്ചതായും സൈന്യം അറിയിച്ചു.
ഇതുവരെ ഹമാസിന്റെയും മറ്റ് ഭീകര ഗ്രൂപ്പുകളുടെയും പതിനായിരത്തിലധികം സൈറ്റുകള് ആക്രമിച്ചതായി ഇസ്രായേല് വ്യോമസേനാ വൃത്തങ്ങള് അറിയിച്ചു.
ആക്രമണത്തില് 6,546 പേര് കൊല്ലപ്പെട്ടതായി ഗാസയിലെ ഹമാസ് നടത്തുന്ന ആരോഗ്യ മന്ത്രാലയം പറയുന്നു. ഇസ്രായേല് കരയില് ആക്രമണം അഴിച്ചുവിട്ട് നഗരങ്ങളിലേക്ക് പ്രവേശിക്കാന് തുടങ്ങിയാല് ഇരുവശത്തുമുള്ള മരണസംഖ്യ ഗണ്യമായി ഉയരാം. ഗാസയില് ഹമാസ് ഒരുക്കിയിട്ടുള്ള തുരങ്കങ്ങളുടെ ശൃംഖലയാണ് ഇസ്രയേലി സേനയ്ക്ക് ഏറ്റവും വലിയ വെല്ലുവിളി. ഇവിടെനിന്ന് എപ്പോള് വേണമെങ്കിലും മിന്നലാക്രമണമുണ്ടാകാം.
ഗാസ മുനമ്പിന് സമീപമുള്ള ഇസ്രയേലി പ്രദേശങ്ങളിലേക്ക് ഹമാസം റോക്കറ്റ് ആക്രമണം കടുപ്പിച്ചിട്ടുണ്ട്. ഇവിടെ ഭൂരിഭാഗവും ഇസ്രായേലി സിവിലിയന്മാരെ ഒഴിപ്പിച്ചുവെന്ന് ഐഡിഎഫ് ചീഫ് ഒഫ് സ്റ്റാഫ് ലഫ്റ്റനന്റ് ജനറല് ഹെര്സി ഹലേവി പറഞ്ഞു.
മേഖലയില് തങ്ങളുടെ സൈനികരെ സംരക്ഷിക്കാന് കൂടുതല് വ്യോമ പ്രതിരോധ സംവിധാനങ്ങള് വിന്യസിക്കാന് വാഷിംഗ്ടണിന് കൂടുതല് സമയം നല്കുന്നതിനായി ഗാസയിലെ കരയുദ്ധം താല്ക്കാലികമായി വൈകിപ്പിക്കാനുള്ള അമേരിക്കയുടെ അഭ്യര്ത്ഥന ഇസ്രായേല് അംഗീകരിച്ചതായി ബുധനാഴ്ച ന്യൂയോര്ക്ക് ടൈംസ് റിപ്പോര്ട്ട് ചെയ്തു.
ഹമാസ് പിടികൂടിയിട്ടുള്ള നൂറുകണക്കിന് ഇസ്രായേലികളെയും വിദേശികളെയും മോചിപ്പിക്കുന്നതിന് അന്താരാഷ്ട്രതലത്തില് വിപുലമായ ചര്ച്ചകള്ക്കു സമയം അനുവദിക്കുന്നതിനു കൂടിയാണ് കരയുദ്ധം നീട്ടുന്നത്.
എന്നാല്, കരയുദ്ധം ആസന്നമായിരിക്കുകയാണെന്ന് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു ബുധനാഴ്ച പറഞ്ഞിരുന്നു. ഹമാസിനെ തകര്ക്കുക, ബന്ദികളാക്കിയവരെ മോചിപ്പിക്കുക എന്നിവയാണ് ആക്രമണത്തിന്റെ ലക്ഷ്യമെന്ന് പ്രധാനമന്ത്രി പറഞ്ഞു.
''ആക്രമണം എപ്പോള്, എങ്ങനെയെന്ന് ഞാന് വ്യക്തമാക്കുന്നില്ല. പരിഗണനാ വിഷയങ്ങള് മിക്കതും പൊതുജനങ്ങള്ക്ക് അറിയില്ല. അത് അങ്ങനെയാണ് ആയിരിക്കേണ്ടത്. സൈനികരുടെ ജീവന് സംരക്ഷിക്കുന്നതിനുള്ള മാര്ഗമാണിത്, ''ഗ്രൗണ്ട് ഓപ്പറേഷന്റെ സമയത്തെക്കുറിച്ച് ഏകകണ്ഠമായ തീരുമാനമുണ്ടെന്ന് നെതന്യാഹു പറഞ്ഞു.
COMMENTS