Senior Congress leader KV Thomas said the K-Rail project is essential for the progress and development of transport in the Kerala state
സ്വന്തം ലേഖകന്
കൊച്ചി: സംസ്ഥാനത്തിന്റെ പുരോഗതിക്കും ഗതാഗത വികസനത്തിനും കെ-റെയില് പദ്ധതി ആവശ്യമാണെന്ന് മുതിര്ന്ന കോണ്ഗ്രസ് നേതാവ് കെ വി തോമസ്.
പാലാരിവട്ടത്ത് ഇടതു മുന്നണി കണ്വെന്ഷനിലാണ് കെവി തോമസ് മുഖ്യമന്ത്രിയേയും സര്ക്കാരിനെയും വാനോളം പുകഴ്ത്തിയത്.
മുഖ്യമന്ത്രിയുടെ ഉദ്ഘാടന പ്രസംഗത്തിനിടെയാണ് കെ വി തോമസ് വേദിയിലേക്കു വന്നത്. സഖാവ് കെ വി തോമസ് എന്നു വിളിച്ചാണ് ഇടത് അനുകൂലികള് അദ്ദേഹത്തെ എതിരേറ്റത്.
ഒരു മണിക്കൂര് ബ്ലോക്കില് പെട്ടതുകൊണ്ടാണ് വേദിയിലെത്താന് വൈകിയതെന്ന് കെ വി തോമസ് മുഖ്യമന്ത്രിയോട് പറഞ്ഞു.
കെ റെയില് വരേണ്ട ആവശ്യകത ഇതു തന്നെയാണെന്ന് മുഖ്യമന്ത്രി പറയുകയും ചെയ്തു. സിപിഐ സംസ്ഥാന ജനറല് സെക്രട്ടറി കാനം രാജേന്ദ്രനും സ്ഥാനാര്ത്ഥി ജോ ജോസഫും എല്ഡിഎഫിലേയും സിപിഐഎമ്മിലേയും മറ്റു നേതാക്കളും സന്നിഹിതരായിരുന്നു.
പുതിയ പദ്ധതികള്ക്ക് എതിര്പ്പ് സ്വാഭാവികമാണ്. കൊച്ചി മെട്രോ ഉള്പ്പെടെ വിവിധ പദ്ധതികള് പല പ്രതിസന്ധികള് തരണം ചെയ്താണ് യാഥാര്ഥ്യമാക്കിയത്.
പ്രതിസന്ധികള് നേരിട്ട് സംസ്ഥാനത്തെ മുന്നോട്ടു നയിക്കാന് കരുത്തുള്ള ജനനായകര്ക്കേ കഴിയൂ. പിണറായി വിജയന് ആ കരുത്തുണ്ടെന്നും കെ.വി തോമസ് പറഞ്ഞു. തൃക്കാക്കര ഉപതിരഞ്ഞെടുപ്പില് ജനം വികസനത്തിനൊപ്പം നില്ക്കുമെന്നും കെ വി തോമസ് അഭിപ്രായപ്പെട്ടു.
എല്ഡിഎഫിനായി സജീവ പ്രചരണത്തിനിറങ്ങുമെന്ന് അദ്ദേഹം പറഞ്ഞു. മുഖ്യമന്ത്രിയാണ് കെ വി തോമസിനെ വേദിയിലേക്ക് സ്വാഗതം ചെയ്തത്. എല്ഡിഎഫ് കണ്വീനര് ഇ പി ജയരാജന് കെ വി തോമസിനു ഷാള് അണിയിച്ച് സ്വീകരിച്ചു.
Summary: Senior Congress leader KV Thomas said the K-Rail project is essential for the progress and development of transport in the Kerala state. KV Thomas praised the Chief Minister and the government at the Left Front convention at Palarivattom.
COMMENTS