Venezuelan President Nicolás Maduro has now arrived at Brooklyn's Metropolitan Detention Center (MDC).
എം രാഖി
ന്യൂയോര്ക് : അമേരിക്ക കിടപ്പുമുറിയില് നിന്നു പിടികൂടിക്കൊണ്ടുപോയെ വെനസ്വേലന് പ്രസിഡന്റ് നിക്കോളാസ് മഡുറോയേയും ഭാര്യയേയും ബ്രൂക് ലിനിലെ മെട്രോപൊളിറ്റന് ഡിറ്റന്ഷന് സെന്ററില് എത്തിച്ചു. കൈവിലങ്ങിട്ടാണ് അദ്ദേഹത്തെ വിമാനത്തില് നിന്നു പുറത്തേയ്ക്കു കൊണ്ടുവന്നത്. ഗിസ്ലെയ്ന് മാക്സ്വെല്, പി. ഡിഡി എന്നിവരുള്പ്പെടെയുള്ള തടവുകാരെ ഇവിടെയാണ് പാര്പ്പിക്കുന്നത്.
ശനിയാഴ്ച പുലര്ച്ചെ അമേരിക്കയിലെ ഒരു സൈനിക താവളത്തില് എത്തിയ അദ്ദേഹത്തെ പിന്നീട് ന്യൂയോര്ക്കിലെ യുഎസ് ഡ്രഗ് എന്ഫോഴ്സ്മെന്റ് അഡ്മിനിസ്ട്രേഷന് ഓഫീസിലേക്ക് എത്തിച്ചു. മയക്കുമരുന്ന്, ആയുധക്കടത്ത് കുറ്റങ്ങള് ചുമത്തിയ ശേഷമാണ് അദ്ദേഹത്തെ ബ്രൂക് ലിനിലെ ജയിലിലേക്ക് മാറ്റിയത്. താന് ഒരു മയക്കുമരുന്ന് മാഫിയയുടെ തലവനാണെന്ന ആരോപണം മഡുറോ നേരത്തെ നിഷേധിച്ചിരുന്നു.
മഡുറോയെയും ഭാര്യയെയും ന്യൂയോര്ക്കിലെ കോടതിയില് ഹാജരാക്കും. ഇതിനുള്ള തീയതി നിശ്ചയിച്ചിട്ടില്ല. അടുത്ത ആഴ്ച മാന്ഹട്ടന് ഫെഡറല് കോടതിയില് വിചാരണ നേരിടുന്നതുവരെ അദ്ദേഹം ബ്രൂക് ലിനിലെ കേന്ദ്രത്തില് തുടരുമെന്നാണ് വിവരം. മഡുറോയുടെ ഭാര്യയുടെ തടവ് സംബന്ധിച്ച കാര്യങ്ങളില് വ്യക്തതയില്ല.
ബ്രൂക് ലിന് മെട്രോപൊളിറ്റന് ഡിറ്റെന്ഷന് സെന്റര് ന്യൂയോര്ക്ക് സിറ്റിയിലെ ഏക ഫെഡറല് ജയിലാണ്. റാപ്പര് ആര്. കെല്ലി, ജെഫ്രി എപ്സ്റ്റൈന്റെ സഹായി ഗിസ്ലെയ്ന് മാക്സ്വെല്, 'ഡിഡി' കോംബ്സ് എന്നിവരുള്പ്പെടെയുള്ള ഹൈ-പ്രൊഫൈല് കേസുകള് കൈകാര്യം ചെയ്യുന്നത് ഇവിടെയാണ്. ഇതൊരു കുപ്രസിദ്ധ തടങ്കല് പാളയവുമാണ്. കഠിനമായ സാഹചര്യങ്ങള്ക്കും അക്രമങ്ങള്ക്കും അപര്യാപ്തമായ മേല്നോട്ടത്തിനും ഈ ജയില് കുപ്രസിദ്ധമാണ്. ഒരു പ്രതിക്ക് കുത്തേറ്റപ്പോള് വൈദ്യസഹായം നല്കുന്നതിന് പകരം 25 ദിവസം സെല്ലില് അടച്ചു എന്നതടക്കമുള്ള ഗുരുതരമായ ആരോപണങ്ങള് ഇവിടെ നിലനില്ക്കുന്നുണ്ട്.
ബ്രൂക് ലിനിലെ മെട്രോപൊളിറ്റന് ഡിറ്റന്ഷന് സെന്ററിന് പുറത്ത് ഒരു വെനസ്വേലന് അനുകൂലി
അതീവ സുരക്ഷാ സംവിധാനമുള്ള ഇവിടെയാണ് രാജ്യദ്രോഹികളും വലിയ ക്രിമിനലുകളും പാര്പ്പിക്കപ്പെടുന്നത്. ആവശ്യത്തിന് വെളിച്ചമോ ചൂടോ ലഭിക്കാത്ത മുറികള്, ശുചിത്വമില്ലായ്മ, ഉദ്യോഗസ്ഥരുടെ ഭാഗത്തുനിന്നുള്ള ക്രൂരത എന്നിവയെക്കുറിച്ച് മുന്പ് പരാതികള് ഉയര്ന്നിട്ടുണ്ട്. മഡുറോയെപ്പോലൊരു വിദേശ നേതാവിനെ ഇവിടെ പാര്പ്പിക്കുന്നത് അമേരിക്ക ലോകത്തിനു നല്കുന്ന സന്ദേശമാണ്.
കാരക്കാസില്, മഡുറോയുടെ അഭാവത്തില് വൈസ് പ്രസിഡന്റായിരുന്ന ഡെല്സി റോഡ്രിഗസ് ഇടക്കാല പ്രസിഡന്റായി ചുമതലയേല്ക്കണമെന്ന് വെനസ്വേലന് സുപ്രീം കോടതി വിധിച്ചു. ഭരണപരമായ തുടര്ച്ച ഉറപ്പാക്കാനും രാജ്യത്തിന്റെ പ്രതിരോധത്തിനുമാണ് ഈ നടപടിയെന്ന് കോടതി വ്യക്തമാക്കി.
വെനസ്വേലയില് അമേരിക്ക നടത്തിയ സൈനിക നീക്കത്തില് യുഎന് സെക്രട്ടറി ജനറല് അന്റോണിയോ ഗുട്ടെറസ് 'അങ്ങേയറ്റം ആശങ്ക' രേഖപ്പെടുത്തി. ഇത് മേഖലയില് ഗുരുതരമായ പ്രത്യാഘാതങ്ങള് ഉണ്ടാക്കുമെന്നും അന്താരാഷ്ട്ര നിയമങ്ങളുടെ ലംഘനമാണെന്നും അദ്ദേഹം പറഞ്ഞു. ഐക്യരാഷ്ട്രസഭയുടെ ചാര്ട്ടര് ഉള്പ്പെടെയുള്ള നിയമങ്ങള് എല്ലാവരും ബഹുമാനിക്കണമെന്നും അദ്ദേഹം ആഹ്വാനം ചെയ്തു.
ഈ സാഹചര്യത്തില്, കൊളംബിയയുടെ അഭ്യര്ത്ഥനപ്രകാരം റഷ്യയുടെയും ചൈനയുടെയും പിന്തുണയോടെ തിങ്കളാഴ്ച യുഎന് സുരക്ഷാ സമിതിയുടെ അടിയന്തര യോഗം വിളിച്ചുചേര്ത്തിട്ടുണ്ട്. വെനസ്വേലയുടെ സഖ്യകക്ഷികളായ റഷ്യയും ചൈനയും അമേരിക്കയുടെ നീക്കത്തെ ശക്തമായി എതിര്ക്കുന്നു. യുഎന് സുരക്ഷാ സമിതിയില് ഇത് വലിയ വാഗ്വാദങ്ങള്ക്ക് കാരണമാകും.
അസാധാരണ നടപടി
നിക്കോളാസ് മഡുറോയ്ക്കെതിരെ അമേരിക്കന് നീതിന്യായ വകുപ്പ് ചുമത്തിയിട്ടുള്ള കുറ്റപത്രത്തിലെ പ്രധാന വിശദാംശങ്ങള്:
1. നര്ക്കോ-ടെററിസം ഗൂഢാലോചന : മഡുറോ ഒരു മയക്കുമരുന്ന് മാഫിയയുടെ തലവനായി പ്രവര്ത്തിച്ചു എന്നാണ് പ്രധാന ആരോപണം. 'കാര്ട്ടല് ഒഫ് ദി സണ്സ്' എന്നറിയപ്പെടുന്ന ഒരു മയക്കുമരുന്ന് സംഘത്തെ അദ്ദേഹം നയിച്ചുവെന്നും കൊളംബിയയിലെ വിപ്ലവ സായുധ സേനയുമായി ചേര്ന്ന് അമേരിക്കയിലേക്ക് വന്തോതില് കൊക്കെയ്ന് കടത്തിയെന്നും കുറ്റപത്രത്തില് പറയുന്നു.
2. അമേരിക്കയിലേക്ക് മയക്കുമരുന്ന് ഇറക്കുമതി ചെയ്യാനുള്ള ഗൂഢാലോചന: പ്രതിവര്ഷം നൂറുകണക്കിന് ടണ് കൊക്കെയ്ന് അമേരിക്കയിലേക്ക് എത്തിക്കാന് മഡുറോയും കൂട്ടാളികളും സൗകര്യമൊരുക്കിയതായി ആരോപിക്കപ്പെടുന്നു. മയക്കുമരുന്ന് കടത്തിന് വെനസ്വേലന് വ്യോമാതിര്ത്തിയും തുറമുഖങ്ങളും വിട്ടുനല്കിയതായും കുറ്റപത്രത്തില് വ്യക്തമാക്കുന്നുണ്ട്.
3. ആയുധങ്ങള് ഉപയോഗിച്ചുള്ള കുറ്റകൃത്യങ്ങള്: മയക്കുമരുന്ന് കടത്ത് സുഗമമാക്കുന്നതിനായി മെഷീന് ഗണ്ണുകള് ഉള്പ്പെടെയുള്ള വിനാശകാരികളായ ആയുധങ്ങള് ഉപയോഗിച്ചുവെന്നും കൈവശം വെച്ചുവെന്നും കുറ്റപത്രത്തില് ആരോപിക്കുന്നു.
4. പണം വെളുപ്പിക്കല് : മയക്കുമരുന്ന് ഇടപാടുകളിലൂടെ ലഭിക്കുന്ന കോടിക്കണക്കിന് ഡോളര് വെളുപ്പിച്ചെടുക്കാന് സര്ക്കാര് സംവിധാനങ്ങളെ ദുരുപയോഗം ചെയ്തു എന്നതാണ് മറ്റൊരു പ്രധാന ആരോപണം.
5. ഭരണകൂടത്തെ മയക്കുമരുന്ന് മാഫിയയാക്കി മാറ്റല്: മഡുറോ വെനസ്വേലയുടെ സൈന്യം, നീതിന്യായ വ്യവസ്ഥ, രഹസ്യാന്വേഷണ വിഭാഗം എന്നിവയെ മയക്കുമരുന്ന് കടത്തിനെ സംരക്ഷിക്കാനുള്ള ഉപകരണങ്ങളാക്കി മാറ്റിയെന്ന് അമേരിക്കന് പ്രോസിക്യൂട്ടര്മാര് വാദിക്കുന്നു.
അമേരിക്കയുടെ കാഴ്ചപ്പാടില് മഡുറോ ഒരു രാഷ്ട്രീയ നേതാവ് എന്നതിലുപരി, അന്താരാഷ്ട്ര മയക്കുമരുന്ന് ശൃംഖലയുടെ തലവനാണ്. ഈ കുറ്റങ്ങള് തെളിയിക്കപ്പെട്ടാല് അദ്ദേഹത്തിന് ജീവപര്യന്തം തടവുശിക്ഷ ലഭിക്കാന് സാധ്യതയുണ്ട്.
 |
വെനസ്വേലന് സൈന്യത്തിലെയും സര്ക്കാരിലെയും ഉയര്ന്ന ഉദ്യോഗസ്ഥര് ഉള്പ്പെട്ട ഒരു ഗ്രൂപ്പാണിതെന്നാണ് അമേരിക്ക പറയുന്നത്. മഡുറോ ഇതിന്റെ തലവനാണെന്നും, സൈനിക പദവികള് മയക്കുമരുന്ന് കടത്തുകാര്ക്ക് സംരക്ഷണം നല്കാന് ഉപയോഗിച്ചുവെന്നും അമേരിക്കന് പ്രോസിക്യൂട്ടര്മാര് ആരോപിക്കുന്നു.
കൊളംബിയന് ഗ്രൂപ്പായ എഫ് എ ആര് സിക്ക് ആയുധങ്ങള് നല്കുന്നതിന് പകരമായി അവര് ഉത്പാദിപ്പിക്കുന്ന കൊക്കെയ്ന് അമേരിക്കയിലേക്ക് കടത്താന് മഡുറോ സഹായിച്ചു എന്നതാണ് പ്രധാന വാദം. വെനസ്വേലയില് നിന്ന് ഹോണ്ടുറാസ് വഴി അമേരിക്കയിലേക്ക് മയക്കുമരുന്ന് വിമാനങ്ങള് അയക്കാന് മഡുറോ നേരിട്ട് അനുമതി നല്കിയതിന് സാക്ഷിമൊഴികളുണ്ടെന്ന് യുഎസ് അവകാശപ്പെടുന്നു.
ശിക്ഷാ നടപടികള്:
ഈ കുറ്റപത്രത്തിലെ ഓരോ കുറ്റത്തിനും കഠിനമായ ശിക്ഷകളാണ് അമേരിക്കന് നിയമപ്രകാരം നിശ്ചയിച്ചിരിക്കുന്നത്.
നര്ക്കോ-ടെററിസം-20 വര്ഷം തടവ്
കൊക്കെയ്ന് ഇറക്കുമതി-10 വര്ഷം തടവ്
മെഷീന് ഗണ് ഉപയോഗം-30 വര്ഷം തടവ്
മഡുറോയുടെ പ്രതിവാദം:
മഡുറോയും വെനസ്വേലന് സര്ക്കാരും കാലാകാലങ്ങളായി ഈ ആരോപണങ്ങളെ തള്ളിക്കളയുകയാണ്. ഇതൊരു 'രാഷ്ട്രീയ പ്രേരിത' നീക്കമാണ്. വെനസ്വേലയിലെ ഭരണം അട്ടിമറിക്കാനും അവിടുത്തെ എണ്ണസമ്പത്ത് കൈക്കലാക്കാനും അമേരിക്ക നടത്തുന്ന ശ്രമമാണിതെന്ന് അദ്ദേഹം ആരോപിക്കുന്നു. താന് ഒരു ലഹരി വിരുദ്ധ പോരാളിയാണെന്നും, അമേരിക്കയാണ് ലോകത്തിലെ ഏറ്റവും വലിയ മയക്കുമരുന്ന് വിപണിയെന്നും അദ്ദേഹം തിരിച്ചടിക്കുന്നു.
Summary: Venezuelan President Nicolás Maduro has now arrived at Brooklyn's Metropolitan Detention Center (MDC). The facility is well-known for housing high-profile prisoners, including Ghislaine Maxwell and P. Diddy.
After arriving at a US military base early Saturday morning, he was taken to the US Drug Enforcement Administration (DEA) office in New York. He was transferred to the Brooklyn jail after being charged with drug trafficking and weapons offenses. He had previously denied allegations that he is the head of a drug cartel
COMMENTS