കനറാ ബാങ്ക് ഉൾപ്പെടെ ലയിപ്പിക്കുന്നു, ബാങ്കിംഗ് രംഗത്ത് വൻ പരിഷ്കാരങ്ങളുമായി ധനമന്ത്രി നിർമ്മലാ സീതാരാമൻ

ന്യൂഡൽഹി: രാജ്യത്തെ ഗ്രസിച്ചിരിക്കുന്ന സാമ്പത്തിക പ്രതിസന്ധി മറികടക്കാനുള്ള നടപടികളുടെ ഭാഗമായി കൂടുതൽ പൊതുമേഖലാ ബാങ്കുകളെ  ലയിപ്പിക്കാൻ ക...

ന്യൂഡൽഹി: രാജ്യത്തെ ഗ്രസിച്ചിരിക്കുന്ന സാമ്പത്തിക പ്രതിസന്ധി മറികടക്കാനുള്ള നടപടികളുടെ ഭാഗമായി കൂടുതൽ പൊതുമേഖലാ ബാങ്കുകളെ  ലയിപ്പിക്കാൻ കേന്ദ്രസർക്കാർ തീരുമാനിച്ചു. ധനമന്ത്രി നിർമ്മലാ സീതാരാമനാണ് ബാങ്ക്ലയനം ഉൾപ്പെടെ സുപ്രധാനമായ സാമ്പത്തിക പരിഷ്കാര പദ്ധതികളെക്കുറിച്ച്  വെളിപ്പെടുത്തിയത്.

പഞ്ചാബ് നാഷണൽ ബാങ്ക് , യുണൈറ്റഡ് ബാങ്ക്, ഓറിയൻറൽ ബാങ്ക് ഒഫ് കൊമേഴ്സ് എന്നിവയെ ലയിപ്പിച്ച് രാജ്യത്തെ രണ്ടാമത്തെ വലിയ ബാങ്ക് ആക്കുന്നതാണ് ആദ്യ  ലയനം.

കേരളത്തിലെ ലീഡ് ബാങ്കായ കനറ ബാങ്ക് , സിൻഡിക്കേറ്റ് ബാങ്ക് എന്നിവയെ ലയിപ്പിക്കുന്നതാണ് മറ്റൊരു പ്രഖ്യാപനം. 15.2 ലക്ഷം കോടി രൂപയുടെ ബിസിനസാണ് ഈ ബാങ്കുകളുടെ ലയനത്തിലൂടെ ലക്ഷ്യമിടുന്നത്.

യൂണിയൻ ബാങ്ക് ഒഫ് ഇന്ത്യ, കോർപ്പറേഷൻ ബാങ്ക് , ആന്ധ്ര ബാങ്ക് എന്നിവയെ ലയിപ്പിച്ച്  മറ്റൊരു  സംയുക്ത ബാങ്കിനെ കൂടി രൂപീകരിക്കും.

ഇന്ത്യൻ ബാങ്ക്, അലഹബാദ് ബാങ്ക് എന്നിവയെ ലയിപ്പിച്ച് ഒന്നാക്കും. മൊത്തത്തിൽ രാജ്യത്ത് 12 പ്രമുഖ പൊതുമേഖലാ ബാങ്കുകൾ മാത്രമായിരിക്കും ഭാവിയിൽ ഉണ്ടാവുക.

ധനമന്ത്രിയുടെ മറ്റ് പ്രധാന പ്രഖ്യാപനങ്ങൾ:

*  ഭവന നിർമ്മാണ മേഖലക്ക് 3300 കോടി രൂപയുടെ വായ്പ ധനസഹായം.

* വൻകിട വായ്പകളുടെ നിലവിലെ സ്ഥിതി പരിശോധിക്കും.

* രാജ്യത്ത് വായ്പ വിതരണം കൂടുതൽ ഉദാരമാക്കി.

* വൻകിട വായ്പകൾ നൽകുന്നതിന് പ്രത്യേക ഏജൻസി രൂപീകരിക്കും. ഈ ഏജൻസിയുടെ മേൽനോട്ടത്തിൽ മാത്രമായിരിക്കും ഭാവിയിൽ വൻകിട വായ്പകൾ അനുവദിക്കുക.