പലസ്തീൻകാർക്ക് വധശിക്ഷ; വിവാദ നിയമം പാസാക്കി ഇസ്രയേൽ പാർലമെൻ്റ്

ജെറുസലേം: ഇസ്രയേൽ പൗരന്മാരെ കൊലപ്പെടുത്തുന്ന പലസ്തീൻകാർക്ക് വധശിക്ഷ നൽകുന്നതിനുള്ള വിവാദ നിയമം ഇസ്രയേൽ പാർലമെന്റായ നെസെറ്റ് പാസാക്കി. തിങ്കള...

ജെറുസലേം: ഇസ്രയേൽ പൗരന്മാരെ കൊലപ്പെടുത്തുന്ന പലസ്തീൻകാർക്ക് വധശിക്ഷ നൽകുന്നതിനുള്ള വിവാദ നിയമം ഇസ്രയേൽ പാർലമെന്റായ നെസെറ്റ് പാസാക്കി. തിങ്കളാഴ്ച നടന്ന വോട്ടെടുപ്പിൽ 48-നെതിരെ 62 വോട്ടുകൾക്കാണ് ബില്ല് പാസാക്കിയത്.

പുതിയ നിയമപ്രകാരം, ഇസ്രയേൽ സൈനിക കോടതികൾ കുറ്റക്കാരെന്ന് കണ്ടെത്തുന്നവരെ തൂക്കിലേറ്റും. 'ഭീകരാക്രമണം' എന്ന് വിശേഷിപ്പിക്കപ്പെടുന്ന കൊലപാതകങ്ങളിൽ പ്രതികളാകുന്നവർക്ക് വധശിക്ഷ നൽകുന്നത് ഈ നിയമപ്രകാരം നിർബന്ധിതമാണ്. പ്രത്യേക സാഹചര്യങ്ങളിൽ കോടതിക്ക് ഇത് ജീവപര്യന്തമായി കുറയ്ക്കാമെങ്കിലും, പ്രതികൾക്ക് അപ്പീൽ നൽകാനോ മാപ്പിനായി അപേക്ഷിക്കാനോ അവകാശമുണ്ടാവില്ല. ശിക്ഷാവിധി വന്ന് 90 ദിവസത്തിനുള്ളിൽ വധശിക്ഷ നടപ്പിലാക്കണമെന്നും നിയമം വ്യവസ്ഥ ചെയ്യുന്നു.

പ്രധാനമന്ത്രി ബെഞ്ചമിൻ നെതന്യാഹു നിയമത്തെ പിന്തുണച്ചപ്പോൾ, പ്രതിപക്ഷം ഇതിനെതിരെ ശക്തമായ പ്രതിഷേധമുയർത്തി. യഹൂദ വിഭാഗത്തിൽപ്പെട്ടവർ സമാനമായ കുറ്റം ചെയ്താൽ ഈ ശിക്ഷാ നടപടി ബാധകമാവില്ലെന്നത് നിയമം വിവേചനപരമാണെന്ന വിമർശനത്തിന് വഴിവെച്ചിട്ടുണ്ട്.

ഐക്യരാഷ്ട്രസഭയും യൂറോപ്യൻ യൂണിയനും നിയമത്തെ ശക്തമായി അപലപിച്ചു. ഇത് അന്താരാഷ്ട്ര മനുഷ്യാവകാശ നിയമങ്ങളുടെ ലംഘനമാണെന്നും മേഖലയിൽ കൂടുതൽ സംഘർഷങ്ങൾക്ക് കാരണമാകുമെന്നും അവർ മുന്നറിയിപ്പ് നൽകി.

Key Words : Israeli Parliament, Death penalty , Palestinians