തിരുവനന്തപുരം: വികസന ചർച്ചകൾക്കായി മുഖ്യമന്ത്രി പിണറായി വിജയൻ ഉയർത്തിയ വെല്ലുവിളി ഏറ്റെടുത്ത് പ്രതിപക്ഷ നേതാവ് വി.ഡി. സതീശൻ. സംവാദത്തിനുള്ള ...
തിരുവനന്തപുരം: വികസന ചർച്ചകൾക്കായി മുഖ്യമന്ത്രി പിണറായി വിജയൻ ഉയർത്തിയ വെല്ലുവിളി ഏറ്റെടുത്ത് പ്രതിപക്ഷ നേതാവ് വി.ഡി. സതീശൻ. സംവാദത്തിനുള്ള സ്ഥലവും സമയവും മുഖ്യമന്ത്രിക്ക് തന്നെ തീരുമാനിക്കാമെന്നും അദ്ദേഹം പറയുന്നിടത്ത് താൻ എത്തുമെന്നും സതീശൻ വ്യക്തമാക്കി.
സർക്കാരിന്റെ വികസന നേട്ടങ്ങളെക്കുറിച്ച് പരസ്യ സംവാദത്തിന് തയ്യാറാണെന്ന് മുഖ്യമന്ത്രി ഫേസ്ബുക്ക് കുറിപ്പിലൂടെ അറിയിച്ചിരുന്നു. ഇതിന് മറുപടിയായാണ് പ്രതിപക്ഷ നേതാവിന്റെ പ്രതികരണം. "സംവാദത്തിന് തയ്യാറാണെന്ന് മുഖ്യമന്ത്രി പറഞ്ഞ സ്ഥിതിക്ക് ഇനി സ്ഥലവും സമയവും കൂടി അദ്ദേഹത്തിന് തീരുമാനിക്കാം. പറയുന്ന സ്ഥലത്ത് പറഞ്ഞ സമയത്ത് ഞാനെത്തും. ബാക്കി കാര്യങ്ങൾ ജനങ്ങൾ തീരുമാനിക്കട്ടെ," എന്ന് സതീശൻ പറഞ്ഞു.
കഴിഞ്ഞ കുറച്ചു ദിവസങ്ങളായി വികസന വിഷയങ്ങളിൽ ഭരണ-പ്രതിപക്ഷ നേതാക്കൾ തമ്മിൽ രൂക്ഷമായ വാക്പോര് നടന്നു വരികയായിരുന്നു. സർക്കാരിന്റെ 'പ്രോഗ്രസ് കാർഡ്' മുൻനിർത്തിയാണ് മുഖ്യമന്ത്രി സതീശനെ സംവാദത്തിന് ക്ഷണിച്ചത്. എന്നാൽ സഭയ്ക്കകത്ത് ഉന്നയിക്കുന്ന ചോദ്യങ്ങൾക്ക് മറുപടി നൽകാതെ മുഖ്യമന്ത്രി ഒളിച്ചോടുകയാണെന്ന് പ്രതിപക്ഷം നേരത്തെ ആരോപിച്ചിരുന്നു. ഇരുനേതാക്കളും സംവാദത്തിന് സന്നദ്ധത പ്രകടിപ്പിച്ചതോടെ വരും ദിവസങ്ങളിൽ കേരള രാഷ്ട്രീയം ഈ പോരാട്ടത്തിന് സാക്ഷ്യം വഹിക്കുമോ എന്ന് കാത്തിരുന്ന് കാണാം.
COMMENTS