58 പാക് സൈനികരെ വധിച്ചുവെന്ന് താലിബാന്‍, 25 പാക് സൈനിക പോസ്റ്റുകള്‍ പിടിച്ചെടുത്തു, ഡ്യുറന്റ് ലൈന്‍ അശാന്തം

Taliban Claims to Have Killed 58 Pakistani Soldiers, Captured 25 Pakistani Military Posts; Durand Line Unrest Continues

കാബൂള്‍ :  അതിര്‍ത്തി ഓപ്പറേഷനുകളില്‍ 58 പാകിസ്ഥാന്‍ സൈനികരെ വധിച്ചതായി അഫ്ഗാനിസ്ഥാനിലെ താലിബാന്‍ ഭരണകൂടം. ഇരു രാജ്യങ്ങളും തമ്മിലുള്ള സൈനിക സംഘര്‍ഷങ്ങള്‍ രൂക്ഷമായിരിക്കുകയാണ്.

താലിബാന്‍ സര്‍ക്കാരിന്റെ മുഖ്യ വക്താവായ സബീഹുല്ല മുജാഹിദ് അറിയിച്ചത്, പ്രതികാര നടപടിയായി നടത്തിയ ആക്രമണങ്ങളില്‍ 58 പാകിസ്ഥാന്‍ സൈനികര്‍ കൊല്ലപ്പെടുകയും 30 പേര്‍ക്ക് പരിക്കേല്‍ക്കുകയും ചെയ്തു എന്നാണ്.

ഈ ഓപ്പറേഷനിലൂടെ 25 പാക് സൈനിക പോസ്റ്റുകള്‍ പിടിച്ചെടുത്തതായും താലിബാന്‍ അവകാശപ്പെട്ടു.

താലിബാന്റെ ഭാഗത്ത് 9 സൈനികര്‍ കൊല്ലപ്പെടുകയും 16 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്.

അഫ്ഗാന്‍ പ്രതിരോധ മന്ത്രാലയം ഈ ഓപ്പറേഷനെ 'വിജയകരമായ പ്രതികാര നടപടി' എന്നാണ് വിശേഷിപ്പിച്ചത്. കാബൂളിലും കിഴക്കന്‍ അഫ്ഗാനിസ്ഥാനിലും പാകിസ്ഥാന്‍ നടത്തിയെന്ന് ആരോപിക്കുന്ന ബോംബാക്രമണങ്ങള്‍ ഉള്‍പ്പെടെയുള്ള അഫ്ഗാന്‍ അതിര്‍ത്തിയിലെ ആവര്‍ത്തിച്ചുള്ള ലംഘനങ്ങള്‍ക്ക് മറുപടിയായാണ് ഈ തിരിച്ചടിയെന്നും സബീഹുല്ല മുജാഹിദ് വ്യക്തമാക്കി.

പാകിസ്ഥാന്‍ 'പഴയ തെറ്റുകള്‍ ആവര്‍ത്തിക്കുകയാണെങ്കില്‍,' കാബൂളിന്റെ പ്രതികരണം 'മുമ്പത്തേതിനേക്കാള്‍ രൂക്ഷമായിരിക്കും' എന്ന് അഫ്ഗാന്‍ പ്രതിരോധ മന്ത്രി മുന്നറിയിപ്പ് നല്‍കി. അഫ്ഗാനിസ്ഥാന്‍ നല്‍കിയ നാശനഷ്ടങ്ങളുടെ കണക്കുകള്‍ പാകിസ്ഥാന്‍ ഔദ്യോഗികമായി സ്ഥിരീകരിച്ചിട്ടില്ല.

പാകിസ്ഥാന്‍ ആഭ്യന്തര മന്ത്രി അഫ്ഗാന്‍ ആക്രമണങ്ങളെ 'പ്രകോപനമില്ലാത്തത്' എന്ന് അപലപിക്കുകയും തങ്ങളുടെ സൈന്യം ശക്തമായി പ്രതികരിച്ചതായും അവകാശപ്പെട്ടു. അതിര്‍ത്തിയിലെ സംഘര്‍ഷങ്ങളെത്തുടര്‍ന്ന് തോര്‍ഖാം, ചമന്‍ എന്നിവയുള്‍പ്പെടെയുള്ള പ്രധാന അതിര്‍ത്തി കവാടങ്ങളെല്ലാം പാകിസ്ഥാന്‍ അടച്ചു.

തങ്ങള്‍ക്കെതിരെ ആക്രമണം നടത്തുന്ന തെഹ്രിക്-ഇ-താലിബാന്‍ പാകിസ്ഥാന്‍ (ടിടിപി) തീവ്രവാദികളെ അഫ്ഗാന്‍ ഭരണകൂടം സംരക്ഷിക്കുന്നു എന്ന് ഇസ്ലാമാബാദ് ആവര്‍ത്തിച്ച് ആരോപിച്ചു. എന്നാല്‍ ഈ ആരോപണം കാബൂള്‍ നിഷേധിച്ചു.

തങ്ങളുടെ സൈന്യം നടത്തിയ പ്രത്യാക്രമണത്തില്‍ നിരവധി അഫ്ഗാന്‍ പോസ്റ്റുകള്‍ നശിപ്പിക്കപ്പെടുകയും 'നിരവധി അഫ്ഗാന്‍ സൈനികരും ഖവാരിജുകളും (ടിടിപി അംഗങ്ങള്‍) കൊല്ലപ്പെടുകയും' ചെയ്തതായി പാക് സുരക്ഷാ വൃത്തങ്ങള്‍ അവകാശപ്പെട്ടു.

അഫ്ഗാനിസ്ഥാന്റെ വിദേശകാര്യ മന്ത്രി ഇന്ത്യയില്‍ സന്ദര്‍ശനം നടത്തുന്നതിനിടെയാണ് സംഘര്‍ഷം വര്‍ദ്ധിച്ചത്. ഈ സ്ഥിതിഗതികള്‍ കണക്കിലെടുത്ത്, ഇറാന്‍, ഖത്തര്‍, സൗദി അറേബ്യ തുടങ്ങിയ രാജ്യങ്ങള്‍  സംയമനം പാലിക്കാനും സംഘര്‍ഷം ലഘൂകരിക്കുന്നതിനായി സംഭാഷണങ്ങള്‍ക്ക് മുന്‍ഗണന നല്‍കാനും ഇരു രാജ്യങ്ങളോടും ആവശ്യപ്പെട്ടു.

Summary: Taliban Claims to Have Killed 58 Pakistani Soldiers, Captured 25 Pakistani Military Posts; Durand Line Unrest Continues