മുഖ്യമന്ത്രിയാകാൻ ഒന്നാം സ്ഥാനം കെ.സി. വേണുഗോപാലിന്; പിന്തുണയുമായി ടി. പത്മനാഭൻ

കണ്ണൂർ: കോൺഗ്രസിലെ മുഖ്യമന്ത്രി ചർച്ചകൾക്കിടെ എ.ഐ.സി.സി ജനറൽ സെക്രട്ടറി കെ.സി. വേണുഗോപാലിന് പരസ്യ പിന്തുണയുമായി പ്രമുഖ സാഹിത്യകാരൻ ടി. പത്മന...

കണ്ണൂർ: കോൺഗ്രസിലെ മുഖ്യമന്ത്രി ചർച്ചകൾക്കിടെ എ.ഐ.സി.സി ജനറൽ സെക്രട്ടറി കെ.സി. വേണുഗോപാലിന് പരസ്യ പിന്തുണയുമായി പ്രമുഖ സാഹിത്യകാരൻ ടി. പത്മനാഭൻ രംഗത്ത്. മുഖ്യമന്ത്രി സ്ഥാനത്തേക്ക് പരിഗണിക്കപ്പെടുന്നവരിൽ താൻ ഒന്നാം സ്ഥാനം നൽകുന്നത് വേണുഗോപാലിനാണെന്ന് അദ്ദേഹം കണ്ണൂരിൽ മാധ്യമങ്ങളോട് പറഞ്ഞു.

താൻ ഇന്ത്യയിലെ തന്നെ പഴക്കം ചെന്ന കോൺഗ്രസുകാരനാണെന്നും എല്ലാ നേതാക്കളുമായും തനിക്ക് വ്യക്തിപരമായ അടുപ്പമുണ്ടെന്നും അദ്ദേഹം വ്യക്തമാക്കി. രമേശ് ചെന്നിത്തലയുമായും കെ.സി. വേണുഗോപാലുമായും തനിക്ക് അടുത്ത ബന്ധമുണ്ട്. എന്നാൽ പ്രതിപക്ഷ നേതാവ് വി.ഡി. സതീശനുമായി അത്ര അടുത്ത സ്നേഹബന്ധമില്ലെന്ന് പത്മനാഭൻ തുറന്നുപറഞ്ഞു.

വേണുഗോപാൽ പാവപ്പെട്ടവരോട് ഏറെ കരുണയുള്ള വ്യക്തിയാണെന്നും, ഒരു പൊതുപ്രവർത്തകന് വേണ്ട ഏറ്റവും വലിയ ഗുണം അതാണെന്നും അദ്ദേഹം അഭിപ്രായപ്പെട്ടു. രാഹുൽ ഗാന്ധിയെ പിന്നിൽ നിന്ന് നയിക്കുന്നതും അദ്ദേഹത്തിന്റെ മനസാക്ഷി സൂക്ഷിപ്പുകാരനായി പ്രവർത്തിക്കുന്നതും കെ.സി. വേണുഗോപാലാണെന്ന് അദ്ദേഹം കൂട്ടിച്ചേർത്തു.

വേണുഗോപാൽ മുഖ്യമന്ത്രിയായാൽ വരുന്ന ഉപതിരഞ്ഞെടുപ്പ് ബാധ്യതയെക്കുറിച്ചുള്ള ചോദ്യങ്ങളെ അദ്ദേഹം തള്ളി. സംസ്ഥാനത്തിന്റെ മൊത്തം ചെലവ് നോക്കുമ്പോൾ ഉപതിരഞ്ഞെടുപ്പിന് വരുന്ന തുക വളരെ നിസ്സാരമാണെന്ന് അദ്ദേഹം നിരീക്ഷിച്ചു. ഫ്ലക്സ് വെച്ചതുകൊണ്ടോ സൈബർ ആക്രമണം നടത്തിയത് കൊണ്ടോ ഒരാളുടെ വ്യക്തിത്വം അളക്കാൻ കഴിയില്ലെന്നും, കഴിവ് തെളിയിച്ചിട്ടുള്ള കെ.സി. വേണുഗോപാൽ മുഖ്യമന്ത്രിയാകുന്നത് കേരളത്തിന് ഗുണകരമാകുമെന്നും ടി. പത്മനാഭൻ പ്രത്യാശ പ്രകടിപ്പിച്ചു.

Key Words : KC Venugopal, Chief Minister Post, T. Padmanabhan