"ഹോർമുസ് കടലിടുക്കിൽ യുഎസ് പടക്കപ്പലുകൾ എണ്ണക്കപ്പലുകൾക്ക് അകമ്പടി സേവിക്കും'': ട്രംപ്

വാഷിംഗ്ടൺ: ലോകത്തെ പ്രധാന എണ്ണക്കടത്തു പാതകളിലൊന്നായ ഹോർമുസ് കടലിടുക്കിലൂടെയുള്ള എണ്ണക്കപ്പലുകൾക്ക് യുഎസ് നാവികസേനയുടെ സുരക്ഷാ അകമ്പടി ഉടൻ ആ...

വാഷിംഗ്ടൺ: ലോകത്തെ പ്രധാന എണ്ണക്കടത്തു പാതകളിലൊന്നായ ഹോർമുസ് കടലിടുക്കിലൂടെയുള്ള എണ്ണക്കപ്പലുകൾക്ക് യുഎസ് നാവികസേനയുടെ സുരക്ഷാ അകമ്പടി ഉടൻ ആരംഭിക്കുമെന്ന് പ്രസിഡന്റ് ഡൊണാൾഡ് ട്രംപ്. ഇറാനുമായുള്ള സംഘർഷം രൂക്ഷമായി തുടരുന്ന പശ്ചാത്തലത്തിലാണ് ട്രംപിന്റെ നിർണ്ണായക പ്രഖ്യാപനം. 

അമേരിക്കൻ സമയം വെള്ളിയാഴ്ച വൈകുന്നേരം മാധ്യമപ്രവർത്തകരോട് സംസാരിക്കവെയാണ് ട്രംപ് ഇക്കാര്യം വ്യക്തമാക്കിയത്. "കടലിടുക്കിൽ നാവികസേനയുടെ സുരക്ഷാ സേവനം ഉടൻ തന്നെ (Soon) നിലവിൽ വരും. ഇന്ന് ചില മേഖലകളിൽ നമ്മൾ വലിയ തിരിച്ചടികൾ നൽകിയിട്ടുണ്ട്," ട്രംപ് പറഞ്ഞു. എണ്ണക്കപ്പലുകളുടെ യാത്ര സുരക്ഷിതമാക്കാൻ ഇത് അനിവാര്യമാണെന്ന് അദ്ദേഹം കൂട്ടിച്ചേർത്തു. 

ഇറാനുമായുള്ള സൈനിക നീക്കം എത്രകാലം നീണ്ടുനിൽക്കുമെന്ന ചോദ്യത്തിന്, ആവശ്യമായ സമയം വരെ അത് തുടരുമെന്നായിരുന്നു പ്രസിഡന്റിന്റെ മറുപടി. "എനിക്ക് അതിനെക്കുറിച്ച് വ്യക്തമായ ധാരണയുണ്ട്. പക്ഷേ അത് ഇപ്പോൾ വെളിപ്പെടുത്തിയിട്ട് എന്ത് കാര്യം? ആവശ്യമുള്ളിടത്തോളം കാലം യുദ്ധം തുടരും. ഇറാന്റെ കരുത്ത് തകർന്നിരിക്കുകയാണ്. അവരുടെ രാജ്യം ഇപ്പോൾ തകർച്ചയുടെ വക്കിലാണ്," ട്രംപ് അവകാശപ്പെട്ടു. 

ഇറാൻ വിഷയത്തിൽ ചൈനീസ് പ്രസിഡന്റ് ഷി ജിൻപിങ്ങുമായി താൻ സംസാരിച്ചതായും ട്രംപ് വെളിപ്പെടുത്തി. വ്യാപാര ചർച്ചകൾക്കും മറ്റുമായി ഈ മാസാവസാനം ട്രംപ് ചൈന സന്ദർശിക്കാനിരിക്കുകയാണ്. ഇറാൻ സംഘർഷം ആഗോള വിപണിയെ ബാധിക്കാതിരിക്കാൻ ചൈനയുടെ സഹകരണം കൂടി ട്രംപ് ലക്ഷ്യമിടുന്നുണ്ടെന്നാണ് സൂചന. 

ഹോർമുസ് കടലിടുക്കിൽ ഇറാന്റെ ഭാഗത്തുനിന്നുള്ള ഭീഷണി നേരിടാൻ സഖ്യകക്ഷികളുമായി ചേർന്ന് കൂടുതൽ നടപടികൾ സ്വീകരിക്കുമെന്നും അമേരിക്കൻ ഭരണകൂടം വ്യക്തമാക്കിയിട്ടുണ്ട്.

Key Words : Strait of Hormuz , US Navy Escorts , Oil Tankers , Donald Trump