തിരഞ്ഞെടുപ്പ് പെരുമാറ്റച്ചട്ടം ലംഘനം: കാലിക്കറ്റ് സർവകലാശാല താൽക്കാലിക ജീവനക്കാരന് സസ്പെൻഷൻ

തേഞ്ഞിപ്പലം: തിരഞ്ഞെടുപ്പ് പെരുമാറ്റച്ചട്ടം ലംഘിച്ചതിനെത്തുടർന്ന് കാലിക്കറ്റ് സർവകലാശാലയിലെ പബ്ലിക് റിലേഷൻസ് വിഭാഗം താൽക്കാലിക വിഡിയോഗ്രഫർ റ...

തേഞ്ഞിപ്പലം: തിരഞ്ഞെടുപ്പ് പെരുമാറ്റച്ചട്ടം ലംഘിച്ചതിനെത്തുടർന്ന് കാലിക്കറ്റ് സർവകലാശാലയിലെ പബ്ലിക് റിലേഷൻസ് വിഭാഗം താൽക്കാലിക വിഡിയോഗ്രഫർ റിസ്വാൻ അമീറിനെ സർവീസിൽ നിന്ന് സസ്പെൻഡ് ചെയ്തു. വോട്ടെടുപ്പ് ദിവസം വോട്ട് രേഖപ്പെടുത്തിയ ശേഷം ബാലറ്റ് പേപ്പറിന്റെ ചിത്രം പകർത്തി സമൂഹമാധ്യമങ്ങളിലൂടെ പ്രചരിപ്പിച്ചു എന്നതാണ് ഇയാൾക്കെതിരെയുള്ള കുറ്റം.

വോട്ടിന്റെ രഹസ്യസ്വഭാവം ലംഘിക്കുന്ന തരത്തിൽ ബാലറ്റ് പേപ്പർ മൊബൈൽ ഫോണിൽ പകർത്തിയത് ഗുരുതരമായ ചട്ടലംഘനമാണെന്ന് അധികൃതർ ചൂണ്ടിക്കാട്ടി. സംഭവത്തിൽ ജില്ലാ കളക്ടറുടെ റിപ്പോർട്ടിന്റെയും നിർദ്ദേശത്തിന്റെയും അടിസ്ഥാനത്തിലാണ് സർവകലാശാല രജിസ്ട്രാർ സസ്പെൻഷൻ ഉത്തരവ് പുറപ്പെടുവിച്ചത്.

തിരഞ്ഞെടുപ്പ് ഡ്യൂട്ടിയിലുള്ള ജീവനക്കാർ വോട്ടിന്റെ രഹസ്യാത്മകത കാത്തുസൂക്ഷിക്കണമെന്ന കർശന നിർദ്ദേശം നിലനിൽക്കെയാണ് ഇത്തരമൊരു ലംഘനം നടന്നത്. വിഷയത്തിൽ റിസ്വാനെതിരെ കൂടുതൽ നിയമനടപടികൾ ഉണ്ടായേക്കുമെന്നാണ് സൂചന.

Key Words : Election Conduct Violation, Calicut University, Temporary Employee, Suspended