യുഡിഎഫ് അധികാരത്തിലെത്തിയാൽ റബർ വില 250 രൂപയാക്കും: രാഹുൽ ഗാന്ധി, ഏപ്രിൽ രണ്ടിന് പ്രിയങ്ക ഗാന്ധി കേരളത്തിൽ

പുതുപ്പള്ളി: യുഡിഎഫ് സർക്കാർ അധികാരത്തിൽ വന്നാലുള്ള ആദ്യ മന്ത്രിസഭാ യോഗത്തിൽ തന്നെ റബർ വില കിലോയ്ക്ക് 250 രൂപയാക്കാൻ തീരുമാനിക്കുമെന്ന് ലോക്...

പുതുപ്പള്ളി: യുഡിഎഫ് സർക്കാർ അധികാരത്തിൽ വന്നാലുള്ള ആദ്യ മന്ത്രിസഭാ യോഗത്തിൽ തന്നെ റബർ വില കിലോയ്ക്ക് 250 രൂപയാക്കാൻ തീരുമാനിക്കുമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി. പുതുപ്പള്ളിയിൽ നടന്ന തിരഞ്ഞെടുപ്പ് പ്രചാരണ യോഗത്തിൽ സംസാരിക്കുകയായിരുന്നു അദ്ദേഹം.

കർഷകരുടെയും തൊഴിലാളികളുടെയും ക്ഷേമത്തിനാണ് കോൺഗ്രസ് മുൻഗണന നൽകുന്നതെന്ന് അദ്ദേഹം വ്യക്തമാക്കി. "റബർ വില കിലോയ്ക്ക് 300 രൂപയാക്കുമെന്ന് ഞങ്ങൾ പ്രകടനപത്രികയിൽ വാഗ്ദാനം ചെയ്തിട്ടുണ്ട്. ഇതിന്റെ ആദ്യപടിയായി വില 250 രൂപയാക്കും, പിന്നീട് അത് 300 രൂപയിലേക്ക് ഉയർത്തും. കർഷകരും തൊഴിലാളികളുമാണ് ഈ രാജ്യത്തിന്റെയും സംസ്ഥാനത്തിന്റെയും നട്ടെല്ല്. അതുകൊണ്ടാണ് ഇത്തരമൊരു തീരുമാനമെടുക്കുന്നത്," രാഹുൽ ഗാന്ധി പറഞ്ഞു.

അതേസമയം, തിരഞ്ഞെടുപ്പ് പ്രചാരണം ശക്തമാക്കാൻ എഐസിസി ജനറൽ സെക്രട്ടറി പ്രിയങ്ക ഗാന്ധിയും കേരളത്തിലെത്തുന്നു. ഏപ്രിൽ രണ്ടിന് തിരുവനന്തപുരത്ത് എത്തുന്ന പ്രിയങ്ക ചിറയിൻകീഴ്, വട്ടിയൂർക്കാവ്, വാമനപുരം മണ്ഡലങ്ങളിൽ പര്യടനം നടത്തും.

രാവിലെ 10 മണിക്ക് ചിറയിൻകീഴ് വലിയകട ജംക്‌ഷനിൽ നിന്ന് കോരാണിയിലേക്ക് പ്രിയങ്കയുടെ റോഡ് ഷോ നടക്കും. തുടർന്ന് 10.30-ന് കല്ലറയിൽ നടക്കുന്ന പൊതുയോഗം അവർ ഉദ്ഘാടനം ചെയ്യും. ഉച്ചയ്ക്ക് ശേഷം കൊല്ലം ജില്ലയിലും പ്രിയങ്ക ഗാന്ധി പ്രചാരണത്തിനെത്തുമെന്നാണ് റിപ്പോർട്ടുകൾ സൂചിപ്പിക്കുന്നത്.

Key Words : UDF, Rubber Price, Rahul Gandhi, Priyanka Gandhi, Kerala Election