ഇറാനിലെ ആക്രമണം; അങ്ങേയറ്റം ആശങ്കയെന്ന് ഇന്ത്യ, സംയമനം പാലിക്കണമെന്നും സംഘർഷം കൂടുതൽ വഷളാക്കുന്നത് ഒഴിവാക്കണമെന്നും ആവശ്യം

ന്യൂഡൽഹി: ഇറാനിൽ ഇസ്രയേലും അമേരിക്കയും ചേർന്ന് നടത്തിയ ആക്രമണങ്ങളിൽ ഇന്ത്യ "അങ്ങേയറ്റം ആശങ്ക" രേഖപ്പെടുത്തി. വിദേശകാര്യ മന്ത്രാലയം...

ന്യൂഡൽഹി: ഇറാനിൽ ഇസ്രയേലും അമേരിക്കയും ചേർന്ന് നടത്തിയ ആക്രമണങ്ങളിൽ ഇന്ത്യ "അങ്ങേയറ്റം ആശങ്ക" രേഖപ്പെടുത്തി. വിദേശകാര്യ മന്ത്രാലയം പുറത്തിറക്കിയ ഔദ്യോഗിക പ്രതികരണത്തിലാണ് ആശങ്ക രേഖപ്പെടുത്തിയത്. എല്ലാ കക്ഷികളും അങ്ങേയറ്റത്തെ സംയമനം പാലിക്കണമെന്നും സംഘർഷം കൂടുതൽ വഷളാക്കുന്നത് ഒഴിവാക്കണമെന്നും ഇന്ത്യ ആവശ്യപ്പെട്ടു.

എല്ലാ രാജ്യങ്ങളുടെയും പരമാധികാരവും പ്രാദേശിക അഖണ്ഡതയും മാനിക്കപ്പെടണമെന്ന് ഇന്ത്യ ഊന്നിപ്പറഞ്ഞു. പ്രശ്നങ്ങൾ പരിഹരിക്കാൻ ചർച്ചകളുടേയും നയതന്ത്രത്തിന്റേയും പാത സ്വീകരിക്കണം. സാധാരണക്കാരുടെ സുരക്ഷയ്ക്ക് മുൻഗണന നൽകണം.

ഇറാനിലും ഗൾഫ് മേഖലയിലുമുള്ള ഇന്ത്യൻ പൗരന്മാരുടെ സുരക്ഷ ഉറപ്പാക്കാൻ വിദേശകാര്യ മന്ത്രാലയം ജാഗ്രതാ നിർദ്ദേശം പുറപ്പെടുവിച്ചു. അനാവശ്യ യാത്രകൾ ഒഴിവാക്കാനും എംബസികളുമായി സമ്പർക്കം പുലർത്താനും നിർദ്ദേശിച്ചിട്ടുണ്ട്. 

സംഭവത്തിന് തൊട്ടുമുൻപത്തെ ദിവസങ്ങളിൽ പ്രധാനമന്ത്രി നരേന്ദ്ര മോദി ഇസ്രയേൽ സന്ദർശിച്ചിരുന്നു. മേഖലയിലെ സ്ഥിതിഗതികൾ ഇന്ത്യ സൂക്ഷ്മമായി നിരീക്ഷിച്ചു വരികയാണെന്ന് വിദേശകാര്യ മന്ത്രാലയം അറിയിച്ചു.

Key Words : Attack in Iran, India,