പ്രധാനമന്ത്രിക്കും തിരഞ്ഞെടുപ്പ് കമ്മിഷനുമെതിരെ എഐ വിഡിയോ: എക്സ് പ്ലാറ്റ്‌ഫോമിനെതിരെ കേസെടുത്ത് സൈബർ പൊലീസ്

തിരുവനന്തപുരം: പ്രധാനമന്ത്രി നരേന്ദ്ര മോദിയെയും തിരഞ്ഞെടുപ്പ് കമ്മിഷനെയും അധിക്ഷേപിക്കുന്ന തരത്തിലുള്ള എഐ (Artificial Intelligence) വിഡിയോ പ...

തിരുവനന്തപുരം: പ്രധാനമന്ത്രി നരേന്ദ്ര മോദിയെയും തിരഞ്ഞെടുപ്പ് കമ്മിഷനെയും അധിക്ഷേപിക്കുന്ന തരത്തിലുള്ള എഐ (Artificial Intelligence) വിഡിയോ പ്രചരിപ്പിച്ചതുമായി ബന്ധപ്പെട്ട് സോഷ്യൽ മീഡിയ പ്ലാറ്റ്‌ഫോമായ 'എക്സി'നും (X) ഒരു ഉപഭോക്താവിനുമെതിരെ തിരുവനന്തപുരം സിറ്റി സൈബർ പൊലീസ് കേസെടുത്തു. 

'ലക്ഷ്മി എൻ രാജു' (@valiant_Raju) എന്ന എക്സ് ഹാൻഡിലിൽ നിന്ന് പങ്കുവെച്ച 1 മിനിറ്റും 17 സെക്കൻഡും ദൈർഘ്യമുള്ള വിഡിയോയാണ് കേസിനാധാരം. പ്രധാനമന്ത്രിയെയും മുഖ്യ തിരഞ്ഞെടുപ്പ് കമ്മിഷണർ ജ്ഞാനേഷ് കുമാറിനെയും മോശമായി ചിത്രീകരിക്കുന്നതാണ് ഈ വിഡിയോ എന്ന് പൊലീസ് അറിയിച്ചു.

ബിജെപിയുടെ സീൽ പതിപ്പിച്ച തിരഞ്ഞെടുപ്പ് കമ്മിഷന്റെ കത്തുമായി ബന്ധപ്പെട്ട പഴയ വിവാദത്തെ ആസ്പദമാക്കിയാണ് വിഡിയോ നിർമ്മിച്ചിരിക്കുന്നത്. ഈ കത്ത് ഒരു ക്ലറിക്കൽ പിശകാണെന്നും അത് തിരുത്തിയതാണെന്നും നേരത്തെ തിരഞ്ഞെടുപ്പ് കമ്മിഷൻ വ്യക്തമാക്കിയിരുന്നു.

ഭരണഘടനാ സ്ഥാപനങ്ങളുടെ വിശ്വാസ്യത തകർക്കാനും പൊതുജനങ്ങളെ തെറ്റിദ്ധരിപ്പിക്കാനും സ്വതന്ത്രവും നീതിപൂർവവുമായ തിരഞ്ഞെടുപ്പ് അട്ടിമറിക്കാനും ഈ വിഡിയോ ഇടയാക്കുമെന്ന് പൊലീസ് എഫ്‌ഐആറിൽ പറയുന്നു. ലഹളയുണ്ടാക്കാനുള്ള ബോധപൂർവമായ ശ്രമം നടന്നതായും പൊലീസ് ആരോപിക്കുന്നു.

ഭാരതീയ ന്യായ സംഹിതയിലെ (BNS) വ്യാജരേഖ ചമയ്ക്കൽ, മനഃപൂർവമുള്ള അവഹേളനം, ഐടി ആക്ടിലെ ആൾമാറാട്ടം തുടങ്ങിയ വകുപ്പുകൾ പ്രകാരമാണ് കേസെടുത്തിരിക്കുന്നത്. വിഡിയോ നീക്കം ചെയ്യാൻ അധികൃതർ നിർദ്ദേശം നൽകിയിട്ടും നടപടിയെടുക്കാത്തതിനാലാണ് എക്സ് പ്ലാറ്റ്‌ഫോമിനെയും കേസിൽ പ്രതിചേർത്തത്. 

തിരഞ്ഞെടുപ്പ് കാലയളവിൽ തെറ്റായ വാർത്തകളും വ്യാജ വീഡിയോകളും പ്രചരിപ്പിക്കുന്നവർക്കെതിരെ കർശന നടപടി സ്വീകരിക്കുമെന്ന് സൈബർ ഓപ്പറേഷൻസ് വിഭാഗം മുന്നറിയിപ്പ് നൽകിയിട്ടുണ്ട്.

Key Words :  AI Video,  Prime Minister, Election Commission, Cyber ​​Police