കേവല ഭൂരിപക്ഷം കടന്ന് ബിഎൻപി സഖ്യം ; ബംഗ്ലാദേശിൽ 36 വർഷത്തിന് ശേഷം ആദ്യ പുരുഷ പ്രധാനമന്ത്രിയാകാൻ താരിഖ് റഹ്‌മാൻ

ധാക്ക: വ്യാഴാഴ്ച നടന്ന ബംഗ്ലാദേശ് പാർലമെന്റ് തിരഞ്ഞെടുപ്പിൽ താരിഖ് റഹ്‌മാന്റെ നേതൃത്വത്തിലുള്ള ബംഗ്ലാദേശ് നാഷണലിസ്റ്റ് പാർട്ടി (BNP) വൻ വിജയ...

ധാക്ക: വ്യാഴാഴ്ച നടന്ന ബംഗ്ലാദേശ് പാർലമെന്റ് തിരഞ്ഞെടുപ്പിൽ താരിഖ് റഹ്‌മാന്റെ നേതൃത്വത്തിലുള്ള ബംഗ്ലാദേശ് നാഷണലിസ്റ്റ് പാർട്ടി (BNP) വൻ വിജയം നേടി. 18 മാസത്തെ ഇടക്കാല ഭരണത്തിന് ശേഷം നടന്ന ഈ തിരഞ്ഞെടുപ്പിൽ കേവല ഭൂരിപക്ഷം (150 സീറ്റുകൾ) കടന്ന ബിഎൻപി സഖ്യം ഏകദേശം 212-213 സീറ്റുകൾ സ്വന്തമാക്കി അധികാരത്തിലേക്ക് തിരിച്ചെത്തുകയാണ്. 

ഈ വിജയത്തോടെ 36 വർഷത്തിന് ശേഷം ബംഗ്ലാദേശിന് ആദ്യത്തെ പുരുഷ പ്രധാനമന്ത്രിയായി താരിഖ് റഹ്‌മാൻ ചുമതലയേൽക്കും. ആകെ 299 സീറ്റുകളിലേക്ക് നടന്ന വോട്ടെടുപ്പിൽ ബിഎൻപിയും സഖ്യകക്ഷികളും 212-ലധികം സീറ്റുകൾ നേടി വൻ മുന്നേറ്റം നടത്തി. പ്രധാന എതിരാളികളായ ജമാഅത്തെ ഇസ്‌ലാമി സഖ്യത്തിന് 76-78 സീറ്റുകൾ മാത്രമാണ് ലഭിച്ചത്.

മുൻ പ്രധാനമന്ത്രി ഖാലിദ സിയയുടെ മകനായ താരിഖ് റഹ്‌മാൻ, 17 വർഷത്തെ ലണ്ടനിലെ പ്രവാസ ജീവിതത്തിന് ശേഷം കഴിഞ്ഞ ഡിസംബറിലാണ് രാജ്യത്ത് തിരിച്ചെത്തിയത്. അദ്ദേഹം മത്സരിച്ച ധാക്ക-17, ബോഗുറ-6 എന്നീ രണ്ട് മണ്ഡലങ്ങളിലും വൻ ഭൂരിപക്ഷത്തോടെ വിജയിച്ചു.

താരിഖ് റഹ്‌മാനെ ഫോണിൽ വിളിച്ച് പ്രധാനമന്ത്രി നരേന്ദ്ര മോദി അഭിനന്ദനങ്ങൾ അറിയിച്ചു. ജനാധിപത്യപരവും പുരോഗമനപരവുമായ ബംഗ്ലാദേശിനായി ഇന്ത്യയുടെ പൂർണ്ണ പിന്തുണ അദ്ദേഹം വാഗ്ദാനം ചെയ്തു.

ഷെയ്ഖ് ഹസീനയുടെ പുറത്താക്കലിന് ശേഷം നടന്ന ആദ്യ പൊതുതിരഞ്ഞെടുപ്പായിരുന്നു ഇത്. ഹസീനയുടെ പാർട്ടിയായ ആവാമി ലീഗിനെ തിരഞ്ഞെടുപ്പിൽ മത്സരിക്കുന്നതിൽ നിന്ന് വിലക്കിയിരുന്നു. തിരഞ്ഞെടുപ്പിനൊപ്പം നടന്ന ഭരണഘടനാ പരിഷ്കരണ ഹിതപരിശോധനയിലും ("July Charter") ഭൂരിഭാഗം ജനങ്ങളും അനുകൂലമായി വോട്ട് ചെയ്തു. 

വിജയാഘോഷങ്ങൾ ഒഴിവാക്കി രാജ്യത്തിന്റെ സമാധാനത്തിനായി പ്രാർത്ഥനകൾ നടത്താൻ താരിഖ് റഹ്‌മാൻ അണികളോട് ആഹ്വാനം ചെയ്തിട്ടുണ്ട്. 

Key Words : BNP , Tariq Rahman, Bangladesh, Prime Minister