'ഈ വിസ്മയങ്ങൾ ഗൗരിയമ്മയുടെ കാലം മുതലുണ്ട്' സുധാകരന് കൈകൊടുത്തതിൽ കോൺഗ്രസിൽ പടലപ്പിണക്കം; നേതൃത്വത്തിനെതിരെ എം.ജെ. ജോബ്

ആലപ്പുഴ: മുൻ മന്ത്രി ജി. സുധാകരനെ പിന്തുണയ്ക്കാനുള്ള കോൺഗ്രസ് തീരുമാനത്തിനെതിരെ പാർട്ടിയിൽ പരസ്യമായ പ്രതിഷേധം. കെ.പി.സി.സി ജനറൽ സെക്രട്ടറി എ...

ആലപ്പുഴ: മുൻ മന്ത്രി ജി. സുധാകരനെ പിന്തുണയ്ക്കാനുള്ള കോൺഗ്രസ് തീരുമാനത്തിനെതിരെ പാർട്ടിയിൽ പരസ്യമായ പ്രതിഷേധം. കെ.പി.സി.സി ജനറൽ സെക്രട്ടറി എം.ജെ. ജോബ് നേതൃത്വത്തിനെതിരെ കടുത്ത വിമർശനവുമായി രംഗത്തെത്തി. കോൺഗ്രസ് പ്രവർത്തകരെ വിശ്വാസത്തിലെടുക്കാതെ എടുത്ത ഈ തീരുമാനം വലിയ വിഷമമുണ്ടാക്കുന്നതാണെന്ന് അദ്ദേഹം പറഞ്ഞു.

കോൺഗ്രസിന്റെ ചരിത്രത്തിൽ ഇത്തരം 'വിസ്മയങ്ങൾ' ഗൗരിയമ്മയുടെ കാലം മുതൽക്കേ ഉണ്ടെന്ന് അദ്ദേഹം പരിഹസിച്ചു. ഒരു വാക്കുപോലും പ്രവർത്തകരോട് ആലോചിക്കാതെയാണ് ഈ നിർണായക നീക്കം നടത്തിയത്. ജില്ലയിലെ നേതാക്കളെയോ പ്രവർത്തകരെയോ പരിഗണിക്കാൻ നേതൃത്വം തയ്യാറായില്ലെന്നും അദ്ദേഹം ആരോപിച്ചു.

അമ്പലപ്പുഴയിലെ തദ്ദേശസ്ഥാപനങ്ങളിൽ കോൺഗ്രസ് വിജയിച്ചത് ഒരു കമ്മ്യൂണിസ്റ്റുകാരന്റെയും സഹായത്തോടെയല്ല. സീറ്റ് കിട്ടാത്തതിലുള്ള മോഹഭംഗമല്ല തന്റെ പ്രതിഷേധത്തിന് പിന്നിലെന്നും, മറിച്ച് നേതൃത്വം കാണിക്കേണ്ട കുറഞ്ഞ പക്ഷം മര്യാദയും മാന്യതയും കാട്ടാത്തതിലാണ് പ്രതിഷേധമെന്നും എം.ജെ. ജോബ് വ്യക്തമാക്കി.

ജി. സുധാകരനുമായുള്ള സഹകരണം താഴെത്തട്ടിലുള്ള പ്രവർത്തകർക്കിടയിൽ വലിയ അതൃപ്തിക്ക് കാരണമായിട്ടുണ്ടെന്നാണ് ജോബിന്റെ പ്രതികരണം സൂചിപ്പിക്കുന്നത്. ഇത് പാർട്ടിയിൽ വലിയ ചർച്ചകൾക്ക് വഴി വെച്ചിട്ടുണ്ട്. 

Key Words : KR Gowri Amma, Congress, Controversy, G Sudhakaran,  M.J. Job