വനിതാ സംവരണ ഭേദഗതി ബിൽ പരാജയപ്പെട്ടു; പ്രധാനമന്ത്രി ഇന്ന് രാത്രി 8.30-ന് രാജ്യത്തെ അഭിസംബോധന ചെയ്യും

ന്യൂഡൽഹി : പാർലമെന്റിൽ വൻ രാഷ്ട്രീയ നാടകങ്ങൾക്കൊടുവിൽ വനിതാ സംവരണവുമായി ബന്ധപ്പെട്ട നിർണ്ണായക ഭരണഘടനാ ഭേദഗതി ബിൽ പരാജയപ്പെട്ടതിന് പിന്നാലെ, ...

ന്യൂഡൽഹി : പാർലമെന്റിൽ വൻ രാഷ്ട്രീയ നാടകങ്ങൾക്കൊടുവിൽ വനിതാ സംവരണവുമായി ബന്ധപ്പെട്ട നിർണ്ണായക ഭരണഘടനാ ഭേദഗതി ബിൽ പരാജയപ്പെട്ടതിന് പിന്നാലെ, പ്രധാനമന്ത്രി നരേന്ദ്ര മോദി ഇന്ന് രാത്രി 8.30-ന് രാജ്യത്തെ അഭിസംബോധന ചെയ്യും. 

2014-ൽ അധികാരമേറ്റത് മുതൽ ബിജെപി സർക്കാരിന്റെ മൂന്ന് ഭരണകാലയളവിനിടയിൽ ഒരു പ്രധാന ഭരണഘടനാ ഭേദഗതി ബിൽ പാർലമെന്റിൽ പരാജയപ്പെടുന്നത് ഇതാദ്യമായാണ്.

2029-ഓടെ വനിതാ സംവരണം നടപ്പിലാക്കാൻ ലക്ഷ്യമിട്ട് ലോക്സഭയിലെ സീറ്റുകളുടെ എണ്ണം 816 ആയി (മറ്റൊരു കണക്കുപ്രകാരം 850) വർദ്ധിപ്പിക്കാൻ നിർദ്ദേശിച്ച ഭരണഘടന (131-ാം ഭേദഗതി) ബിൽ, 2026 ആണ് പരാജയപ്പെട്ടത്.

വെള്ളിയാഴ്ച നടന്ന വോട്ടെടുപ്പിൽ 298 പേർ ബില്ലിനെ അനുകൂലിച്ചപ്പോൾ 230 പേർ എതിർത്തു. ഭരണഘടനാ ഭേദഗതിക്ക് ആവശ്യമായ മൂന്നിൽ രണ്ട് ഭൂരിപക്ഷം (352 വോട്ടുകൾ) ലഭിക്കാത്തതിനാലാണ് ബിൽ തള്ളപ്പെട്ടത്.

വനിതാ സംവരണത്തെ മണ്ഡല പുനർനിർണ്ണയവുമായി ബന്ധിപ്പിക്കുന്നത് രാഷ്ട്രീയ പ്രേരിതമാണെന്നും ഇത് ദക്ഷിണേന്ത്യൻ സംസ്ഥാനങ്ങളുടെ സീറ്റുകൾ കുറയാൻ കാരണമാകുമെന്നും ആരോപിച്ചാണ് കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ ബില്ലിനെതിരെ നിലകൊണ്ടത്.

ഭേദഗതി ബിൽ പരാജയപ്പെട്ടതോടെ ഇതുമായി ബന്ധപ്പെട്ട് അവതരിപ്പിച്ച മണ്ഡല പുനർനിർണ്ണയ ബില്ലും (Delimitation Bill, 2026), കേന്ദ്രഭരണ പ്രദേശങ്ങളിലെ നിയമഭേദഗതി ബില്ലും സർക്കാർ പിൻവലിച്ചു. ബിൽ പരാജയപ്പെട്ട പശ്ചാത്തലത്തിൽ രാജ്യത്തെ സ്ത്രീകളോട് നേരിട്ട് സംസാരിക്കാനാണ് പ്രധാനമന്ത്രി നരേന്ദ്ര മോദി ലക്ഷ്യമിടുന്നത്. പ്രതിപക്ഷം സ്ത്രീവിരുദ്ധ നിലപാടാണ് സ്വീകരിച്ചതെന്ന വിമർശനം അദ്ദേഹം ഉന്നയിച്ചേക്കുമെന്ന് റിപ്പോർട്ടുകൾ സൂചിപ്പിക്കുന്നു.

Key Words : Women's Reservation Amendment Bill, PM Modi