മുൻ കേന്ദ്ര മന്ത്രി കെ പി ഉണ്ണികൃഷ്ണൻ അന്തരിച്ചു

കോഴിക്കോട്: കോൺഗ്രസ് നേതാവും മുൻ കേന്ദ്രമന്ത്രിയുമായ കെ.പി. ഉണ്ണികൃഷ്ണൻ (89) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് കോഴിക്കോട്ടെ സ്...

കോഴിക്കോട്: കോൺഗ്രസ് നേതാവും മുൻ കേന്ദ്രമന്ത്രിയുമായ കെ.പി. ഉണ്ണികൃഷ്ണൻ (89) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് കോഴിക്കോട്ടെ സ്വകാര്യ ആശുപത്രിയിൽ ചികിത്സയിലിരിക്കെ ഇന്ന്  പുലർച്ചെയായിരുന്നു അന്ത്യം.

കേരള രാഷ്ട്രീയത്തിലും ദേശീയ തലത്തിലും  വ്യക്തിമുദ്ര പതിച്ച  അദ്ദേഹം വടകര ലോക്‌സഭാ മണ്ഡലത്തിൽ നിന്ന് തുടർച്ചയായി 6 തവണ (1971 മുതൽ 1991 വരെ) തിരഞ്ഞെടുക്കപ്പെട്ട് റെക്കോർഡിട്ടു.

 വി.പി. സിംഗ് മന്ത്രിസഭയിൽ ഉപരിതല ഗതാഗതം, ടെലികോം എന്നീ വകുപ്പുകളുടെ ചുമതലയുള്ള ക്യാബിനറ്റ് മന്ത്രിയായിരുന്നു.

 ഗൾഫ് യുദ്ധകാലത്ത് വിദേശത്ത് കുടുങ്ങിയ ആയിരക്കണക്കിന് പ്രവാസികളെ സുരക്ഷിതമായി നാട്ടിലെത്തിക്കുന്നതിൽ നിർണ്ണായക പങ്കുവഹിച്ചു.

രാജീവ് ഗാന്ധി സർക്കാരിന്റെ കാലത്ത് ബൊഫോഴ്സ് അഴിമതിയും വളം കുംഭകോണവും പാർലമെന്റിൽ ഉന്നയിക്കുന്നതിൽ അദ്ദേഹം മുൻപന്തിയിലുണ്ടായിരുന്നു.

രാഷ്ട്രീയത്തിൽ സജീവമാകുന്നതിന് മുൻപ് 'ടൈംസ് ഒഫ് ഇന്ത്യ', 'മാതൃഭൂമി', 'ശങ്കേഴ്സ് വീക്കിലി' തുടങ്ങിയ  മാധ്യമങ്ങളിൽ പത്രപ്രവർത്തകനായി ജോലി ചെയ്തിരുന്നു.
 

1978-ൽ കോൺഗ്രസ് പിളർന്നപ്പോൾ അദ്ദേഹം എ.ഐ.സി.സി (യു), എ.ഐ.സി.സി (എസ്) വിഭാഗങ്ങളിൽ ഉറച്ചുനിന്നു. നീണ്ട കാലത്തെ ഇടവേളയ്ക്ക് ശേഷം 1993-ലാണ് ഔദ്യോഗികമായി കോൺഗ്രസിൽ തിരിച്ചെത്തിയത്.

സംസ്‌കാരം നാളെ (ബുധനാഴ്ച) രാവിലെ 9 മണിക്ക് നടക്കും.