യുഎഇയിൽ മിസൈൽ, ഡ്രോൺ ആക്രമണം: അബുദാബിയിൽ ഒരാൾ കൊല്ലപ്പെട്ടു; ദുബായ് വിമാനത്താവളം താത്കാലികമായി അടച്ചു

അബുദാബി: യുണൈറ്റഡ് അറബ് എമിറേറ്റ്‌സിലെ വിവിധ ഭാഗങ്ങളിൽ ഇന്നുണ്ടായ മിസൈൽ, ഡ്രോൺ ആക്രമണങ്ങളിൽ ഒരാൾ കൊല്ലപ്പെട്ടു. അബുദാബിയിലെ അൽ ബഹിയ മേഖലയിൽ ...

അബുദാബി: യുണൈറ്റഡ് അറബ് എമിറേറ്റ്‌സിലെ വിവിധ ഭാഗങ്ങളിൽ ഇന്നുണ്ടായ മിസൈൽ, ഡ്രോൺ ആക്രമണങ്ങളിൽ ഒരാൾ കൊല്ലപ്പെട്ടു. അബുദാബിയിലെ അൽ ബഹിയ മേഖലയിൽ സിവിലിയൻ വാഹനത്തിന് മുകളിൽ മിസൈൽ പതിച്ചാണ് പലസ്തീൻ സ്വദേശിയായ ഒരാൾ കൊല്ലപ്പെട്ടത്. ആക്രമണത്തെത്തുടർന്ന് ദുബായ് അന്താരാഷ്ട്ര വിമാനത്താവളത്തിന്റെ പ്രവർത്തനം മണിക്കൂറുകളോളം തടസ്സപ്പെട്ടു.

ദുബായിൽ ഡ്രോൺ ആക്രമണം

ദുബായ് അന്താരാഷ്ട്ര വിമാനത്താവളത്തിന് സമീപമുള്ള ഇന്ധന ടാങ്കിന് നേരെയാണ് ഡ്രോൺ ആക്രമണമുണ്ടായത്. ആക്രമണത്തെത്തുടർന്ന് ടാങ്കിന് തീപിടിക്കുകയും വിമാനത്താവളത്തിലേക്കുള്ള സർവീസുകൾ നിർത്തിവെക്കുകയും ചെയ്തു. ദുബായ് സിവിൽ ഡിഫൻസ് ഉദ്യോഗസ്ഥർ ഉടൻ തന്നെ സ്ഥലത്തെത്തി തീ നിയന്ത്രണവിധേയമാക്കി. സംഭവത്തിൽ ആർക്കും പരിക്കേറ്റിട്ടില്ലെന്നും സിവിൽ ഏവിയേഷൻ വിഭാഗം അറിയിച്ചു.

മറ്റ് എമിറേറ്റുകളിലും നാശനഷ്ടങ്ങൾ

അബുദാബിക്കും ദുബായിക്കും പുറമെ ഫുജൈറയിലും ഉമ്മുൽ ഖുവൈനിലും ആക്രമണങ്ങൾ റിപ്പോർട്ട് ചെയ്തിട്ടുണ്ട്. ഫുജൈറയിലെ ഓയിൽ ഇൻഡസ്ട്രി സോണിലെ ഇന്ധന ടാങ്കുകൾക്ക് തീപിടിച്ചു. ഉമ്മുൽ ഖുവൈനിൽ ഡ്രോൺ പതിച്ച് ഒരു കെട്ടിടത്തിന് നാശനഷ്ടങ്ങൾ സംഭവിച്ചു.

ഇറാനിൽ നിന്നാണ് ആക്രമണമുണ്ടായതെന്ന് യുഎഇ പ്രതിരോധ മന്ത്രാലയം സ്ഥിരീകരിച്ചു. കഴിഞ്ഞ ദിവസങ്ങളിലായി രാജ്യത്തിന് നേരെ വന്ന നാല് ബാലിസ്റ്റിക് മിസൈലുകളും ആറ് ഡ്രോണുകളും പ്രതിരോധ സംവിധാനങ്ങൾ ഉപയോഗിച്ച് തകർത്തതായും മന്ത്രാലയം വ്യക്തമാക്കി. സ്ഥിതിഗതികൾ നിയന്ത്രണവിധേയമാണെന്നും വ്യാജ വാർത്തകൾ പ്രചരിപ്പിക്കരുതെന്നും അധികൃതർ പൊതുജനങ്ങളോട് അഭ്യർത്ഥിച്ചു.

Key Words : Missile, Drone Attack, UAE, Abu Dhabi, Dubai Airport