വാഷിംഗ്ടൺ: ഇറാനെതിരെ അതിശക്തമായ ഭീഷണിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഹോർമുസ് കടലിടുക്ക് തുറക്കാനോ സമാധാന കരാറിൽ ഒപ്പിടാനോ നൽകിയ ...
വാഷിംഗ്ടൺ: ഇറാനെതിരെ അതിശക്തമായ ഭീഷണിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഹോർമുസ് കടലിടുക്ക് തുറക്കാനോ സമാധാന കരാറിൽ ഒപ്പിടാനോ നൽകിയ 10 ദിവസത്തെ സമയപരിധി അവസാനിക്കാൻ ഇനി വെറും 48 മണിക്കൂർ മാത്രമാണ് ബാക്കിയുള്ളതെന്ന് ട്രംപ് മുന്നറിയിപ്പ് നൽകി. നിശ്ചിത സമയത്തിനുള്ളിൽ തീരുമാനമായില്ലെങ്കിൽ ഇറാന് മേൽ "നരകയാതനകൾ" (All Hell) വർഷിക്കപ്പെടുമെന്നാണ് തന്റെ സമൂഹമാധ്യമമായ ട്രൂത്ത് സോഷ്യലിലൂടെ ട്രംപ് ഭീഷണി മുഴക്കിയത്.
മാർച്ച് 26-നാണ് ട്രംപ് ഇറാന് 10 ദിവസത്തെ കാലാവധി അനുവദിച്ചത്. ഇറാൻ ഗവൺമെന്റിന്റെ അഭ്യർത്ഥന പ്രകാരമാണ് താൻ സൈനിക നടപടികൾ താൽക്കാലികമായി നിർത്തിവെച്ചതെന്ന് അന്ന് ട്രംപ് അവകാശപ്പെട്ടിരുന്നു. ഈ കാലാവധി ഏപ്രിൽ 6 തിങ്കളാഴ്ച രാത്രിയോടെ അവസാനിക്കും.
"ഇറാന് ഒരു കരാറിൽ ഒപ്പിടാനോ ഹോർമുസ് കടലിടുക്ക് തുറക്കാനോ ഞാൻ പത്ത് ദിവസം സമയം നൽകിയത് ഓർക്കുക. സമയം തീരാറായി, 48 മണിക്കൂറിനുള്ളിൽ എല്ലാവിധ നരകയാതനകളും അവർക്ക് മേൽ വർഷിക്കപ്പെടും. ദൈവത്തിന് സ്തുതി" - ട്രംപ് കുറിച്ചു.
ലോകത്തിലെ ഏറ്റവും പ്രധാനപ്പെട്ട എണ്ണക്കടത്ത് പാതകളിലൊന്നായ ഹോർമുസ് കടലിടുക്ക് ഇറാൻ ഭാഗികമായി തടഞ്ഞതാണ് നിലവിലെ പ്രതിസന്ധിക്ക് പ്രധാന കാരണം. ഇത് തുറന്നുകൊടുത്തില്ലെങ്കിൽ ഇറാന്റെ ഊർജ്ജ നിലയങ്ങളും (Power Plants) മറ്റ് പ്രധാന അടിസ്ഥാന സൗകര്യങ്ങളും തകർക്കുമെന്നാണ് ട്രംപിന്റെ ഭീഷണി.
ട്രംപിന്റെ അന്ത്യശാസനം വെറും വിഡ്ഢിത്തമാണെന്നും ഭയത്തിൽ നിന്നുള്ള പ്രതികരണമാണെന്നും ഇറാൻ സൈനിക വക്താക്കൾ തിരിച്ചടിച്ചു. അമേരിക്കയോ ഇസ്രായേലോ ആക്രമണത്തിന് മുതിർന്നാൽ കനത്ത പ്രത്യാഘാതങ്ങൾ നേരിടേണ്ടി വരുമെന്ന് ജനറൽ അലി അബ്ദുള്ളാഹി അലിയാബാദി മുന്നറിയിപ്പ് നൽകി.
ഫെബ്രുവരി 28-ന് ആരംഭിച്ച യുഎസ്-ഇറാൻ സംഘർഷം ഈ പുതിയ നീക്കത്തോടെ അതീവ ഗുരുതരമായ ഘട്ടത്തിലേക്ക് കടന്നിരിക്കുകയാണ്. പശ്ചിമേഷ്യയിലെ യുദ്ധസമാനമായ സാഹചര്യം ആഗോള എണ്ണവിപണിയെയും സാമ്പത്തിക രംഗത്തെയും ആശങ്കയിലാഴ്ത്തിയിട്ടുണ്ട്.
Key Words: Iran War, Donald Trump
COMMENTS