ഖമേനിക്കുപിന്നാലെയല്ല, ഒപ്പമായിരുന്നു ഇസ്രയേൽ; ജീവനെടുത്തത് പകൽവെളിച്ചത്തിൽ, എല്ലാം 60 സെക്കൻ്റിനുള്ളിൽ, ട്രാഫിക് ക്യാമറകൾ ഹാക്ക് ചെയ്ത് നിർണായക നീക്കം

ന്യൂഡൽഹി: ഇറാൻ്റെ പരമോന്നത നേതാവ് ആയത്തുള്ള അലി ഖമേനിയെ വധിക്കുന്നതിനായി ഇസ്രായേൽ വർഷങ്ങളോളം നീണ്ട അതീവ രഹസ്യമായ നീക്കങ്ങളാണ് നടത്തിയതെന്ന് ...

ന്യൂഡൽഹി: ഇറാൻ്റെ പരമോന്നത നേതാവ് ആയത്തുള്ള അലി ഖമേനിയെ വധിക്കുന്നതിനായി ഇസ്രായേൽ വർഷങ്ങളോളം നീണ്ട അതീവ രഹസ്യമായ നീക്കങ്ങളാണ് നടത്തിയതെന്ന് ഫിനാൻഷ്യൽ ടൈംസ് റിപ്പോർട്ട് ചെയ്തു. ഇറാന്റെ തലസ്ഥാനമായ ടെഹ്‌റാനിലെ ട്രാഫിക് ക്യാമറ ശൃംഖലകൾ ഹാക്ക് ചെയ്തും മൊബൈൽ ഫോൺ സംവിധാനങ്ങളിൽ നുഴഞ്ഞുകയറിയുമാണ് ഖമേനിയുടെയും അദ്ദേഹത്തിന്റെ സുരക്ഷാ ഉദ്യോഗസ്ഥരുടെയും നീക്കങ്ങൾ ഇസ്രായേൽ നിരീക്ഷിച്ചത്. നിലവിലുള്ളതും വിരമിച്ചതുമായ ഇസ്രായേൽ രഹസ്യാന്വേഷണ ഉദ്യോഗസ്ഥരെ ഉദ്ധരിച്ചാണ് ഫിനാൻഷ്യൽ ടൈംസ് ഈ വിവരങ്ങൾ പുറത്തുവിട്ടത്.

ടെഹ്‌റാനിലെ ഏതാണ്ട് എല്ലാ ട്രാഫിക് ക്യാമറകളും വർഷങ്ങളായി ഇസ്രായേലിന്റെ നിയന്ത്രണത്തിലായിരുന്നുവെന്നാണ് റിപ്പോർട്ട്. ഈ ക്യാമറകളിൽ നിന്നുള്ള ദൃശ്യങ്ങൾ എൻക്രിപ്റ്റ് ചെയ്ത് ടെൽ അവീവിലേക്കും തെക്കൻ ഇസ്രായേലിലെ സെർവറുകളിലേക്കും നേരിട്ട് അയക്കുകയായിരുന്നു. ടെഹ്‌റാനിലെ പാസ്ചർ സ്ട്രീറ്റിലുള്ള ഖമേനിയുടെ വസതിക്ക് സമീപമുള്ള ദൃശ്യങ്ങൾ ഇസ്രായേലിന് ഏറ്റവും നിർണ്ണായകമായി. ബോഡിഗാർഡുകൾ അവരുടെ സ്വകാര്യ വാഹനങ്ങൾ എവിടെയാണ് പാർക്ക് ചെയ്യുന്നതെന്നും വസതിക്കുള്ളിലെ ദൈനംദിന ദിനചര്യകൾ എന്താണെന്നും മനസ്സിലാക്കാൻ ഈ ദൃശ്യങ്ങൾ സഹായിച്ചു.

ഖമേനിയുടെ ദിനചര്യകൾ, താമസസ്ഥലം, സന്ദർശകർ, ആശയവിനിമയ രീതികൾ എന്നിവ അമേരിക്കൻ-ഇസ്രായേൽ രഹസ്യാന്വേഷണ ഏജൻസികൾ സൂക്ഷ്മമായി പഠിച്ചിരുന്നു. ഖമേനിക്കൊപ്പം മറ്റ് മുതിർന്ന രാഷ്ട്രീയ-സൈനിക നേതാക്കളും ഒത്തുചേരുന്ന സമയത്തിനായി അവർ കാത്തിരിക്കുകയായിരുന്നു. സാധാരണയായി ഒരിടത്ത് ഒത്തുചേരാത്ത ഇറാന്റെ ഉന്നത ഉദ്യോഗസ്ഥരെല്ലാം ശനിയാഴ്ച രാവിലെ ടെഹ്‌റാനിലെ കോമ്പൗണ്ടിൽ യോഗം ചേരാൻ തീരുമാനിച്ചിരുന്നു. സുപ്രീം നേതാവിന്റെ ഓഫീസും പ്രസിഡൻസിയും ദേശീയ സുരക്ഷാ കാര്യാലയങ്ങളും സ്ഥിതി ചെയ്യുന്ന അതീവ സുരക്ഷാ മേഖലയാണിത്. ആദ്യം രാത്രിയിൽ ആക്രമണം നടത്താനായിരുന്നു പദ്ധതിയെങ്കിലും പിന്നീട് അത് പകൽ സമയത്തേക്ക് മാറ്റുകയായിരുന്നു. ശനിയാഴ്ച ഇസ്രായേൽ സമയം രാവിലെ 6 മണിയോടെ യുദ്ധവിമാനങ്ങൾ അതീവ കൃത്യതയാർന്ന മിസൈലുകൾ (Precision-guided munitions) ലക്ഷ്യസ്ഥാനത്തേക്ക് തൊടുത്തു. അമേരിക്കയും ഇസ്രായേലും സംയുക്തമായി നടത്തിയ ഈ ഓപ്പറേഷന്റെ ആദ്യ ഘട്ടമായിരുന്നു ഇത്. പകൽ വെളിച്ചത്തിൽ ഇത്തരമൊരു ആക്രമണം ഇറാൻ ഒട്ടും പ്രതീക്ഷിച്ചിരുന്നില്ല. 

പകൽ സമയത്ത് നടത്തിയ ആക്രമണം ശത്രുവിനെ ഞെട്ടിക്കാനുള്ള തന്ത്രത്തിന്റെ ഭാഗമായിരുന്നുവെന്ന് ഇസ്രായേൽ സൈനിക ഉദ്യോഗസ്ഥർ വ്യക്തമാക്കി. ഇറാന്റെ സുരക്ഷാ സംവിധാനങ്ങളിലുണ്ടായ വൻ വീഴ്ചയാണ് ഇത്രയും ഉന്നതരായ നേതാക്കളെ ഒരേസമയം ഇല്ലാതാക്കാൻ ഇസ്രായേലിനെ സഹായിച്ചത്.

വെറും 60 സെക്കൻഡിനുള്ളിൽ മൂന്ന് പ്രധാന ലക്ഷ്യസ്ഥാനങ്ങളിലാണ് മിസൈലുകൾ പതിച്ചതെന്ന് അസോസിയേറ്റഡ് പ്രസ് റിപ്പോർട്ട് ചെയ്തു. ഈ മിസൈൽ വർഷത്തിൽ അയത്തുള്ള അലി ഖമേനിയും റെവല്യൂഷണറി ഗാർഡ് ചീഫും ഉൾപ്പെടെ ഏകദേശം 40 മുതിർന്ന ഉദ്യോഗസ്ഥർ കൊല്ലപ്പെട്ടതായാണ് വിവരം. 

Key Words : Israel , Khamenei Assassination