118 പേരുടെ പിന്തുണക്കത്തുമായി വരാതെ സത്യപ്രതിജ്ഞ നടപ്പില്ലെന്ന് ഗവർണർ, വിജയുടെ സത്യപ്രജ്ഞ അനിശ്ചിതത്വത്തിൽ

ചെന്നൈ: തമിഴ്നാട്ടിൽ സത്യപ്രതിജ്ഞയ്ക്കു തയ്യാറെടുത്ത  തമിഴക വെട്രി കഴകം നേതാവ് വിജയ് വെട്ടിലായി. 118 പേരുടെ പിന്തുണക്കത്ത് സമർപ്പിക്കാതെ സർക...

ചെന്നൈ: തമിഴ്നാട്ടിൽ സത്യപ്രതിജ്ഞയ്ക്കു തയ്യാറെടുത്ത  തമിഴക വെട്രി കഴകം നേതാവ് വിജയ് വെട്ടിലായി. 118 പേരുടെ പിന്തുണക്കത്ത് സമർപ്പിക്കാതെ സർക്കാർ രൂപീകരിക്കാനാവില്ലെന്ന് ഗവർണർ രാജേന്ദ്ര അർലേക്കർ കർശന നിലപാടെടുത്തതോടെയാണ് സത്യപ്രതിജ്ഞ നാളെ നടക്കില്ലെന്ന് ഉറപ്പായത്.

 234 സീറ്റുകളിൽ 108 എണ്ണം നേടി ഏറ്റവും വലിയ ഒറ്റക്കക്ഷിയായി മാറിയിരുന്നു ടി വി കെ. വിജയ് മത്സരിച്ച രണ്ട് മണ്ഡലങ്ങളിലും വിജയിച്ചു.

 സർക്കാർ രൂപീകരിക്കാൻ 118 പേരുടെ പിന്തുണയാണ് വേണ്ടത്. എന്നാൽ, നിലവിൽ 116 എംഎൽഎമാരുടെ പിന്തുണക്കത്ത് മാത്രമേ ഗവർണർക്ക് സമർപ്പിക്കാൻ കഴിഞ്ഞിട്ടുള്ളൂ.
ഭൂരിപക്ഷം ഉറപ്പാക്കാതെ സത്യപ്രതിജ്ഞ അനുവദിക്കില്ലെന്ന് രാജ്ഭവൻ അറിയിച്ചതോടെ സർക്കാർ രൂപീകരണത്തിൽ അനിശ്ചിതത്വം തുടരുകയാണ്.
 

സഖ്യകക്ഷികളുടെ നിലപാട്:
തമിഴ്നാട് നിയമസഭയിൽ കേവല ഭൂരിപക്ഷത്തിന് 118 സീറ്റുകളാണ് വേണ്ടത്. വിജയിന്റെ ടിവികെക്ക് സ്വന്തമായുള്ളത് 108 സീറ്റുകൾ (വിജയ് മത്സരിച്ച രണ്ട് സീറ്റുകളിലും വിജയിച്ചു). കോൺഗ്രസിന്റെ 5 എംഎൽഎമാർ ടിവികെയ്ക്ക് പിന്തുണ പ്രഖ്യാപിച്ചതോടെ എണ്ണം 113 ആയി.

സഖ്യകക്ഷികളായി കരുതിയിരുന്ന സിപിഎം (2), സിപിഐ (2), വിസികെ (2) എന്നിവരുമായി വിജയ് ചർച്ചകൾ നടത്തിയെങ്കിലും, 116 പേരുടെ പിന്തുണക്കത്ത് മാത്രമേ ഗവർണർക്ക് സമർപ്പിക്കാൻ കഴിഞ്ഞിട്ടുള്ളൂ. ഭൂരിപക്ഷത്തിന് ഇനിയും 2 പേരുടെ കുറവുണ്ട്.

 118 പേരുടെ വ്യക്തമായ പിന്തുണക്കത്ത് ഇല്ലാതെ സത്യപ്രതിജ്ഞ അനുവദിക്കില്ലെന്നാണ് രാജ്ഭവന്റെ നിലപാട്. സഭയിൽ ഭൂരിപക്ഷം തെളിയിക്കാം എന്ന വിജയിന്റെ ഉറപ്പ് ഗവർണർ അംഗീകരിച്ചില്ല. 
മുസ്‍ലിം ലീഗ് ടിവികെ സഖ്യത്തിന്റെ ഭാഗമല്ലെന്ന് ലീഗ് ഔദ്യോഗികമായി കത്തുനൽകിയത് വിജയിന് തിരിച്ചടിയായി.
എഐഎഡിഎംകെ തങ്ങളുടെ 25 എംഎൽഎമാരെ പാർട്ടി പുതുച്ചേരിയിലെ 'ദി ഷോർ ട്രിഷം' എന്ന റിസോർട്ടിലേക്ക് മാറ്റി. എംഎൽഎമാരെ മറ്റ് പാർട്ടികൾ സ്വാധീനിക്കുന്നത് തടയാനാണ് ഈ നീക്കം.

 ടിവികെ സർക്കാർ രൂപീകരിക്കുന്നതിനെ എതിർക്കില്ലെന്ന് എം കെ സ്റ്റാലിൻ പറഞ്ഞു. സംസ്ഥാനത്ത് ഉടൻ മറ്റൊരു തിരഞ്ഞെടുപ്പോ ഭരണഘടനാ പ്രതിസന്ധിയോ ഉണ്ടാകാൻ ആഗ്രഹിക്കുന്നില്ലെന്നും, പുതിയ സർക്കാരിന്റെ പ്രവർത്തനം ആറുമാസം നിരീക്ഷിക്കുമെന്നും അദ്ദേഹം വ്യക്തമാക്കി.
ചുരുക്കത്തിൽ, ഏറ്റവും വലിയ ഒറ്റക്കക്ഷിയായ ടിവികെക്ക് ഭൂരിപക്ഷം തെളിയിക്കാൻ ആവശ്യമായ രണ്ട് എംഎൽഎമാരുടെ കുറവ് പരിഹരിക്കാനുള്ള ഓട്ടത്തിലാണ്.