ബെയ്റൂട്ട്: ലബനനിൽ ഇസ്രയേൽ സൈന്യത്തിന്റെ അതിശക്തമായ വ്യോമാക്രമണം. വെറും പത്തു മിനിറ്റിനുള്ളിൽ രാജ്യത്തെ നൂറിലധികം കേന്ദ്രങ്ങളിലാണ് ഇസ്രയേൽ യ...
ബെയ്റൂട്ട്: ലബനനിൽ ഇസ്രയേൽ സൈന്യത്തിന്റെ അതിശക്തമായ വ്യോമാക്രമണം. വെറും പത്തു മിനിറ്റിനുള്ളിൽ രാജ്യത്തെ നൂറിലധികം കേന്ദ്രങ്ങളിലാണ് ഇസ്രയേൽ യുദ്ധവിമാനങ്ങൾ ബോംബവർഷം നടത്തിയത്. ആക്രമണത്തിൽ നൂറിലധികം പേർ കൊല്ലപ്പെട്ടതായും നൂറുകണക്കിന് ആളുകൾക്ക് പരിക്കേറ്റതായും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
പ്രാദേശിക സമയം വൈകുന്നേരത്തോടെയാണ് ആക്രമണം ആരംഭിച്ചത്. സന്ദർഭത്തിനനുസരിച്ച് തിരിച്ചടിക്കാൻ പോലും സമയം നൽകാതെയാണ് ഇസ്രയേൽ വ്യോമസേന ലബനനിലെ വിവിധ നഗരങ്ങളെ ലക്ഷ്യമിട്ടത്. തലസ്ഥാനമായ ബെയ്റൂട്ട്, തെക്കൻ ലബനൻ, ബെഖാ താഴ്വര എന്നിവിടങ്ങളിലെ ജനവാസ മേഖലകളിലാണ് പ്രധാനമായും ബോംബുകൾ പതിച്ചത്. ഹിസ്ബുള്ളയുടെ കേന്ദ്രങ്ങളെ ലക്ഷ്യം വെച്ചായിരുന്നു ആക്രമണമെന്നാണ് ഇസ്രയേലിന്റെ അവകാശവാദം.
ആക്രമണത്തെത്തുടർന്ന് ലബനനിലെ ആരോഗ്യരംഗം കടുത്ത പ്രതിസന്ധിയിലായിരിക്കുകയാണ്. പരിക്കേറ്റവരെക്കൊണ്ട് ആശുപത്രികൾ നിറഞ്ഞുകവിഞ്ഞു. അടിയന്തരമായി രക്തം ദാനം ചെയ്യാൻ ലബനൻ ആരോഗ്യ മന്ത്രാലയം ജനങ്ങളോട് അഭ്യർത്ഥിച്ചു. തകർന്ന കെട്ടിടങ്ങൾക്കിടയിൽ ഇനിയും ആളുകൾ കുടുങ്ങിക്കിടക്കുന്നതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്നാണ് പ്രാഥമിക നിഗമനം.
അമേരിക്കയുടെയും ഇറാന്റെയും ഇടപെടലിലൂടെ പ്രഖ്യാപിച്ച രണ്ടാഴ്ചത്തെ താൽക്കാലിക വെടിനിർത്തൽ നിലവിൽ വന്നതിന് തൊട്ടുപിന്നാലെയാണ് ഇസ്രയേലിന്റെ ഈ ആക്രമണം എന്നത് ശ്രദ്ധേയമാണ്. ഈ വെടിനിർത്തൽ ലബനന് ബാധകമല്ലെന്നും തങ്ങളുടെ സുരക്ഷയ്ക്കായി ആക്രമണം തുടരുമെന്നും ഇസ്രയേൽ നേരത്തെ മുന്നറിയിപ്പ് നൽകിയിരുന്നു.
ഈ സംഭവം മിഡിൽ ഈസ്റ്റിൽ വീണ്ടും യുദ്ധഭീതി വർദ്ധിപ്പിച്ചിരിക്കുകയാണ്. ലോകരാജ്യങ്ങൾ ഈ ആക്രമണത്തിൽ ആശങ്ക രേഖപ്പെടുത്തിയിട്ടുണ്ട്.
Key Words : Israel, Lebanon, Bombings
COMMENTS