യുക്രെയ്നുമായി താല്‍ക്കാലിക വെടിനിർത്തല്‍ പ്രഖ്യാപിച്ച്‌ പുടിൻ

മോസ്കോ: യുക്രെയ്നുമായി താല്‍ക്കാലിക വെടിനിർത്തല്‍ പ്രഖ്യാപിച്ച്‌ റഷ്യ. റഷ്യൻ പ്രസിഡൻ്റ് വ്ലാഡിമിർ പുട്ടിൻ പ്രഖ്യാപിച്ച ഈ തീരുമാനം യുക്രെയ്ൻ ...

മോസ്കോ: യുക്രെയ്നുമായി താല്‍ക്കാലിക വെടിനിർത്തല്‍ പ്രഖ്യാപിച്ച്‌ റഷ്യ. റഷ്യൻ പ്രസിഡൻ്റ് വ്ലാഡിമിർ പുട്ടിൻ പ്രഖ്യാപിച്ച ഈ തീരുമാനം യുക്രെയ്ൻ മുന്നോട്ടുവച്ച നിർദേശം പരിഗണിച്ചാണെന്ന് ക്രെംലിൻ അറിയിച്ചു. ഏപ്രില്‍ 11 വൈകിട്ട് 4 മണി മുതല്‍ ഏപ്രില്‍ 12 അർധരാത്രി വരെയാണ് വെടിനിർത്തല്‍ പ്രാബല്യത്തില്‍ വരിക.

നാലുവർഷമായി തുടരുന്ന റഷ്യ-യുക്രെയ്ൻ യുദ്ധത്തിനിടെ സമാധാന ചർച്ചകള്‍ പലവട്ടം വഴിമുട്ടിയ സാഹചര്യത്തിലാണ് ഈ പുതിയ നീക്കം ശ്രദ്ധ നേടുന്നത്. യുക്രെയ്ൻ പ്രസിഡൻ്റ് വൊളൊദിമിർ സെലെൻസ്കി നേരത്തേ തന്നെ ഈസ്റ്റർ വെടിനിർത്തല്‍ നിർദേശം യുഎസ് മുഖേന കൈമാറിയതായി വ്യക്തമാക്കിയിരുന്നു. അതിന്റെ തുടർച്ചയായാണ് റഷ്യയുടെ ഈ പ്രഖ്യാപനം ഉണ്ടായതെന്ന് വിലയിരുത്തപ്പെടുന്നു.

വെടിനിർത്തല്‍ കാലയളവില്‍ എല്ലാ മേഖലകളിലും സൈനിക നടപടികള്‍ നിർത്തിവെക്കാൻ നിർദേശം നല്‍കിയതായി ക്രെംലിൻ അറിയിച്ചു. യുദ്ധരംഗങ്ങളിലെ സംഘർഷങ്ങള്‍ താല്‍ക്കാലികമായി ശമിക്കാനാണ് ഈ നീക്കമെന്ന വിലയിരുത്തലുണ്ട്. എന്നാല്‍, ശത്രുപക്ഷത്തുനിന്ന് ഏതെങ്കിലും പ്രകോപനം ഉണ്ടായാല്‍ അതിനെ ശക്തമായി നേരിടാൻ സൈന്യം പൂർണ സജ്ജമാണെന്നും റഷ്യ വ്യക്തമാക്കിയിട്ടുണ്ട്.

റഷ്യയുടെ ഈ നീക്കത്തെ യുക്രെയ്നും പിന്തുടരുമെന്ന പ്രതീക്ഷയും ക്രെംലിൻ പ്രകടിപ്പിച്ചു. യുദ്ധം തുടർന്നുകൊണ്ടിരിക്കുന്ന സാഹചര്യത്തില്‍ ഇത്തരത്തിലുള്ള വെടിനിർത്തല്‍ പ്രഖ്യാപനങ്ങള്‍ മാനുഷിക സഹായ പ്രവർത്തനങ്ങള്‍ക്കും സാധാരണ ജനങ്ങളുടെ സുരക്ഷയ്‌ക്കും ഏറെ സഹായകരമാകുമെന്ന് അന്താരാഷ്‌ട്ര നിരീക്ഷകർ വിലയിരുത്തുന്നു.

Key Words : Vladimir Putin, Temporary Ceasefire, Ukraine