ഡല്‍ഹിയില്‍ ജഡ്ജി ബാത്ത് റൂമില്‍ തൂങ്ങി മരിച്ച നിലയില്‍, ദുരൂഹത നീക്കാനാവാതെ പൊലീസ്

Delhi Judge Found Dead in Bathroom; Police Probe Mystery

ന്യൂഡല്‍ഹി : ഡല്‍ഹിയിലെ കര്‍ക്കര്‍ഡൂമ കോടതിയില്‍ ജഡ്ജിയും ഡല്‍ഹി ഡിസ്ട്രിക്റ്റ് ലീഗല്‍ സര്‍വീസസ് അതോറിറ്റി നോര്‍ത്ത് ഈസ്റ്റ് ഡിസ്ട്രിക്റ്റ് സെക്രട്ടറിയായിരുന്ന അമന്‍ കുമാര്‍ ശര്‍മ്മയെ (35) ദക്ഷിണ ഡല്‍ഹിയിലെ സഫ്ദര്‍ജംഗ് എന്‍ക്ലേവിലുള്ള (ഗ്രീന്‍ പാര്‍ക്ക്) വസതിയില്‍ മരിച്ച നിലയില്‍ കണ്ടെത്തിയത്. വീട്ടിലെ ബാത്ത് റൂമില്‍ തൂങ്ങിയ നിലയിലായിരുന്നു മൃതദേഹം.

പോലീസിന് ലഭിച്ച പി.സി.ആര്‍ കോളുകളെത്തുടര്‍ന്ന് ഉദ്യോഗസ്ഥര്‍ സ്ഥലത്തെത്തുകയും ഇന്‍ക്വസ്റ്റ് നടപടികള്‍ ആരംഭിക്കുകയും ചെയ്തു. പ്രാഥമിക അന്വേഷണത്തില്‍ മറ്റ് അസ്വാഭാവികതകളൊന്നും കണ്ടെത്താനായിട്ടില്ലെന്ന് മുതിര്‍ന്ന പോലീസ് ഉദ്യോഗസ്ഥര്‍ വ്യക്തമാക്കിയിട്ടുണ്ട്.

2018-ല്‍ പൂനെയിലെ പ്രശസ്തമായ സിംബയോസിസ് ലോ സ്‌കൂളില്‍ നിന്നാണ് അദ്ദേഹം ബി.എ.എല്‍.എല്‍.ബി പൂര്‍ത്തിയാക്കിയത്. 2021 ജൂണ്‍ 19-നാണ് ഡല്‍ഹി ജുഡിഷ്യല്‍ സര്‍വീസില്‍ ഔദ്യോഗികമായി പ്രവേശിച്ചത്. ജുഡിഷ്യല്‍ മജിസ്ട്രേറ്റ് ഫസ്റ്റ് ക്ലാസ്, സിവില്‍ ജഡ്ജി എന്നീ നിലകളില്‍ അദ്ദേഹം വിവിധ കോടതികളില്‍ സേവനമനുഷ്ഠിച്ചിട്ടുണ്ട്. സിവില്‍, ക്രിമിനല്‍ കേസുകളില്‍ ഒരേപോലെ പ്രാവീണ്യം തെളിയിച്ച വ്യക്തിയായിരുന്നു അദ്ദേഹം.

2025 ഒക്ടോബര്‍ 18-നാണ് അദ്ദേഹം കര്‍ക്കര്‍ഡൂമ കോടതിയില്‍ ഡിസ്ട്രിക്റ്റ് ലീഗല്‍ സര്‍വീസസ് അതോറിറ്റിയുടെ പൂര്‍ണ്ണസമയ സെക്രട്ടറിയായി ചുമതലയേറ്റത്. പോലീസ് നിലവില്‍ കുടുംബാംഗങ്ങളുടെയും സുഹൃത്തുക്കളുടെയും മൊഴികള്‍ രേഖപ്പെടുത്തി വരികയാണ്.

സംഭവസ്ഥലത്തുനിന്ന് ഇതുവരെ ആത്മഹത്യാ കുറിപ്പുകളൊന്നും ലഭിച്ചിട്ടില്ലാത്തതിനാല്‍ മരണകാരണത്തെക്കുറിച്ച് ഇപ്പോഴും അവ്യക്തത തുടരുന്നു. ജോലി സംബന്ധമായതോ വ്യക്തിപരമായതോ ആയ കാരണങ്ങള്‍ അദ്ദേഹത്തെ അലട്ടിയിരുന്നോ എന്ന് പോലീസ് പരിശോധിക്കുന്നുണ്ട്.

മൃതദേഹം പോസ്റ്റ്മോര്‍ട്ടത്തിനായി അയച്ചിരിക്കുകയാണ്. ഇതിന്റെ ഫലം വന്നാല്‍ മാത്രമേ കൂടുതല്‍ കാര്യങ്ങളില്‍ വ്യക്തത ലഭിക്കൂ.

അദ്ദേഹത്തിന്റെ ഭാര്യയും ജുഡിഷ്യല്‍ സര്‍വീസിലെ ഉദ്യോഗസ്ഥയാണ്. ഒന്‍പത് മാസം പ്രായമുള്ള ഒരു കുഞ്ഞുള്‍പ്പെടെ രണ്ട് മക്കളാണ് ഇവര്‍ക്കുള്ളത്. യുവ ജഡ്ജിയുടെ അപ്രതീക്ഷിത വിയോഗം ഡല്‍ഹിയിലെ നിയമവൃത്തങ്ങളെ ഒന്നടങ്കം ഞെട്ടിച്ചിരിക്കുകയാണ്.

ശ്രദ്ധിക്കുക: മാനസികമായ പ്രയാസങ്ങളോ ആത്മഹത്യാ ചിന്തകളോ നേരിടുന്നുണ്ടെങ്കില്‍ സഹായത്തിനായി താഴെ പറയുന്ന ഹെല്‍പ്പ് ലൈന്‍ നമ്പറുകളില്‍ ബന്ധപ്പെടുക:

ആശ: 9820466726

സ്‌നേഹ ഇന്ത്യ: 044-24640050

സഞ്ജീവനി (ഡല്‍ഹി): 011-24311918

Summary: Aman Kumar Sharma (35), a judge at Delhi’s Karkardooma Court and the Secretary of the North East District Legal Services Authority (DLSA), was found dead at his residence in Green Park, Safdarjung Enclave, South Delhi. The body was discovered hanging in the bathroom of his house.

Upon receiving a PCR call, police officials rushed to the spot and initiated inquest proceedings. Senior police officers stated that initial investigations have not revealed any other foul play.