വിവാദമായി മോണലിസയുടെ വിവാഹം: മകളെ തട്ടിക്കൊണ്ടുപോയെന്ന് പിതാവ്; ഇടപെടണമെന്നാവശ്യപ്പെട്ട് മധ്യപ്രദേശ് മുഖ്യമന്ത്രിക്ക് പരാതി

തിരുവനന്തപുരം: കുംഭമേളയിലെ വൈറൽ വീഡിയോകളിലൂടെ പ്രശസ്തയായ മധ്യപ്രദേശ് സ്വദേശിനി മോണലിസ ഭോസ്‌ലെ കേരളത്തിൽ വെച്ച് വിവാഹിതയായ സംഭവത്തിൽ നാടകീയ ന...

തിരുവനന്തപുരം: കുംഭമേളയിലെ വൈറൽ വീഡിയോകളിലൂടെ പ്രശസ്തയായ മധ്യപ്രദേശ് സ്വദേശിനി മോണലിസ ഭോസ്‌ലെ കേരളത്തിൽ വെച്ച് വിവാഹിതയായ സംഭവത്തിൽ നാടകീയ നീക്കങ്ങൾ. മകളെ മതംമാറ്റാനായി തട്ടിക്കൊണ്ടുപോയതാണെന്ന് ആരോപിച്ച് പിതാവ് ജയസിങ് ഭോസ്‌ലെ മധ്യപ്രദേശ് മുഖ്യമന്ത്രി മോഹൻ യാദവിനെ സമീപിച്ചു. തന്റെ മകളെ സുരക്ഷിതമായി തിരിച്ചെത്തിക്കാൻ അടിയന്തരമായി ഇടപെടണമെന്ന് അദ്ദേഹം ആവശ്യപ്പെട്ടു.

ഉത്തർപ്രദേശ് സ്വദേശിയായ ഫർമാൻ ഖാനുമായാണ് മോണലിസയുടെ വിവാഹം നടന്നത്. കഴിഞ്ഞ ദിവസം നെയ്യാറ്റിൻകരയിലെ അരുമാനൂർ നയനാർ ദേവക്ഷേത്രത്തിൽ വെച്ച് ഹിന്ദു ആചാരപ്രകാരമായിരുന്നു വിവാഹച്ചടങ്ങുകൾ. ഈ വിവാഹം തന്റെ സമ്മതമില്ലാതെ നടന്നതാണെന്നും മകളെ നിർബന്ധപൂർവ്വം മതംമാറ്റാൻ ശ്രമിക്കുന്നുവെന്നുമാണ് പിതാവിന്റെ പ്രധാന ആരോപണം.

എന്നാൽ, പിതാവിന്റെ ആരോപണങ്ങൾ മോണലിസ പൂർണ്ണമായും തള്ളി. തനിക്ക് 18 വയസ്സ് പൂർത്തിയായെന്നും സ്വന്തം ഇഷ്ടപ്രകാരമാണ് ഫർമാനെ വിവാഹം കഴിച്ചതെന്നും അവർ മാധ്യമങ്ങളോട് പറഞ്ഞു. താൻ മതം മാറിയിട്ടില്ലെന്നും ഹിന്ദു ആചാരപ്രകാരമാണ് വിവാഹം നടന്നതെന്നും മോണലിസ വ്യക്തമാക്കി. സിനിമ ലൊക്കേഷനിൽ നിന്ന് തന്നെ നിർബന്ധിച്ച് കൊണ്ടുപോകാൻ പിതാവ് ശ്രമിച്ചപ്പോൾ തമ്പാനൂർ പോലീസിൽ അഭയം തേടുകയായിരുന്നുവെന്നും അവർ കൂട്ടിച്ചേർത്തു.

വിവാഹ ചടങ്ങിൽ സിപിഎം സംസ്ഥാന സെക്രട്ടറി എം.വി. ഗോവിന്ദൻ, മന്ത്രി വി. ശിവൻകുട്ടി തുടങ്ങിയ പ്രമുഖർ പങ്കെടുത്തിരുന്നു. മോണലിസയ്ക്ക് പ്രായപൂർത്തിയായതിനാൽ സ്വന്തം ഇഷ്ടപ്രകാരം ജീവിക്കാൻ അവകാശമുണ്ടെന്ന നിലപാടിലാണ് കേരള പോലീസ്. പിതാവ് മുഖ്യമന്ത്രിക്ക് പരാതി നൽകിയ സാഹചര്യത്തിൽ മധ്യപ്രദേശ് സർക്കാരിന്റെ ഭാഗത്തുനിന്നുള്ള അടുത്ത നീക്കങ്ങൾക്കായി കാത്തിരിക്കുകയാണ് എല്ലാവരും.

Key Words : Mona Lisa, Viral Girl, Viral Wedding, Controversy, Kidnap Complaint