വിവാദ ചലചിത്രം കേരള സ്റ്റോറിക്ക് പ്രദർശനാനുമതി

കൊച്ചി : കേരള സ്റ്റോറിയുടെ രണ്ടാം ഭാഗമായ 'ദ കേരള സ്റ്റോറി 2: ഗോസ് ബിയോണ്ട്' എന്ന ചിത്രത്തിൻ്റെ പ്രദർശനത്തിന് കേരള ഹൈക്കോടതി ഡിവിഷൻ ബ...

കൊച്ചി : കേരള സ്റ്റോറിയുടെ രണ്ടാം ഭാഗമായ 'ദ കേരള സ്റ്റോറി 2: ഗോസ് ബിയോണ്ട്' എന്ന ചിത്രത്തിൻ്റെ പ്രദർശനത്തിന് കേരള ഹൈക്കോടതി ഡിവിഷൻ ബെഞ്ച് അനുമതി നൽകി. ഇന്നലെ ചിത്രത്തിൻ്റെ റിലീസ് 15 ദിവസത്തേക്ക് തടഞ്ഞുകൊണ്ട് സിംഗിൾ ബെഞ്ച് പുറപ്പെടുവിച്ച ഉത്തരവ് ഡിവിഷൻ ബെഞ്ച് സ്റ്റേ ചെയ്യുകയായിരുന്നു.

കേരളത്തെയും ഇവിടുത്തെ ജനങ്ങളെയും സിനിമ മോശമായി ചിത്രീകരിക്കുന്നു എന്ന ആരോപണങ്ങള്‍ നിലനില്‍ക്കെയാണ് ഈ ഉത്തരവ്.

സിനിമയുടെ റിലീസ് 15 ദിവസത്തേക്ക് തടഞ്ഞുകൊണ്ടുള്ള സിംഗിള്‍ ബെഞ്ചിന്റെ ഇടക്കാല ഉത്തരവിനെതിരെ നിര്‍മ്മാതാവ് വിപുല്‍ അമൃത്ലാല്‍ ഷാ സമര്‍പ്പിച്ച അപ്പീലിലാണ് ഡിവിഷന്‍ ബെഞ്ചിന്റെ ഈ തീരുമാനം. സെന്‍സര്‍ ബോര്‍ഡ് സിനിമയ്ക്ക് അനുമതി നല്‍കിയിട്ടും സിംഗിള്‍ ബെഞ്ച് റിലീസ് സ്റ്റേ ചെയ്തിരുന്നു.

ജസ്റ്റിസ് സുശ്രുത് അരവിന്ദ് ധർമ്മാധികാരി, ജസ്റ്റിസ് പി.വി. ബാലകൃഷ്ണൻ എന്നിവരടങ്ങിയ ബെഞ്ചാണ് നിർമ്മാതാക്കളുടെ അപ്പീൽ പരിഗണിച്ച് ഈ ഉത്തരവിട്ടത്. ചിത്രത്തിൻ്റെ ടീസറും ട്രെയിലറും സിനിമയുടെ ഭാഗമല്ലെന്ന നിർമ്മാതാക്കളുടെ വാദം കോടതി കണക്കിലെടുത്തു. കൂടാതെ, സിംഗിൾ ബെഞ്ചിന് ഇത്തരം ഹർജികൾ പരിഗണിക്കാൻ അധികാരമുണ്ടോ എന്ന കാര്യത്തിലും ഡിവിഷൻ ബെഞ്ച് സംശയം പ്രകടിപ്പിച്ചു.

ടീസര്‍ പുറത്തിറങ്ങിയത് മുതല്‍ സിനിമ വിവാദത്തിലായിരുന്നു. ഇത് യഥാര്‍ത്ഥ സംഭവങ്ങളെ ആസ്പദമാക്കിയുള്ളതാണെന്നാണ് അണിയറപ്രവര്‍ത്തകരുടെ അവകാശവാദം. സിനിമയുടെ യു/എ  സര്‍ട്ടിഫിക്കറ്റ് റദ്ദാക്കണമെന്ന് ആവശ്യപ്പെട്ട് ശ്രീദേവ് നമ്പൂതിരി എന്നയാളാണ് കോടതിയെ സമീപിച്ചത്. സിനിമ കേരളത്തെ മോശമായി ചിത്രീകരിക്കുന്നുവെന്നും വര്‍ഗീയ സൗഹാര്‍ദ്ദത്തിന് വിള്ളലുണ്ടാക്കുമെന്നും ഹര്‍ജിയില്‍ ആരോപിച്ചിരുന്നു.

കാമാഖ്യ നാരായണ്‍ സിംഗ് സംവിധാനം ചെയ്ത ഈ ചിത്രം സണ്‍ഷൈന്‍ പിക്‌ചേഴ്‌സിന്റെ ബാനറിലാണ് നിര്‍മ്മിച്ചിരിക്കുന്നത്.

സെൻസർ ബോർഡ് (CBFC) നിയമങ്ങൾ പാലിക്കാതെയാണ് സർട്ടിഫിക്കറ്റ് നൽകിയതെന്ന് ചൂണ്ടിക്കാട്ടിയാണ് സിംഗിൾ ബെഞ്ച് നേരത്തെ പ്രദർശനം തടഞ്ഞിരുന്നത്. 

Key Words : Kerala Story