ശബരിമല യുവതീപ്രവേശം: പുതിയ ഒമ്പതംഗ ബെഞ്ച്, ഏപ്രിൽ 7 മുതൽ വാദം

ന്യൂഡൽഹി: ശബരിമലയിൽ എല്ലാ പ്രായത്തിലുമുള്ള സ്ത്രീകൾക്ക് പ്രവേശനം അനുവദിച്ചുകൊണ്ടുള്ള 2018-ലെ സുപ്രീം കോടതി വിധിക്കെതിരായ പുനഃപരിശോധനാ ഹർജികൾ...

ന്യൂഡൽഹി: ശബരിമലയിൽ എല്ലാ പ്രായത്തിലുമുള്ള സ്ത്രീകൾക്ക് പ്രവേശനം അനുവദിച്ചുകൊണ്ടുള്ള 2018-ലെ സുപ്രീം കോടതി വിധിക്കെതിരായ പുനഃപരിശോധനാ ഹർജികൾ പരിഗണിക്കാൻ പുതിയ ഒമ്പതംഗ ബെഞ്ച് രൂപീകരിക്കുന്നു. ചീഫ് ജസ്റ്റിസിന്റെ നേതൃത്വത്തിലുള്ള മൂന്നംഗ ബെഞ്ചാണ് ഇതുസംബന്ധിച്ച വാദക്രമം നിശ്ചയിച്ചത്.

 

നേരത്തെ രൂപീകരിച്ചിരുന്ന ഒമ്പതംഗ ബെഞ്ചിലെ ഭൂരിഭാഗം ജഡ്ജിമാരും വിരമിച്ച സാഹചര്യത്തിലാണ് പുതിയ ബെഞ്ച് വരുന്നത്. നിലവിൽ ജസ്റ്റിസ് സൂര്യകാന്ത് മാത്രമാണ് പഴയ ബെഞ്ചിൽ ബാക്കിയുള്ളത്. അതിനാൽ പുതിയ ബെഞ്ചിലെ അംഗങ്ങളെ ചീഫ് ജസ്റ്റിസ് പ്രത്യേക ഉത്തരവിലൂടെ ഉടൻ പ്രഖ്യാപിക്കും.

സമയക്രമം: 

* ഏപ്രിൽ 7 മുതൽ 9 വരെ: പുനഃപരിശോധനാ ഹർജിക്കാരെയും അവരെ പിന്തുണയ്ക്കുന്ന കക്ഷികളെയും കോടതി കേൾക്കും.

ഏപ്രിൽ 14 മുതൽ 16 വരെ: വിധിയെ അനുകൂലിക്കുന്നവരുടെ (യുവതീപ്രവേശത്തെ പിന്തുണയ്ക്കുന്നവരുടെ) വാദം നടക്കും.

ഏപ്രിൽ 21: മറുപടി സത്യവാങ്മൂലങ്ങൾ സമർപ്പിക്കാം.

ഏപ്രിൽ 22: വാദം പൂർത്തിയാക്കി കേസ് വിധി പറയാനായി മാറ്റാനാണ് കോടതി ഉദ്ദേശിക്കുന്നത്.

 ശബരിമല വിധി പുനഃപരിശോധിക്കണമെന്ന നിലപാടിനെ കേന്ദ്രസർക്കാർ പിന്തുണയ്ക്കുന്നുവെന്ന് സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു. ഇനി കേരള സർക്കാരിന്റെ നിലപാടാണ് ഈ കേസിൽ നിർണ്ണായകമാവുക.
 

2018 സെപ്റ്റംബർ 28-ലെ വിധിക്ക് ശേഷം കേരളത്തിൽ വലിയ പ്രതിഷേധങ്ങൾ നടന്നിരുന്നു. തുടർന്ന് വന്ന തിരഞ്ഞെടുപ്പുകളിൽ ഇത് രാഷ്ട്രീയ ചർച്ചയാവുകയും ചെയ്തു. നിലവിൽ സർക്കാർ ഈ വിഷയത്തിൽ തങ്ങളുടെ വ്യക്തമായ നിലപാട് കോടതിയിൽ എന്തായിരിക്കും എന്ന് വ്യക്തമാക്കിയിട്ടില്ലെങ്കിലും, കേസ് പരിഗണിക്കുമ്പോൾ അത് നിർണ്ണായകമാകും.