ബാഹുബലിക്ക് ശേഷം ആരോഗ്യം മോശമായി, രൂപത്തിൽ വലിയ മാറ്റം വന്നു; അഡ്വാൻസ് തുകയെല്ലാം തിരികെ നൽകി- വെളിപ്പെടുത്തലുമായി റാണ ദഗ്ഗുബാട്ടി

ബാഹുബലിക്ക് ശേഷം തന്റെ ജീവിതം തകിടം മറിച്ച ഗുരുതരമായ ആരോഗ്യപ്രതിസന്ധികളെക്കുറിച്ച് നടൻ റാണ ദഗ്ഗുബാട്ടി അടുത്തിടെ നടത്തിയ വെളിപ്പെടുത്തലുകളാണ...

ബാഹുബലിക്ക് ശേഷം തന്റെ ജീവിതം തകിടം മറിച്ച ഗുരുതരമായ ആരോഗ്യപ്രതിസന്ധികളെക്കുറിച്ച് നടൻ റാണ ദഗ്ഗുബാട്ടി അടുത്തിടെ നടത്തിയ വെളിപ്പെടുത്തലുകളാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. 

ബാഹുബലി 2-ന്റെ വൻ വിജയത്തിന് പിന്നാലെ റാണയുടെ വൃക്കകൾ തകരാറിലാകുകയും ഹൃദയസംബന്ധമായ അസുഖങ്ങൾ  പിടിപെടുകയും ചെയ്തു. മരണസാധ്യത 30 ശതമാനവും പക്ഷാഘാതത്തിന് 70 ശതമാനം സാധ്യതയും അന്നുണ്ടായിരുന്നുവെന്ന് താരം വെളിപ്പെടുത്തി.

ചികിത്സയ്ക്കായി യുഎസിലേക്ക് പോയ താരം ഒരു വർഷത്തോളം സിനിമയിൽ നിന്ന് വിട്ടുനിന്നു. ശസ്ത്രക്രിയയ്ക്കും മരുന്നുകൾക്കും ശേഷം തന്റെ ശാരീരിക രൂപത്തിൽ വലിയ മാറ്റം വന്നതായും കണ്ണാടിയിൽ നോക്കിയപ്പോൾ തനിക്ക് തന്നെ തിരിച്ചറിയാൻ കഴിഞ്ഞില്ലെന്നും അദ്ദേഹം പറഞ്ഞു.

താൻ മുൻപ് കരാർ ഒപ്പിട്ട പല സിനിമകളിൽ നിന്നും റാണ സ്വയം പിന്മാറി. ഗുസ്തിക്കാരന്റെ കഥ പറയുന്ന സിനിമ ഉൾപ്പെടെയുള്ളവയ്ക്കായി വാങ്ങിയ അഡ്വാൻസ് തുക താരം തിരികെ നൽകി. ആ കഥാപാത്രങ്ങൾക്ക് ആവശ്യമായ ശാരീരികക്ഷമത അന്ന് തനിക്കില്ലായിരുന്നു എന്നതാണ് ഇതിന് കാരണമായി അദ്ദേഹം പറഞ്ഞത്.

ജീവിതത്തിലെ ഈ വെല്ലുവിളി നിറഞ്ഞ ഘട്ടത്തെ തന്റെ ജീവിതത്തിന്റെ 'രണ്ടാം അധ്യായം' (Chapter 2) എന്നാണ് അദ്ദേഹം വിശേഷിപ്പിച്ചത്. അതിജീവനത്തിനായിരുന്നു അന്ന് താൻ മുൻഗണന നൽകിയതെന്നും പ്രശസ്തിയേക്കാൾ ആരോഗ്യത്തിനാണ് ഇപ്പോൾ പ്രാധാന്യം നൽകുന്നതെന്നും റാണ കൂട്ടിച്ചേർത്തു. 

നേരത്തെ തന്റെ ഒരു കണ്ണിന് കാഴ്ചയില്ലെന്ന സത്യവും താരം വെളിപ്പെടുത്തിയിരുന്നു. ഈ പ്രതിസന്ധികളെയെല്ലാം അതിജീവിച്ച് അഭിനയത്തിലും നിർമ്മാണത്തിലും ഇപ്പോൾ അദ്ദേഹം സജീവമാണ്.

Keywords : Rana Daggubati, Baahubali, Movie News