മകൻ ജേസൺ സഞ്ജയ് ഇൻസ്റ്റാഗ്രാമിൽ വിജയ്യെ അൺഫോളോ ചെയ്തെന്ന് റിപ്പോർട്ട്, രണ്ട് ചേരിയായി സോഷ്യൽ മീഡിയ

ചെന്നൈ : തമിഴ് സൂപ്പർതാരവും രാഷ്ട്രീയ നേതാവുമായ വിജയിയും ഭാര്യ സംഗീത സോർണലിംഗവും തമ്മിലുള്ള വിവാഹമോചന വാർത്തകൾക്ക് പിന്നാലെ, മകൻ ജേസൺ സഞ്ജയ്...

ചെന്നൈ : തമിഴ് സൂപ്പർതാരവും രാഷ്ട്രീയ നേതാവുമായ വിജയിയും ഭാര്യ സംഗീത സോർണലിംഗവും തമ്മിലുള്ള വിവാഹമോചന വാർത്തകൾക്ക് പിന്നാലെ, മകൻ ജേസൺ സഞ്ജയ് ഇൻസ്റ്റാഗ്രാമിൽ അച്ഛനെ അൺഫോളോ ചെയ്തെന്ന റിപ്പോർട്ടുകൾ സോഷ്യൽ മീഡിയയിൽ വ്യാപകമായി പ്രചരിക്കുന്നു.

ഫെബ്രുവരി 27-നാണ് സംഗീത സമർപ്പിച്ച വിവാഹമോചന ഹർജിയുടെ വിവരങ്ങൾ പുറത്തുവന്നത്. 27 വർഷത്തെ ദാമ്പത്യം അവസാനിപ്പിക്കണമെന്ന് ആവശ്യപ്പെട്ട് ചെങ്കൽപേട്ട് ജില്ലാ കോടതിയിലാണ് സംഗീത ഹർജി നൽകിയിരിക്കുന്നത്.

വിവാഹമോചന വാർത്തകൾക്ക് പിന്നാലെ ജേസൺ സഞ്ജയ് അച്ഛനെ ഇൻസ്റ്റാഗ്രാമിൽ പിന്തുടരുന്നില്ലെന്ന് ആരാധകർ ശ്രദ്ധിച്ചു. ജേസൺ നടൻ വിജയ് സേതുപതി ഉൾപ്പെടെയുള്ള 35 പേരെ പിന്തുടരുന്നുണ്ടെങ്കിലും പട്ടികയിൽ വിജയിയുടെ പേരില്ലെന്ന് കാണിക്കുന്ന സ്ക്രീൻഷോട്ടുകൾ വൈറലായി. അമ്മയ്ക്ക് പിന്തുണ നൽകുന്ന മാന്യനായ യുവാവാണ് സഞ്ജയ് എന്ന തരത്തിലുള്ള കമന്റുകളും സോഷ്യൽ മീഡിയയിൽ നിറഞ്ഞു.

എന്നാൽ, സഞ്ജയ് നേരത്തെ തന്നെ വിജയിയെയോ അദ്ദേഹത്തിന്റെ രാഷ്ട്രീയ പാർട്ടിയായ തമിഴക വെട്രി കഴകത്തെയോ (TVK) ഇൻസ്റ്റാഗ്രാമിൽ പിന്തുടർന്നിരുന്നില്ലെന്നും, വിവാഹമോചന വാർത്തകൾ വന്നതോടെ ചിലർ ഇത് മനഃപൂർവ്വം പ്രചരിപ്പിക്കുകയാണെന്നും ഒരു വിഭാഗം ആരാധകർ വാദിക്കുന്നുണ്ട്. നിലവിൽ സന്ദീപ് കിഷൻ നായകനാകുന്ന 'സിഗ്മ' എന്ന ചിത്രത്തിന്റെ സംവിധാന തിരക്കുകളിലാണ് ജേസൺ സഞ്ജയ്.

വിജയിക്കെതിരെ ഗുരുതരമായ ആരോപണങ്ങളാണ് സംഗീത ഹർജിയിൽ ഉന്നയിച്ചിരിക്കുന്നത്. വിജയിക്ക് മറ്റൊരു നടിയുമായി വിവാഹേതര ബന്ധമുണ്ടെന്നും, ഇത് തനിക്ക് കടുത്ത മാനസിക പീഡനത്തിനും അവഗണനയ്ക്കും കാരണമായെന്നും സംഗീത ആരോപിക്കുന്നു. 2021 മുതൽ വിജയ് വൈകാരികമായി അകൽച്ചയിലാണെന്നും വാക്കുകൾ കൊണ്ട് തന്നെ അപമാനിക്കാറുണ്ടെന്നും ഹർജിയിൽ പറയുന്നു. കുടുംബത്തിന്റെ സ്വകാര്യത കണക്കിലെടുത്ത് കോടതി നടപടികൾ രഹസ്യമായി (Camera Proceedings) നടത്തണമെന്നും അവർ ആവശ്യപ്പെട്ടു. തങ്ങളുടെ മക്കളായ ജേസൺ സഞ്ജയിനും ദിവ്യ സാഷയ്ക്കും ഈ സാഹചര്യങ്ങൾ സുഹൃത്തുക്കൾക്കിടയിൽ വലിയ നാണക്കേടുണ്ടാക്കിയെന്നും സംഗീത ചൂണ്ടിക്കാട്ടി. പ്രശ്നങ്ങൾ പരിഹരിക്കാനായി 2024 ഓഗസ്റ്റ് മുതൽ 2025 ഫെബ്രുവരി വരെ നോട്ടിസുകൾ അയച്ചെങ്കിലും ഫലമുണ്ടായില്ല. 1998-ൽ ലണ്ടനിൽ വെച്ചും തുടർന്ന് 1999-ൽ ഇന്ത്യയിൽ വെച്ചുമായിരുന്നു ഇരുവരുടെയും വിവാഹം നടന്നത്. നിലവിൽ ദാമ്പത്യം വീണ്ടെടുക്കാൻ കഴിയാത്തവിധം തകർന്നുവെന്നും സംഗീത ഹർജിയിൽ വ്യക്തമാക്കുന്നു.

Key Words : Jason Sanjay, Actor Vijay, Instagram, Social Media