മദീന: ഈ വർഷത്തെ ഹജ്ജ് കർമ്മങ്ങൾക്കായി ഇന്ത്യൻ തീർത്ഥാടകരുടെ ആദ്യ സംഘം സൗദി അറേബ്യയിലെത്തി. മദീനയിലെ അമീർ മുഹമ്മദ് ബിൻ അബ്ദുൽ അസീസ് അന്താരാഷ്...
മദീന: ഈ വർഷത്തെ ഹജ്ജ് കർമ്മങ്ങൾക്കായി ഇന്ത്യൻ തീർത്ഥാടകരുടെ ആദ്യ സംഘം സൗദി അറേബ്യയിലെത്തി. മദീനയിലെ അമീർ മുഹമ്മദ് ബിൻ അബ്ദുൽ അസീസ് അന്താരാഷ്ട്ര വിമാനത്താവളത്തിലാണ് ഇന്ത്യയിൽ നിന്നുള്ള ആദ്യ വിമാനം ഇറങ്ങിയത്. പുണ്യഭൂമിയിലെത്തിയ ഹാജിമാരെ വരവേൽക്കാൻ വിപുലമായ ഒരുക്കങ്ങളാണ് സൗദി അധികൃതരും ഇന്ത്യൻ ഹജ്ജ് മിഷനും ചേർന്ന് വിമാനത്താവളത്തിൽ ഒരുക്കിയിരുന്നത്.
സൗദി ഹജ്ജ്-ഉംറ മന്ത്രാലയ പ്രതിനിധികളും ഉന്നത ഉദ്യോഗസ്ഥരും ചേർന്നാണ് തീർത്ഥാടകരെ സ്വീകരിച്ചത്. ഇന്ത്യൻ അംബാസഡർ ഡോ. സുഹൈൽ അജാസ് ഖാൻ, ജിദ്ദയിലെ ഇന്ത്യൻ കോൺസുൽ ജനറൽ ഫഹദ് അഹമ്മദ് ഖാൻ സൂരി, ഹജ്ജ് കോൺസൽ തുടങ്ങിയവർ നേരിട്ടെത്തി ഹാജിമാരെ അഭിവാദ്യം ചെയ്തു. പൂക്കളും ഈത്തപ്പഴവും നൽകി സ്വീകരിച്ച തീർത്ഥാടകർക്ക് വിമാനത്താവളത്തിലെ നടപടിക്രമങ്ങൾ വേഗത്തിൽ പൂർത്തിയാക്കാനുള്ള സൗകര്യങ്ങളും ഏർപ്പെടുത്തിയിരുന്നു.
ഇന്ത്യൻ ഹജ്ജ് മിഷന്റെ കീഴിലുള്ള വളണ്ടിയർമാരും ഉദ്യോഗസ്ഥരും ഹാജിമാരെ സഹായിക്കാൻ സജീവമായി രംഗത്തുണ്ട്. വിമാനത്താവളത്തിൽ നിന്നും തീർത്ഥാടകരെ അവർക്കായി നിശ്ചയിച്ചിട്ടുള്ള മദീനയിലെ താമസസ്ഥലങ്ങളിലേക്ക് പ്രത്യേക ബസുകളിലാണ് എത്തിച്ചത്. വരും ദിവസങ്ങളിൽ ഇന്ത്യയിലെ വിവിധ നഗരങ്ങളിൽ നിന്നുള്ള കൂടുതൽ വിമാനങ്ങൾ മദീനയിലും ജിദ്ദയിലുമായി എത്തുന്നതോടെ തീർത്ഥാടകരുടെ തിരക്ക് വർദ്ധിക്കും.
മദീനയിൽ എട്ടു ദിവസം താമസിക്കുന്ന തീർത്ഥാടകർ മസ്ജിദുന്നബവിയിലെ പ്രാർത്ഥനകൾക്കും സിയാറത്തുകൾക്കും ശേഷമാകും മക്കയിലേക്ക് തിരിക്കുക. തീർത്ഥാടകർക്ക് ആവശ്യമായ വൈദ്യസഹായം നൽകുന്നതിനായി മദീനയിലും മക്കയിലും ഇന്ത്യൻ ഹജ്ജ് മിഷൻ പ്രത്യേക ക്ലിനിക്കുകളും ഡിസ്പെൻസറികളും സജ്ജീകരിച്ചിട്ടുണ്ട്. മികച്ച രീതിയിലുള്ള താമസ സൗകര്യങ്ങളും യാത്രാ സൗകര്യങ്ങളുമാണ് ഇത്തവണ ഇന്ത്യൻ ഹാജിമാർക്കായി ഒരുക്കിയിരിക്കുന്നത്.
കോവിഡിന് ശേഷമുള്ള ഏറ്റവും വലിയ ഇന്ത്യൻ തീർത്ഥാടക സംഘമാണ് ഇത്തവണ ഹജ്ജിനായി എത്തുന്നത്. കേരളത്തിൽ നിന്നുള്ള ഹാജിമാരുടെ യാത്രയും വരും ദിവസങ്ങളിൽ ആരംഭിക്കും. തീർത്ഥാടകർക്ക് സുഗമമായ ഹജ്ജ് കർമ്മം ഉറപ്പാക്കാൻ സൗദി സർക്കാരും ഇന്ത്യൻ വിദേശകാര്യ മന്ത്രാലയവും സംയുക്തമായ പ്രവർത്തനങ്ങളാണ് നടത്തിവരുന്നത്.
Key Words : Hajj Pilgrims, Indians, Medina
COMMENTS