വനിതാ സംവരണ ബിൽ രാഷ്ട്രീയ ലാഭത്തിന്; കേന്ദ്ര സർക്കാരിനെതിരെ ആഞ്ഞടിച്ച് സോണിയ ഗാന്ധി

ന്യൂഡൽഹി: കേന്ദ്ര സർക്കാർ അവതരിപ്പിച്ച വനിതാ സംവരണ ബിൽ വരാനിരിക്കുന്ന നിയമസഭാ തിരഞ്ഞെടുപ്പുകളിൽ രാഷ്ട്രീയ നേട്ടം കൊയ്യാൻ ലക്ഷ്യമിട്ടുള്ളതാണെ...

ന്യൂഡൽഹി: കേന്ദ്ര സർക്കാർ അവതരിപ്പിച്ച വനിതാ സംവരണ ബിൽ വരാനിരിക്കുന്ന നിയമസഭാ തിരഞ്ഞെടുപ്പുകളിൽ രാഷ്ട്രീയ നേട്ടം കൊയ്യാൻ ലക്ഷ്യമിട്ടുള്ളതാണെന്ന് കോൺഗ്രസ് പാർലമെന്ററി പാർട്ടി അധ്യക്ഷ സോണിയ ഗാന്ധി. ബംഗാൾ, തമിഴ്‌നാട് തുടങ്ങിയ സംസ്ഥാനങ്ങളിലെ തിരഞ്ഞെടുപ്പുകൾ മുന്നിൽ കണ്ടാണ് സർക്കാർ ഇത്തരമൊരു നീക്കം നടത്തുന്നതെന്ന് അവർ ആരോപിച്ചു.

ബില്ലിലെ പല വ്യവസ്ഥകളും പ്രതിപക്ഷത്തെ പ്രതിരോധത്തിലാക്കാനും രാഷ്ട്രീയ നേട്ടമുണ്ടാക്കാനുമുള്ള ഗൂഢാലോചനയുടെ ഭാഗമാണെന്ന് സോണിയ ഗാന്ധി കുറ്റപ്പെടുത്തി. പ്രധാനമായും നാല് കാര്യങ്ങളാണ് അവർ ഉയർത്തിക്കാട്ടിയത്. 

തിരഞ്ഞെടുപ്പുകൾക്ക് തൊട്ടുമുമ്പ് ബിൽ കൊണ്ടുവന്നത് രാഷ്ട്രീയ ആയുധമാക്കാനാണെന്ന് അവർ പറഞ്ഞു. വനിതാ സംവരണം നടപ്പിലാക്കുന്നത് മണ്ഡല പുനർനിർണയവുമായി ബന്ധിപ്പിച്ചതിനെ അവർ ശക്തമായി എതിർത്തു. ഇത് ഭരണഘടനാ വിരുദ്ധമാണെന്നും അവർ ചൂണ്ടിക്കാട്ടി. ജനസംഖ്യാ നിയന്ത്രണം കാര്യക്ഷമമായി നടപ്പിലാക്കിയ കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങൾക്ക് മണ്ഡല പുനർനിർണയം വഴി പാർലമെന്റിലെ സീറ്റുകൾ കുറയുമോ എന്ന വലിയ ആശങ്ക സോണിയ പങ്കുവെച്ചു.

ബില്ലിലെ അവ്യക്തതകൾ നീക്കാൻ ബംഗാൾ തിരഞ്ഞെടുപ്പിന് ശേഷം സർവകക്ഷി യോഗം വിളിക്കണമെന്ന് അവർ ആവശ്യപ്പെട്ടു.

കോൺഗ്രസ് അധ്യക്ഷൻ മല്ലികാർജുൻ ഖർഗെയും സമാനമായ നിലപാടാണ് സ്വീകരിച്ചത്. സ്ത്രീകളുടെ ഉന്നമനത്തേക്കാൾ രാഷ്ട്രീയ താല്പര്യങ്ങൾക്കാണ് സർക്കാർ മുൻഗണന നൽകുന്നതെന്ന് അദ്ദേഹം ആരോപിച്ചു.

Key Words : Women's Reservation Bill, Sonia Gandhi