ആരോഗ്യമന്ത്രിയുടെ വീട്ടിലെ റീത്ത് പ്രതിഷേധം: 28,000 രൂപയുടെ നഷ്ടം , 25 യൂത്ത് കോൺഗ്രസ് പ്രവർത്തകർക്കെതിരെ കേസ്

തിരുവനന്തപുരം : ആരോഗ്യമന്ത്രി വീണാ ജോർജിൻ്റെ ഔദ്യോഗിക വസതിയിലേക്ക് അതിക്രമിച്ചു കയറി റീത്ത് വെച്ച് പ്രതിഷേധിച്ച സംഭവത്തിൽ 25 യൂത്ത് കോൺഗ്രസ്...

തിരുവനന്തപുരം : ആരോഗ്യമന്ത്രി വീണാ ജോർജിൻ്റെ ഔദ്യോഗിക വസതിയിലേക്ക് അതിക്രമിച്ചു കയറി റീത്ത് വെച്ച് പ്രതിഷേധിച്ച സംഭവത്തിൽ 25 യൂത്ത് കോൺഗ്രസ് പ്രവർത്തകർക്കെതിരെ പൊലീസ് കേസെടുത്തു. 

പ്രതിഷേധത്തിനിടെ മന്ത്രിയുടെ ഔദ്യോഗിക വസതിയുടെ ഗേറ്റും ലോക്കും തല്ലിത്തകർക്കുകയും മൂന്ന് പൊലീസ് ഉദ്യോഗസ്ഥരെ കൈയേറ്റം ചെയ്യുകയും ചെയ്തതായി പൊലീസ് അറിയിച്ചു. ഇതുവഴി ഏകദേശം 28,000 രൂപയുടെ നഷ്ടം ഉണ്ടായെന്നാണ് എഫ്.ഐ.ആറിൽ രേഖപ്പെടുത്തിയിരിക്കുന്നത്.  കേസിൽ ഒന്നാം പ്രതി ജില്ലാ പ്രസിഡന്റ് നേമം ഷജീർ ആണ്. കലാപശ്രമം, അതിക്രമിച്ചു കയറൽ എന്നീ കുറ്റങ്ങളാണ് പ്രവർത്തകർക്കെതിരെ ചുമത്തിയിട്ടുള്ളത്. 2021-ൽ ആലപ്പുഴ വണ്ടാനം മെഡിക്കൽ കോളേജിൽ പ്രസവ ശസ്ത്രക്രിയയ്ക്കിടെ രോഗിയുടെ വയറ്റിൽ ശസ്ത്രക്രിയ ഉപകരണം (artery forceps) കുടുങ്ങിയ സംഭവത്തിൽ ആരോഗ്യവകുപ്പിന്റെ ഭാഗത്തുനിന്നുണ്ടായ വീഴ്ചയിൽ പ്രതിഷേധിച്ചായിരുന്നു യൂത്ത് കോൺഗ്രസിന്റെ ഈ സമരം.

പ്രതിപക്ഷ നേതാവ് വി.ഡി. സതീശന്റെ നിർദ്ദേശപ്രകാരമാണ് ഈ 'ആക്രമണം' നടന്നതെന്ന് മന്ത്രി വീണാ ജോർജ് ആരോപിച്ചു. എന്നാൽ, ഇത്തരം രീതിയിലുള്ള പ്രതിഷേധങ്ങൾ കോൺഗ്രസിന്റെ ശൈലിയല്ലെന്നും മന്ത്രിയുടെ ആരോപണം അടിസ്ഥാനരഹിതമാണെന്നും വി.ഡി. സതീശൻ വ്യക്തമാക്കി.

പ്രതിഷേധം നടന്ന സമയത്ത് മന്ത്രിയുടെ വസതിയിൽ വെറും മൂന്ന് പൊലീസ് ഉദ്യോഗസ്ഥർ മാത്രമാണ് ഉണ്ടായിരുന്നതെന്നും ഇത് വലിയ സുരക്ഷാ വീഴ്ചയാണെന്നും റിപ്പോർട്ടുകളുണ്ട്. 

Key Words : Youth Congress Protest , Health Minister Veena George, Case