കുംഭമേള വൈറൽ പെൺകുട്ടിയുടെ വിവാഹം ഗൂഢാലോചന; എൻഐഎ അന്വേഷണം വേണമെന്ന് വിശ്വഹിന്ദു പരിഷത്ത്

കൊച്ചി: കുംഭമേളയിലൂടെ സോഷ്യൽ മീഡിയയിൽ വൈറലായ പെൺകുട്ടിയും ഉത്തർപ്രദേശ് സ്വദേശിയായ യുവാവും തമ്മിൽ കേരളത്തിൽ വെച്ച് നടന്ന വിവാഹത്തിന് പിന്നിൽ ...

കൊച്ചി: കുംഭമേളയിലൂടെ സോഷ്യൽ മീഡിയയിൽ വൈറലായ പെൺകുട്ടിയും ഉത്തർപ്രദേശ് സ്വദേശിയായ യുവാവും തമ്മിൽ കേരളത്തിൽ വെച്ച് നടന്ന വിവാഹത്തിന് പിന്നിൽ വൻ ഗൂഢാലോചനയുണ്ടെന്ന് വിശ്വഹിന്ദു പരിഷത്ത് (VHP). പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടുവന്ന് മതം മാറ്റി വിവാഹം കഴിപ്പിച്ചത് 'ലവ് ജിഹാദിന്റെ' ഭാഗമാണെന്നും ഇതിനെക്കുറിച്ച് ദേശീയ അന്വേഷണ ഏജൻസി (NIA) അന്വേഷിക്കണമെന്നും കൊച്ചിയിൽ നടന്ന വാർത്താ സമ്മേളനത്തിൽ വി.എച്ച്.പി നേതാക്കൾ ആവശ്യപ്പെട്ടു.

മധ്യപ്രദേശ് സ്വദേശിയായ പെൺകുട്ടിയെയും ഉത്തർപ്രദേശുകാരനായ ഫർമാൻ ഖാനെയും വിവാഹം കഴിപ്പിക്കാൻ കേരളം തിരഞ്ഞെടുത്തത് ദുരൂഹമാണെന്ന് വി.എച്ച്.പി ആരോപിക്കുന്നു. കേരളത്തിൽ ഇത്തരം പ്രവർത്തനങ്ങൾക്ക് രാഷ്ട്രീയ ഒത്താശ ലഭിക്കുന്നുണ്ടെന്നും, സംസ്ഥാനത്തെ ചില ഭരണകക്ഷി നേതാക്കൾ തന്നെ വിവാഹത്തിന് മുൻകൈ എടുത്തത് ഗൂഢാലോചനയുടെ ആഴം വ്യക്തമാക്കുന്നുണ്ടെന്നും സംഘടനാ ഭാരവാഹികൾ പറഞ്ഞു. നിർബന്ധിത മതപരിവർത്തനമാണ് ഇവിടെ നടന്നതെന്ന് വി.എച്ച്.പി സംശയിക്കുന്നു.

വിവാഹസമയത്ത് പെൺകുട്ടിക്ക് 18 വയസ്സ് തികഞ്ഞിരുന്നില്ല എന്ന ദേശീയ പട്ടികവർഗ കമ്മീഷന്റെ കണ്ടെത്തൽ വി.എച്ച്.പി ആയുധമാക്കുന്നുണ്ട്. മധ്യപ്രദേശിലെ ആശുപത്രി രേഖകൾ പ്രകാരം പെൺകുട്ടിക്ക് 16 വയസ്സ് മാത്രമേ പ്രായമുള്ളൂവെന്നും, വ്യാജ രേഖകൾ ചമച്ചാണ് കേരളത്തിൽ വിവാഹ രജിസ്‌ട്രേഷൻ നടത്തിയതെന്നും ഇവർ ആരോപിച്ചു. കുട്ടിക്കാലം മുതലുള്ള രേഖകൾ പരിശോധിക്കാതെ പെൺകുട്ടിക്ക് പ്രായപൂർത്തിയായെന്ന കേരള സർക്കാരിന്റെയും പോലീസിന്റെയും വാദം തെറ്റാണെന്നും നേതാക്കൾ ചൂണ്ടിക്കാട്ടി.

ശൈശവ വിവാഹത്തിന് ഒത്താശ ചെയ്ത സി.പി.എം സംസ്ഥാന സെക്രട്ടറി എം.വി. ഗോവിന്ദൻ, മന്ത്രി വി. ശിവൻകുട്ടി, എ.എ. റഹീം എം.പി എന്നിവർക്കെതിരെ പോക്‌സോ നിയമപ്രകാരം കേസെടുക്കണമെന്ന് വി.എച്ച്.പി ആവശ്യപ്പെട്ടു. ഉന്നതരായ രാഷ്ട്രീയ നേതാക്കൾ ഇതിൽ ഉൾപ്പെട്ടതിനാൽ കേരള പോലീസിന്റെ അന്വേഷണത്തിൽ വിശ്വാസമില്ലെന്നും, കേന്ദ്ര ഏജൻസികൾ തന്നെ കേസ് ഏറ്റെടുക്കണമെന്നുമാണ് സംഘടനയുടെ നിലപാട്. വരും ദിവസങ്ങളിൽ ഈ വിഷയത്തിൽ ശക്തമായ പ്രതിഷേധം സംഘടിപ്പിക്കാനും വി.എച്ച്.പി തീരുമാനിച്ചിട്ടുണ്ട്.

അതേസമയം, വിവാഹത്തിൽ ചട്ടലംഘനം നടന്നിട്ടില്ലെന്നും പെൺകുട്ടി സ്വമനസ്സാലെയാണ് എത്തിയതെന്നുമാണ് സർക്കാരിന്റെയും സി.പി.എമ്മിന്റെയും നിലപാട്. എന്നാൽ മധ്യപ്രദേശ് പോലീസ് ദമ്പതികൾക്കെതിരെ കേസെടുക്കുകയും കേരളത്തിലെത്തി മൊഴി രേഖപ്പെടുത്താൻ ശ്രമിക്കുകയും ചെയ്യുന്നത് കേസിൽ വലിയ വഴിത്തിരിവായിരിക്കുകയാണ്. നിലവിൽ കേരള ഹൈക്കോടതിയുടെ ഇടപെടൽ മൂലം അറസ്റ്റ് നടപടികൾ താൽക്കാലികമായി തടഞ്ഞിരിക്കുകയാണ്.

Key Words : Kumbh Mela Viral Girl, Marriage a conspiracy, Vishwa Hindu Parishad, NIA probe