ഹോര്‍മുസ് കടലിടുക്കില്‍ അമേരിക്കയുടെയും ഇസ്രയേലിന്റെയും കപ്പലുകള്‍ക്കു മാത്രമാണ് വിലക്ക്: ഇറാന്‍ വിദേശകാര്യ മന്ത്രി

Anyone except U.S. and Israeli vessels is free to pass through the Strait of Hormuz: Iran FM

ദുബായ് : ഹോര്‍മുസ് കടലിടുക്ക് വഴി യുഎസ്, ഇസ്രായേല്‍ കപ്പലുകള്‍ ഒഴികെ ആര്‍ക്കും പോകാമെന്ന്  ഇറാന്‍ വിദേശകാര്യ മന്ത്രി അബ്ബാസ് അരാഗ്ചി പറഞ്ഞു. മറ്റ് കപ്പലുകള്‍ക്ക് ഇതിലൂടെ കടന്നുപോകാന്‍ തടസ്സമില്ല. എന്നാല്‍ 'സുരക്ഷാ കാരണങ്ങളാല്‍' പലരും അത് ഒഴിവാക്കുകയാണെന്നും അദ്ദേഹം കൂട്ടിച്ചേര്‍ത്തു.

ഈ സുരക്ഷാ പ്രശ്‌നങ്ങള്‍ക്ക് ഇറാനുമായി ബന്ധമില്ലെന്നാണ് അരാഗ്ചിയുടെ വാദം. നിലവില്‍ നിരവധി ടാങ്കറുകളും കപ്പലുകളും ഹോര്‍മുസ് കടലിടുക്കിലൂടെ കടന്നുപോകുന്നുണ്ടെന്നും അദ്ദേഹം പറഞ്ഞു.

ഹോര്‍മുസ് കടലിടുക്ക് ഇറാന്‍ അടയ്ക്കാന്‍ ശ്രമിക്കുന്നുവെന്നും, അത് തുറന്ന് സൂക്ഷിക്കുന്നതിനും സുരക്ഷ ഉറപ്പാക്കുന്നതിനും യുഎസ് മറ്റ് രാജ്യങ്ങളുമായി ചേര്‍ന്ന് യുദ്ധക്കപ്പലുകള്‍ അയക്കുമെന്നും പ്രസിഡന്റ് ഡൊണാള്‍ഡ് ട്രംപ് ട്രൂത്ത് സോഷ്യലിലൂടെ പ്രഖ്യാപിച്ചതിന് പിന്നാലെയാണ് ഈ പ്രതികരണം. ചൈന, ഫ്രാന്‍സ്, ജപ്പാന്‍, ദക്ഷിണ കൊറിയ, യുകെ എന്നീ രാജ്യങ്ങളെ ഈ പ്രതിസന്ധി ബാധിച്ചിട്ടുണ്ടെന്ന് ചൂണ്ടിക്കാട്ടിയ ട്രംപ്, ഈ രാജ്യങ്ങളും കപ്പലുകള്‍ അയക്കുമെന്ന് പ്രത്യാശ പ്രകടിപ്പിച്ചു.

ഇറാന്റെ പുതിയ പരമോന്നത നേതാവ് മൊജ് തബ ഖമേനിക്ക് പരിക്കേറ്റുവെന്നും അദ്ദേഹം വിരൂപനാക്കപ്പെട്ടുവെന്നും യുഎസ് പ്രതിരോധ സെക്രട്ടറി പീറ്റ് ഹെഗ്‌സെത്ത് ഉന്നയിച്ച അവകാശവാദങ്ങളെ അരാഗ്ചി തള്ളി. 

'പരമോന്നത നേതാവിന് പ്രശ്‌നങ്ങളൊന്നുമില്ല, അദ്ദേഹം തന്റെ ചുമതലകള്‍ നിര്‍വ്വഹിച്ചുവരികയാണ്,' എന്ന് അരാഗ്ചി പറഞ്ഞു. ഇറാന്‍ ഒരു വ്യക്തിയെ മാത്രം ആശ്രയിച്ചല്ല നിലനില്‍ക്കുന്നതെന്നും ഏത് വെല്ലുവിളിയെയും അതിജീവിക്കാന്‍ ഭരണകൂടത്തിന് കരുത്തുണ്ടെന്നും അദ്ദേഹം കൂട്ടിച്ചേര്‍ത്തു.

എന്നാല്‍, ഇതിന് പിന്നാലെ മൊജ് തബ ഖമേനി ജീവനോടെയില്ലെന്നാണ് താന്‍ കേള്‍ക്കുന്നതെന്ന് ട്രംപ് എന്‍ബിസി ന്യൂസിനോട് പറഞ്ഞു. 'അദ്ദേഹം ജീവനോടെയുണ്ടെങ്കില്‍ തന്റെ രാജ്യത്തിന് ഗുണകരമായത് ചെയ്യണം, അതായത് കീഴടങ്ങണം,' ട്രംപ് പറഞ്ഞു.

ജനീവയില്‍ നടന്ന ചര്‍ച്ചയ്ക്കിടെ യുഎസ് പ്രതിനിധികളായ സ്റ്റീവ് വിറ്റ്കോഫിനോടും ജാരെഡ് കുഷ്‌നറോടും താന്‍ ആക്രോശിച്ചു എന്ന വാര്‍ത്തകള്‍ അരാഗ്ചി നിഷേധിച്ചു. 11 ആണവ ബോംബുകള്‍ നിര്‍മ്മിക്കാനുള്ള യുറേനിയം ഇറാന്റെ പക്കലുണ്ടെന്ന് ഭീഷണിപ്പെടുത്തിയെന്ന റിപ്പോര്‍ട്ടുകളും അദ്ദേഹം തള്ളി.

ഇറാന്റെ പക്കലുള്ള 440 കിലോ 60% സമ്പുഷ്ടീകരിച്ച യുറേനിയത്തെക്കുറിച്ച് മാത്രമാണ് താന്‍ സംസാരിച്ചതെന്ന് അദ്ദേഹം വിശദീകരിച്ചു. ഇത് കൂടുതല്‍ സമ്പുഷ്ടീകരിച്ചാല്‍ 10 ബോംബുകള്‍ ഉണ്ടാക്കാന്‍ സാധിക്കുമെന്നും, അത്രയും വലിയൊരു വിട്ടുവീഴ്ചയാണ് ഇറാന്‍ വാഗ്ദാനം ചെയ്യുന്നതെന്ന് വ്യക്തമാക്കാനാണ് താന്‍ ശ്രമിച്ചതെന്നും അദ്ദേഹം പറഞ്ഞു. 

യുഎസ് പ്രതിനിധികള്‍ക്ക് അറിവില്ലാത്തതുകൊണ്ടോ അല്ലെങ്കില്‍ അവരുടെ അധിനിവേശത്തെ ന്യായീകരിക്കാനോ വേണ്ടിയാകാം ഇത് തെറ്റായി വ്യാഖ്യാനിച്ചതെന്ന് അരാഗ്ചി ആരോപിച്ചു.

Summary:  Iranian Foreign Minister Abbas Araghchi stated that anyone except U.S. and Israeli vessels is free to pass through the Strait of Hormuz. He clarified that there are no obstacles for other ships to transit, though he noted that many are avoiding the route due to "security reasons."

Araghchi claimed that these security concerns are unrelated to Iran, pointing out that several tankers and ships are currently passing through the strait without issue.