കേരളത്തിൽ അൾട്രാവയലറ്റ് വികിരണം അതിതീവ്രം; ആറ് ജില്ലകളിൽ 'ഓറഞ്ച് അലർട്ട്'

തിരുവനന്തപുരം: സംസ്ഥാനത്ത് വേനൽച്ചൂട് കഠിനമാകുന്നതിനൊപ്പം അൾട്രാവയലറ്റ് (UV) വികിരണത്തിന്റെ തോതും അപകടകരമായ രീതിയിൽ ഉയരുന്നതായി സംസ്ഥാന ദുരന...

തിരുവനന്തപുരം: സംസ്ഥാനത്ത് വേനൽച്ചൂട് കഠിനമാകുന്നതിനൊപ്പം അൾട്രാവയലറ്റ് (UV) വികിരണത്തിന്റെ തോതും അപകടകരമായ രീതിയിൽ ഉയരുന്നതായി സംസ്ഥാന ദുരന്തനിവാരണ അതോറിറ്റിയുടെ  മുന്നറിയിപ്പ്. ഏപ്രിൽ 16-ന് പുറത്തുവിട്ട ഏറ്റവും പുതിയ കണക്കുകൾ പ്രകാരം പത്തനംതിട്ട, ആലപ്പുഴ, കോട്ടയം, ഇടുക്കി, കൊല്ലം, പാലക്കാട് എന്നീ ആറ് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. 

യുവി ഇൻഡക്സ് (UVI) 8 മുതൽ 10 വരെ രേഖപ്പെടുത്തുന്ന സാഹചര്യത്തിലാണ് ഓറഞ്ച് അലർട്ട് നൽകുന്നത്. കോന്നി (പത്തനംതിട്ട), മൂന്നാർ (ഇടുക്കി) എന്നിവിടങ്ങളിൽ സൂചിക 9 രേഖപ്പെടുത്തി. ചെങ്ങന്നൂർ (ആലപ്പുഴ), ചങ്ങനാശ്ശേരി (കോട്ടയം), കൊട്ടാരക്കര (കൊല്ലം), തൃത്താല (പാലക്കാട്) എന്നീ സ്ഥലങ്ങളിൽ സൂചിക 8 ആണ് രേഖപ്പെടുത്തിയിരിക്കുന്നത്.

യുവി സൂചിക 7 രേഖപ്പെടുത്തിയ എറണാകുളം (കളമശ്ശേരി), തൃശ്ശൂർ (ഒല്ലൂർ), മലപ്പുറം (പൊന്നാനി) എന്നീ ജില്ലകളിൽ മഞ്ഞ അലർട്ടും പ്രഖ്യാപിച്ചു. 

സൂര്യപ്രകാശം നേരിട്ട് ഏൽക്കുന്നത് സൂര്യതപം (Sunburn), ചർമ്മരോഗങ്ങൾ, കണ്ണിനെ ബാധിക്കുന്ന അസുഖങ്ങൾ എന്നിവയ്ക്ക് കാരണമാകുമെന്ന് അധികൃതർ മുന്നറിയിപ്പ് നൽകുന്നു. പൊതുജനങ്ങൾ താഴെ പറയുന്ന മുൻകരുതലുകൾ പാലിക്കണമെന്ന് കേരള സംസ്ഥാന ദുരന്തനിവാരണ അതോറിറ്റി നിർദ്ദേശിക്കുന്നു: 

രാവിലെ 10 മണി മുതൽ വൈകിട്ട് 3 മണി വരെ വികിരണ തോത് ഏറ്റവും ഉയർന്ന നിലയിലായിരിക്കും. ഈ സമയത്ത് നേരിട്ട് വെയിലേൽക്കുന്നത് പരമാവധി ഒഴിവാക്കുക.

പുറത്തിറങ്ങുമ്പോൾ നിർബന്ധമായും കുട, തൊപ്പി, സൺഗ്ലാസ് എന്നിവ ഉപയോഗിക്കുക.

ശരീരം പൂർണ്ണമായും മറയ്ക്കുന്ന ഇളം നിറത്തിലുള്ള അയഞ്ഞ കോട്ടൺ വസ്ത്രങ്ങൾ ധരിക്കുക.

ദാഹം തോന്നിയില്ലെങ്കിലും ധാരാളം ശുദ്ധജലം കുടിക്കുക. നിർജ്ജലീകരണത്തിന് കാരണമാകുന്ന മദ്യം, കാപ്പി, ചായ, കാർബണേറ്റഡ് പാനീയങ്ങൾ എന്നിവ പകൽസമയത്ത് ഒഴിവാക്കുക.

പുറംജോലികളിൽ ഏർപ്പെടുന്നവർ, മത്സ്യത്തൊഴിലാളികൾ, കുട്ടികൾ, പ്രായമായവർ, ഗർഭിണികൾ എന്നിവർ അതീവ ജാഗ്രത പുലർത്തണം. 

അന്തരീക്ഷത്തിൽ മേഘങ്ങളില്ലാത്ത തെളിഞ്ഞ ആകാശമാണെങ്കിലും യുവി സൂചിക ഉയരാൻ സാധ്യതയുള്ളതിനാൽ മലമ്പ്രദേശങ്ങളിലും ഉഷ്ണമേഖലാ പ്രദേശങ്ങളിലും ഉള്ളവർ കൂടുതൽ ശ്രദ്ധിക്കണം. 

Key Words :  Ultraviolet Radiation,Kerala, Orange alert