ഇന്ത്യയുടെ പൂർണരൂപത്തിലുള്ള ഭൂപടം: അമേരിക്കയ്ക്ക് പാക്കിസ്ഥാൻ്റെ പരാതി

ന്യൂഡൽഹി: ഇന്ത്യയും അമേരിക്കയും തമ്മിലുള്ള പുതിയ വ്യാപാര കരാറിനെക്കുറിച്ചുള്ള പോസ്റ്റിൽ പാക് അധീന കാശ്മീരും (PoK) അക്സായി ചിന്നും ഉൾപ്പെടുന്...

ന്യൂഡൽഹി: ഇന്ത്യയും അമേരിക്കയും തമ്മിലുള്ള പുതിയ വ്യാപാര കരാറിനെക്കുറിച്ചുള്ള പോസ്റ്റിൽ പാക് അധീന കാശ്മീരും (PoK) അക്സായി ചിന്നും ഉൾപ്പെടുന്ന ഇന്ത്യയുടെ പൂർണരൂപത്തിലുള്ള ഭൂപടം ഉപയോഗിച്ചതിനെതിരെ പാക്കിസ്ഥാൻ ശക്തമായ പ്രതിഷേധം അറിയിച്ചു. ഇതേത്തുടർന്ന് അമേരിക്ക ഈ ഭൂപടം തങ്ങളുടെ ഔദ്യോഗിക സോഷ്യൽ മീഡിയ അക്കൗണ്ടുകളിൽ നിന്ന് നീക്കം ചെയ്തിട്ടുണ്ട്. 

യുണൈറ്റഡ് സ്റ്റേറ്റ്സ് ട്രേഡ് റെപ്രസെന്റേറ്റീവ് (USTR) ആണ് പുതിയ വ്യാപാര കരാറിനെക്കുറിച്ചുള്ള വിവരങ്ങൾ പങ്കുവെക്കുന്നതിനായി തങ്ങളുടെ X (ട്വിറ്റർ) ഹാൻഡിൽ ഈ ഭൂപടം പോസ്റ്റ് ചെയ്തത്.

സാധാരണയായി അമേരിക്കൻ ഭൂപടങ്ങളിൽ തർക്കപ്രദേശങ്ങളെ വേർതിരിച്ച് കാണിക്കാറാണുള്ളത്. എന്നാൽ ഇത്തവണ കാശ്മീർ പൂർണ്ണമായും ഇന്ത്യയുടെ ഭാഗമായി രേഖപ്പെടുത്തിയത് പാക്കിസ്ഥാനെ ചൊടിപ്പിച്ചു.

ഭൂപടം ഐക്യരാഷ്ട്രസഭയുടെ (UN) അംഗീകൃത മാനദണ്ഡങ്ങൾക്ക് വിരുദ്ധമാണെന്നും ഇത് നിയമവിരുദ്ധമാണെന്നും ചൂണ്ടിക്കാട്ടി പാക്കിസ്ഥാൻ വിദേശകാര്യ മന്ത്രാലയം അമേരിക്കൻ അധികൃതരെ സമീപിച്ചു.

പാക്കിസ്ഥാൻ പ്രതിഷേധം അറിയിച്ചതിനെത്തുടർന്ന് ഏതാനും ദിവസങ്ങൾക്കുള്ളിൽ തന്നെ ആ പോസ്റ്റ് നീക്കം ചെയ്തു. ജമ്മു കാശ്മീർ ഇന്ത്യയുടെ അവിഭാജ്യ ഘടകമാണെന്ന നിലപാടിൽ ഇന്ത്യ ഉറച്ചുനിൽക്കുന്നു. അതേസമയം, അമേരിക്ക ഈ ഭൂപടം പോസ്റ്റ് ചെയ്തത് ഇന്ത്യയോടുള്ള തന്ത്രപരമായ അടുപ്പത്തിന്റെ സൂചനയായാണ് രാഷ്ട്രീയ നിരീക്ഷകർ വിലയിരുത്തുന്നത്.

Key Words : Pakistan,  Complaint ,USA , India's Map