യുദ്ധം അവസാനിപ്പിക്കാൻ മൂന്ന് നിബന്ധനകളുമായി ഇറാൻ പ്രസിഡന്റ്

ദുബായ്:  യുദ്ധം അവസാനിപ്പിക്കാൻ ഇറാൻ പ്രസിഡന്റ്  മസൂദ് പെസെഷ്കിയാൻ  മൂന്ന് പ്രധാന ആവശ്യങ്ങൾ മുന്നോട്ടുവെച്ചു. ഈ ആവശ്യങ്ങൾ അംഗീകരിച്ചാൽ മാത്ര...

ദുബായ്:  യുദ്ധം അവസാനിപ്പിക്കാൻ ഇറാൻ പ്രസിഡന്റ് മസൂദ് പെസെഷ്കിയാൻ മൂന്ന് പ്രധാന ആവശ്യങ്ങൾ മുന്നോട്ടുവെച്ചു. ഈ ആവശ്യങ്ങൾ അംഗീകരിച്ചാൽ മാത്രമേ സമാധാന ചർച്ചകൾക്ക് സാധ്യതയുള്ളൂ എന്നാണ് സൂചന.

1. ഇറാന്റെ നിയമാനുസൃതമായ അവകാശങ്ങൾ അംഗീകരിക്കുക. 

2. യുദ്ധനഷ്ടപരിഹാരം നൽകുക.

3. ഭാവിയിൽ അധിനിവേശങ്ങൾ ഉണ്ടാകില്ലെന്ന് ഉറപ്പുവരുത്തുന്ന ശക്തമായ അന്താരാഷ്ട്ര ഗ്യാരണ്ടികൾ നൽകുക.

സയണിസ്റ്റ് ഭരണകൂടവും അമേരിക്കയും ചേർന്ന് കൊളുത്തിവിട്ട ഈ യുദ്ധം അവസാനിപ്പിക്കാനുള്ള ഏക വഴി ഇതാണെന്ന് എന്ന് അദ്ദേഹം എക്സിൽ കുറിച്ചു. 

മേഖലയിലെ സാമ്പത്തിക-സൈനിക കേന്ദ്രങ്ങൾക്കെതിരെ ഇറാൻ തിരിച്ചടി തുടരുന്നതിനിടയിൽ, സമാധാനത്തോടുള്ള ഇറാന്റെ പ്രതിബദ്ധത ആവർത്തിക്കാൻ താൻ റഷ്യൻ, പാകിസ്ഥാൻ നേതാക്കളുമായി സംസാരിച്ചതായും പ്രസിഡന്റ് വ്യക്തമാക്കി. ഇതിനിടെ, പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് വ്യാഴാഴ്ച സൗദി അറേബ്യയിൽ ഹ്രസ്വ സന്ദർശനം നടത്തി.

അതേസമയം, ഇറാൻ ഏർപ്പെടുത്തിയ ഉപരോധത്തെത്തുടർന്ന് രാജ്യാന്തര വിപണിയിൽ ക്രൂഡ് ഓയിൽ വില ബാരലിന് 100 ഡോളറിന് മുകളിലെത്തിക്കഴിഞ്ഞു. ലോകത്തെ പ്രതിദിന എണ്ണ ഉൽപ്പാദനത്തിന്റെ അഞ്ചിലൊന്നും കടന്നുപോകുന്ന ഈ തന്ത്രപ്രധാന പാത തടസ്സപ്പെട്ടത് ആഗോളതലത്തിൽ വലിയ വിതരണ പ്രതിസന്ധിയാണ് സൃഷ്ടിച്ചിരിക്കുന്നത്.

പ്രതിദിനം 1.5 കോടി ബാരൽ ക്രൂഡ് ഓയിൽ വിപണിയിലെത്താതെ തടയപ്പെട്ടിരിക്കുന്നു. കയറ്റുമതി തടസ്സപ്പെട്ടതോടെ ഗൾഫ് രാജ്യങ്ങൾ പ്രതിദിന ഉൽപ്പാദനത്തിൽ 1 കോടി ബാരലിന്റെ കുറവ് വരുത്തി. കടലിടുക്കിലൂടെ സഞ്ചരിക്കാൻ ശ്രമിച്ച കപ്പലുകൾക്ക് നേരെ കഴിഞ്ഞ ദിവസമുണ്ടായ ആക്രമണം നിക്ഷേപകരെ കൂടുതൽ ആശങ്കയിലാഴ്ത്തി.

"ലോക എണ്ണ വിപണിയുടെ ചരിത്രത്തിലെ ഏറ്റവും വലിയ വിതരണ തടസ്സമാണ് ഈ യുദ്ധം മൂലം ഉണ്ടായിരിക്കുന്നത്," എന്ന് അന്താരാഷ്ട്ര ഊർജ്ജ ഏജൻസി (IEA) മുന്നറിയിപ്പ് നൽകി. ഇറാൻ മുന്നോട്ടുവെച്ച ആവശ്യങ്ങളോട് അന്താരാഷ്ട്ര സമൂഹം എങ്ങനെ പ്രതികരിക്കും എന്നതിനെ ആശ്രയിച്ചിരിക്കും വരും ദിവസങ്ങളിലെ എണ്ണവിലയും ആഗോള സാമ്പത്തിക സ്ഥിതിയും.

Key Words : Severe Crisis , Strait of Hormuz, Iranian President , Iran war