ഇറാന് അടുത്ത അടി: രഹസ്യാന്വേഷണ മന്ത്രി ഇസ്മായില്‍ ഖത്തീബിനെ ഇസ്രയേല്‍ വധിച്ചു

ദുബായ് : ഇറാനിയന്‍ രഹസ്യാന്വേഷണ മന്ത്രി ഇസ്മായില്‍ ഖത്തീബിനെ ഐ.ഡി.എഫ് (ഇസ്രായേല്‍ പ്രതിരോധ സേന) വധിച്ചതായി പ്രതിരോധ മന്ത്രി ഇസ്രായേല്‍ കാറ്റ...

ദുബായ് : ഇറാനിയന്‍ രഹസ്യാന്വേഷണ മന്ത്രി ഇസ്മായില്‍ ഖത്തീബിനെ ഐ.ഡി.എഫ് (ഇസ്രായേല്‍ പ്രതിരോധ സേന) വധിച്ചതായി പ്രതിരോധ മന്ത്രി ഇസ്രായേല്‍ കാറ്റ്സും സൈന്യവും സ്ഥിരീകരിച്ചു.

യുദ്ധത്തിന്റെ പ്രാരംഭ ഘട്ടത്തിന് ശേഷം ഇറാനില്‍ നടക്കുന്ന ഏറ്റവും നിര്‍ണ്ണായകമായ മുന്നേറ്റമായാണ് ഇസ്രയേല്‍ ഇതിനെ കാണുന്നത്. തിങ്കളാഴ്ച രാത്രി കൊല്ലപ്പെട്ട അലി ലാറിജാനി, ബാസിജ് തലവന്‍ എന്നിവരുടെ മരണത്തിന് പിന്നാലെയാണ് ഖത്തീബിന്റെ അന്ത്യം.

തീവ്ര നിലപാടുകാരനായ മുന്‍ ഇറാന്‍ പ്രസിഡന്റ് ഇബ്രാഹിം റെയ്സി തിരഞ്ഞെടുക്കപ്പെട്ട 2021 ഓഗസ്റ്റ് മുതല്‍ ഖത്തീബ് രഹസ്യാന്വേഷണ മന്ത്രിയായി സേവനമനുഷ്ഠിച്ചു വരികയായിരുന്നു. ഹെലികോപ്റ്റര്‍ അപകടത്തില്‍ റെയ്സി കൊല്ലപ്പെടുകയും മസൂദ് പെസെഷ്‌കിയാന്‍ പ്രസിഡന്റായി ചുമതലയേല്‍ക്കുകയും ചെയ്തപ്പോള്‍ ഖത്തീബിനെ അതേ സ്ഥാനത്ത് നിലനിര്‍ത്തിയിരുന്നു. പുതിയ പ്രസിഡന്റുമാര്‍ സാധാരണയായി തങ്ങളുടെ വിശ്വസ്തരെ മന്ത്രിസ്ഥാനങ്ങളില്‍ നിയമിക്കാറുള്ള പതിവിന് വിരുദ്ധമായ നീക്കമായിരുന്നു അത്.

ആയത്തുള്ള അലി ഖമേനിയുമായി അടുത്ത ബന്ധം പുലര്‍ത്തിയിരുന്ന ഖത്തീബ്, മിതവാദിയായ പെസെഷ്‌കിയാന്റെ നിലപാടുകളെ നിയന്ത്രിക്കാന്‍ ശേഷിയുള്ള ഒരു തീവ്ര നിലപാടുകാരനായിരുന്നു.

തന്റെ ഔദ്യോഗിക ജീവിതത്തിന്റെ ഭൂരിഭാഗവും ഇസ്ലാമിക് റെവല്യൂഷണറി ഗാര്‍ഡ് കോറിന്റെ ഇന്റലിജന്‍സ് വിഭാഗത്തിലാണ് അദ്ദേഹം പ്രവര്‍ത്തിച്ചിരുന്നത്. ഐ.ആര്‍.ജി.സിയുടെ മേധാവിത്വം ഉറപ്പാക്കാന്‍ ഖമേനി ഖത്തീബിനെ ഉപയോഗിച്ചിരുന്നു.

സി.ഐ.എ, മൊസാദ് ഉദ്യോഗസ്ഥരുടെ വിലയിരുത്തല്‍ പ്രകാരം ഐ.ആര്‍.ജി.സിയേക്കാള്‍ പ്രൊഫഷണലായും കാര്യക്ഷമമായും പ്രവര്‍ത്തിച്ചിരുന്നത് ഖത്തീബ് നയിച്ചിരുന്ന രഹസ്യാന്വേഷണ മന്ത്രാലയമായിരുന്നു. ഐ.ആര്‍.ജി.സി ഉദ്യോഗസ്ഥര്‍ പലപ്പോഴും പ്രത്യയശാസ്ത്രപരമായ വിശ്വസ്തതയുടെ പേരില്‍ സ്ഥാനക്കയറ്റം ലഭിക്കുന്നവരാണെങ്കില്‍, ഇന്റലിജന്‍സ് മന്ത്രാലയത്തിലെ ഉന്നതര്‍ കഴിവിന്റെ അടിസ്ഥാനത്തിലാണ് നിയമിക്കപ്പെട്ടിരുന്നത്.

ഖത്തീബിന്റെ മരണം ഇറാന് വലിയൊരു തിരിച്ചടിയാണ്. രഹസ്യാന്വേഷണ മന്ത്രാലയവും ഐ.ആര്‍.ജി.സിയും തമ്മിലുള്ള ഒരു പാലമായാണ് അദ്ദേഹം പ്രവര്‍ത്തിച്ചിരുന്നത്. ഐ.ആര്‍.ജി.സി പ്രത്യയശാസ്ത്രപരമായ തീവ്രതയ്ക്ക് പേരുകേട്ടതാണെങ്കില്‍, ഖത്തീബിന്റെ കീഴിലുള്ള മന്ത്രാലയം കൂടുതല്‍ 'പ്രൊഫഷണല്‍' ആയിരുന്നു.

പ്രസിഡന്റ് മസൂദ് പെസെഷ്‌കിയാന്‍ ഒരു മിതവാദിയായാണ് അറിയപ്പെടുന്നത്. പരമോന്നത നേതാവ് ആയത്തുള്ള ഖമേനിയുടെ തീവ്രനിലപാടുകള്‍ മന്ത്രിസഭയില്‍ നടപ്പിലാകുന്നുണ്ടെന്ന് ഉറപ്പുവരുത്താനാണ് ഖത്തീബിനെ ആ സ്ഥാനത്ത് നിലനിര്‍ത്തിയിരുന്നത്.

പരമോന്നത നേതാവിന്റെയും രഹസ്യാന്വേഷണ വിഭാഗത്തിന്റെയും ഒരുപോലെ വിശ്വാസം പിടിച്ചുപറ്റിയ ഒരാളെ പകരം കണ്ടെത്തുക എന്നത് ഇറാന് വലിയ വെല്ലുവിളിയായിരിക്കും.

Key Words : Israel , Iranian Intelligence Minister, Ismail Khatib