യുക്രെയ്ൻ – റഷ്യ യുദ്ധം അവസാനിപ്പിക്കാൻ ജൂൺ വരെ സമയപരിധി നിശ്ചയിച്ച് ട്രംപ് ; മാർച്ചോടെ സമാധാന കരാറിലെത്താനും ലക്ഷ്യം

വാഷിംഗ്ടൺ: യുക്രെയ്ൻ – റഷ്യ യുദ്ധം അവസാനിപ്പിക്കാൻ യുഎസ് പ്രസിഡന്റ് ഡൊണാൾഡ് ട്രംപ് പുതിയ സമയപരിധി നിശ്ചയിച്ചതായി റിപ്പോർട്ടുകൾ പുറത്തുവരുന്ന...

വാഷിംഗ്ടൺ: യുക്രെയ്ൻ – റഷ്യ യുദ്ധം അവസാനിപ്പിക്കാൻ യുഎസ് പ്രസിഡന്റ് ഡൊണാൾഡ് ട്രംപ് പുതിയ സമയപരിധി നിശ്ചയിച്ചതായി റിപ്പോർട്ടുകൾ പുറത്തുവരുന്നു. യുദ്ധം അവസാനിപ്പിക്കാൻ ട്രംപ് ഭരണകൂടം ഈ വർഷം ജൂൺ വരെ സമയപരിധി നിശ്ചയിച്ചിട്ടുണ്ടെന്ന് യുക്രെയ്ൻ പ്രസിഡന്റ് വൊളോഡിമിർ സെലെൻസ്‌കി വെളിപ്പെടുത്തി. എന്നാൽ മാർച്ച് മാസത്തോടെ തന്നെ സമാധാന കരാറിലെത്താൻ യുഎസ് ലക്ഷ്യമിടുന്നതായി ചില വൃത്തങ്ങളെ ഉദ്ധരിച്ച് റോയിട്ടേഴ്‌സ് റിപ്പോർട്ട് ചെയ്തിട്ടുണ്ട്.

റഷ്യൻ മിലിട്ടറി ഇന്റലിജൻസ് (GRU) ഡെപ്യൂട്ടി ഹെഡ് ലെഫ്റ്റനന്റ് ജനറൽ വ്ലാഡിമിർ അലക്സീവ് ഫെബ്രുവരി 6-ന് മോസ്കോയിൽ വെച്ച് വെടിയേറ്റു. അദ്ദേഹത്തിന്റെ നില അതീവ ഗുരുതരമായി തുടരുകയാണ്. ജനറൽക്ക് നേരെയുണ്ടായ ഈ ആക്രമണം സമാധാന ചർച്ചകളെ അട്ടിമറിക്കാൻ യുക്രെയ്ൻ നടത്തിയ "ഭീകരപ്രവർത്തനം" ആണെന്ന് റഷ്യൻ വിദേശകാര്യ മന്ത്രി സെർജി ലാവ്റോവ് ആരോപിച്ചു. ഈ സംഭവം നിലവിലെ ചർച്ചാ പ്രക്രിയയെ കൂടുതൽ സങ്കീർണ്ണമാക്കിയേക്കാം.

യുദ്ധം അവസാനിപ്പിക്കാനുള്ള അടുത്ത റൗണ്ട് ത്രികക്ഷി ചർച്ചകൾ അടുത്ത ആഴ്ച അമേരിക്കയിലെ മയാമിയിൽ നടക്കുമെന്ന് സെലെൻസ്‌കി അറിയിച്ചിട്ടുണ്ട്. ട്രംപിന്റെ പുതിയ സമാധാന പദ്ധതി പ്രകാരം ഡോൺബാസ് മേഖലയിൽ ഒരു 'ഫ്രീ ഇക്കണോമിക് സോൺ' എന്ന നിർദ്ദേശം മുന്നോട്ടുവെച്ചിട്ടുണ്ടെങ്കിലും അതിനോട് റഷ്യയും യുക്രെയ്നും പൂർണ്ണമായി യോജിച്ചിട്ടില്ല. നിലവിൽ കാര്യങ്ങൾ നിർണ്ണായകമായ ഘട്ടത്തിലൂടെയാണ് കടന്നുപോകുന്നത്.

Key Words : Donald Trump, Ukraine-Russia war; Peace deal