പഞ്ചാബിൽ എഎപി പിളർപ്പിലേക്ക്; എംപിമാർക്ക് പിന്നാലെ 60 എംഎൽഎമാരും ബിജെപിയിലേക്ക്?

ചണ്ഡീഗഢ്: പഞ്ചാബിലെ ആം ആദ്മി പാർട്ടി സർക്കാർ കടുത്ത രാഷ്ട്രീയ പ്രതിസന്ധിയിൽ. പാർട്ടിയുടെ ഏഴ് രാജ്യസഭാ എംപിമാർ ബിജെപിയിൽ ചേർന്നതിന് പിന്നാലെ,...

ചണ്ഡീഗഢ്: പഞ്ചാബിലെ ആം ആദ്മി പാർട്ടി സർക്കാർ കടുത്ത രാഷ്ട്രീയ പ്രതിസന്ധിയിൽ. പാർട്ടിയുടെ ഏഴ് രാജ്യസഭാ എംപിമാർ ബിജെപിയിൽ ചേർന്നതിന് പിന്നാലെ, ഭരണകക്ഷിയായ എഎപിയിലെ അറുപതിലധികം എംഎൽഎമാരും ബിജെപിയിലേക്ക് നീങ്ങുന്നതായി റിപ്പോർട്ടുകൾ. 2027-ൽ നിയമസഭാ തിരഞ്ഞെടുപ്പ് നടക്കാനിരിക്കെ ഭഗവന്ത് മാൻ സർക്കാരിന്റെ നിലനിൽപ്പ് തന്നെ അപകടത്തിലാക്കുന്ന നീക്കമാണിത്.

രാഘവ് ഛദ്ദയുടെ നേതൃത്വത്തിലുള്ള 7 രാജ്യസഭാ എംപിമാരാണ് കഴിഞ്ഞ ദിവസം എഎപി വിട്ട് ബിജെപിയിൽ ലയിച്ചത്. മൂന്നിൽ രണ്ട് ഭൂരിപക്ഷം ഉള്ളതിനാൽ ഇവർക്ക് അയോഗ്യത ഭീഷണി നിലവിലില്ല.

കൂറുമാറിയ എംപിമാർ നൽകുന്ന സൂചനയനുസരിച്ച്, 60-ഓളം എംഎൽഎമാർ ബിജെപി കേന്ദ്രനേതൃത്വവുമായി ചർച്ച നടത്തിക്കഴിഞ്ഞു. ഇവരും ഉടൻ തന്നെ പാർട്ടി വിടുമെന്നാണ് അവകാശവാദം. 117 അംഗ നിയമസഭയിൽ 92 സീറ്റുകളുമായാണ് എഎപി ഭരിക്കുന്നത്. 60 പേർ ഒഴിഞ്ഞാൽ സർക്കാർ ന്യൂനപക്ഷമാകാൻ സാധ്യതയുണ്ട്.

സംസ്ഥാനത്തെ രാഷ്ട്രീയ അനിശ്ചിതത്വം ചർച്ച ചെയ്യാൻ മുഖ്യമന്ത്രി ഭഗവന്ത് മാൻ രാഷ്ട്രപതി ദ്രൗപതി മുർമുവുമായി കൂടിക്കാഴ്ചയ്ക്ക് സമയം തേടിയിട്ടുണ്ട്.

ബിജെപി തങ്ങളുടെ എംഎൽഎമാരെ വിലയ്ക്കുവാങ്ങാൻ ശ്രമിക്കുകയാണെന്നും 'ഓപ്പറേഷൻ ലോട്ടസ്' ആണ് പഞ്ചാബിൽ നടക്കുന്നതെന്നും എഎപി നേതൃത്വം ആരോപിച്ചു. എന്നാൽ എഎപിയുടെ നയങ്ങളിലുള്ള അതൃപ്തിയാണ് കൂറുമാറ്റത്തിന് കാരണമെന്നാണ് ബിജെപിയുടെ നിലപാട്.

Key Words: AAP,  Punjab, MLA, BJP, MP