തിരുവനന്തപുരം: ഡല്ഹിയില് കേന്ദ്ര സര്ക്കാരിനെതിരെ സമരം ചെയ്യാന് പോവുന്ന മുഖ്യമന്ത്രിയും മന്ത്രിമാരും ചെലവ് എ.കെ.ജി സെന്ററില് നിന്നും എടു...
തിരുവനന്തപുരം: ഡല്ഹിയില് കേന്ദ്ര സര്ക്കാരിനെതിരെ സമരം ചെയ്യാന് പോവുന്ന മുഖ്യമന്ത്രിയും മന്ത്രിമാരും ചെലവ് എ.കെ.ജി സെന്ററില് നിന്നും എടുക്കണമെന്ന് എന്.ഡി.എ സംസ്ഥാന ചെയര്മാന് കെ. സുരേന്ദ്രന്. കേരള പദയാത്രയോട് അനുബന്ധിച്ച് വടകരയില് നടത്തിയ വാര്ത്താസമ്മേളനത്തിനിടയിലായിരുന്നു സുരേന്ദ്രന്റെ പ്രതികരണം.
ജനങ്ങളുടെ നികുതി പണം ഉപയോഗിച്ച് രാഷ്ട്രീയം കളിക്കരുതെന്നും മാസപ്പടിയില് മുഖ്യമന്ത്രിയുടെ മകളെ രക്ഷിക്കാന് കെ എസ് ഐ ഡി സി 25 ലക്ഷം രൂപ കൊടുത്ത് അഭിഭാഷകനെ വെക്കുകയാണും സര്ക്കാര് അഭിഭാഷകരുള്ളപ്പോള് പുറത്ത് നിന്നും ലക്ഷങ്ങള് പൊടിച്ച് വക്കീലുമാരെ ഇറക്കുന്നത് എന്തിനാണെന്നും സുരേന്ദ്രന് ചോദിച്ചു.
കേരളത്തെ കേന്ദ്രം അവഗണിക്കുന്നുവെന്ന പ്രചരണം ഇനി വിലപ്പോവില്ല. കൃത്യമായ കണക്കുകള് ഇല്ലാതെ നിയമസഭയെ തെറ്റിദ്ധരിപ്പിക്കുകയാണ് സര്ക്കാര്. കേരളത്തിന് എത്ര കേന്ദ്ര ഫണ്ട് ലഭിച്ചുവെന്ന് സംസ്ഥാന സര്ക്കാര് പറയുന്നില്ല. കേന്ദ്രം അനുവദിച്ച റെവന്യൂ ഡെഫിസിറ്റി ഗ്രാന്ഡിനെ കുറിച്ചോ ജിഎസ്ടി നഷ്ടപരിഹാരത്തെ കുറിച്ചോ സംസ്ഥാനം പറയുന്നില്ല. നിയമസഭയില് വ്യാജ പ്രചരണമാണ് നടക്കുന്നത്. കേന്ദ്രം ഏറ്റവും കൂടുതല് ആനുകൂല്യങ്ങള് നല്കിയ സംസ്ഥാനമാണ് കേരളം. യുപിഎ സര്ക്കാരിനേക്കാള് അഞ്ചിരട്ടി അധികം തുക മോദി സര്ക്കാര് കേരളത്തിന് നല്കി. വടകര റെയില്വെ സ്റ്റേഷനില് കോടികളുടെ വികസനമാണ് നടക്കുന്നത്. യശ്വന്ത്പൂര് എക്സ്പ്രസ് കണ്ണൂരില് നിന്നും കോഴിക്കോട്ടേക്ക് നീട്ടിയതും വടകരയിലും കൊയിലാണ്ടിയിലും സ്റ്റോപ്പ് അനുവദിച്ചതും വടകര പാര്ലമെന്റ് മണ്ഡലത്തിലെ ജനങ്ങള്ക്ക് ഏറെ ഉപകാരപ്രദമാണ്.
കേന്ദ്രഫണ്ട് വിഷയത്തില് സത്യം അറിഞ്ഞിട്ടും പ്രതിപക്ഷം ഭരണപക്ഷത്തിന് മൗനസമ്മതം കൊടുക്കുകയാണ്. മാസപ്പടി കേസ് നിയമസഭയില് പരാമര്ശിക്കാന് പോലും ആഗ്രഹിക്കാത്തയാളാണ് വിഡി സതീശന്. മന്ത്രിസഭയിലെ അംഗത്തെ പോലെയാണ് സതീശന് പെരുമാറുന്നത്. പിണറായി വിജയന്റെ പെട്ടി തൂക്കാനല്ല സതീശനെ നിയമസഭയിലേക്ക് അയച്ചത്. ദില്ലിയിലെ സമരം ജനവഞ്ചനയാണ്. 25,000 കോടി സംസ്ഥാനം നികുതി പിരിച്ചെടുക്കാനുണ്ടെന്നാണ് സിഎജി റിപ്പോര്ട്ട്. ഇവരൊക്കെ സര്ക്കാരിന് മാസപ്പടി കൊടുക്കുന്നവരാണ്. നികുതി പിരിച്ചെടുക്കുന്നതില് പരാജയപ്പെട്ട സര്ക്കാര് കുറ്റം കേന്ദ്രത്തിന്റെ തലയില് കെട്ടിവെക്കുകയാണെന്നും സുരേന്ദ്രന് പറഞ്ഞു.
COMMENTS