ലണ്ടന്‍-ബംഗളൂരു എയര്‍ ഇന്ത്യ ബോയിംഗ് 787-8 ഡ്രീംലൈനര്‍ വിമാനത്തിലെ ഇന്ധന നിയന്ത്രണ സ്വിച്ച് ഓഫായി, വിമാനം ഗ്രൗണ്ട് ചെയ്തു, അന്വേഷണം

സ്വന്തം ലേഖകന്‍ ന്യൂഡല്‍ഹി: ലണ്ടനില്‍ നിന്ന് ബംഗളൂരുവിലേക്ക് വരികയായിരുന്ന എയര്‍ ഇന്ത്യയുടെ ബോയിംഗ് 787-8 ഡ്രീംലൈനര്‍ വിമാനത്തിലെ ഇന്ധന നിയന...

സ്വന്തം ലേഖകന്‍

ന്യൂഡല്‍ഹി: ലണ്ടനില്‍ നിന്ന് ബംഗളൂരുവിലേക്ക് വരികയായിരുന്ന എയര്‍ ഇന്ത്യയുടെ ബോയിംഗ് 787-8 ഡ്രീംലൈനര്‍ വിമാനത്തിലെ ഇന്ധന നിയന്ത്രണ സ്വിച്ചില്‍ പൈലറ്റ് തകരാര്‍ കണ്ടെത്തി. ഇതിനെത്തുടര്‍ന്ന് വിമാനം നിലത്തിറക്കി വിശദമായ പരിശോധനയ്ക്ക് വിധേയമാക്കി.

എയര്‍ ഇന്ത്യയുടെ ബോയിംഗ് 787 ഡ്രീംലൈനര്‍ വിമാനത്തിന്റെ എന്‍ജിന്‍ സ്റ്റാര്‍ട്ട് ചെയ്യുന്നതിനിടെ, ഇന്ധന നിയന്ത്രണ സ്വിച്ച് 'റണ്‍' പൊസിഷനില്‍ നില്‍ക്കാതെ രണ്ടുതവണ 'കട്ട് ഓഫ്'  പൊസിഷനിലേക്ക് മാറിയതിനെത്തുടര്‍ന്നാണ് വിമാനം താഴെയിറക്കിയത്. തിങ്കളാഴ്ച ലണ്ടനിലെ ഹീത്രൂവില്‍ നിന്ന് ബെംഗളൂരുവിലെത്തിയ എഐ 132 വിമാനത്തിലാണ് ഈ പ്രശ്‌നം ശ്രദ്ധയില്‍പ്പെട്ടതെന്ന് എയര്‍ ഇന്ത്യ വക്താവ് അറിയിച്ചു.

'ഒരു പൈലറ്റ് ബോയിംഗ് 787-8 വിമാനത്തിന്റെ ഇന്ധന നിയന്ത്രണ സ്വിച്ചില്‍ തകരാര്‍ റിപ്പോര്‍ട്ട് ചെയ്ത കാര്യം ഞങ്ങളുടെ ശ്രദ്ധയില്‍പ്പെട്ടിട്ടുണ്ട്. പ്രാഥമിക വിവരങ്ങള്‍ ലഭിച്ചയുടന്‍ ഞങ്ങള്‍ വിമാനം സര്‍വീസില്‍ നിന്ന് മാറ്റി നിര്‍ത്തുകയും, നിര്‍മ്മാതാക്കളായ ബോയിംഗിനെ വിവരമറിയിച്ച് മുന്‍ഗണനാ അടിസ്ഥാനത്തില്‍ പരിശോധനകള്‍ നടത്തുകയും ചെയ്യുന്നു,' എയര്‍ ഇന്ത്യ വക്താവ് വ്യക്തമാക്കി.

വ്യോമയാന നിയന്ത്രണ ഏജന്‍സിയായ ഡിജിസിഎയുടെ നിര്‍ദ്ദേശപ്രകാരം എയര്‍ ഇന്ത്യയുടെ പക്കലുള്ള എല്ലാ ബോയിംഗ് 787 വിമാനങ്ങളിലെയും ഇന്ധന സ്വിച്ചുകള്‍ പരിശോധിച്ചു. എന്നാല്‍ മറ്റ് വിമാനങ്ങളില്‍ പ്രശ്‌നങ്ങളൊന്നും കണ്ടെത്തിയില്ല. വിമാന നിര്‍മ്മാതാക്കളായ ബോയിംഗ് ഈ വിഷയത്തില്‍ എയര്‍ ഇന്ത്യയുമായി സഹകരിക്കുന്നുണ്ടെന്നും പരിശോധനകള്‍ക്ക് പിന്തുണ നല്‍കുന്നുണ്ടെന്നും അറിയിച്ചു.

കഴിഞ്ഞ വര്‍ഷം അഹമ്മദാബാദില്‍ നടന്ന എയര്‍ ഇന്ത്യ വിമാനാപകടത്തിന്റെ പശ്ചാത്തലത്തിലാണ് ഈ സംഭവം ഗൗരവമായി കാണുന്നത്. അന്ന് വിമാനം പറന്നുയര്‍ന്ന ഉടനെ എന്‍ജിനുകളുടെ പ്രവര്‍ത്തനം നിലച്ച് ഹോസ്റ്റല്‍ കെട്ടിടത്തിന് മുകളില്‍ തകര്‍ന്നു വീഴുകയും 260 പേര്‍ മരിക്കുകയും ചെയ്തിരുന്നു. ആ അപകടത്തിലും ഇന്ധന സ്വിച്ചുകളിലെ തകരാര്‍ സംശയിക്കപ്പെട്ടിരുന്നു. ഇതിനെക്കുറിച്ച് സ്വതന്ത്രമായ അന്വേഷണം വേണമെന്ന് അന്നത്തെ പൈലറ്റിന്റെ കുടുംബം ആവശ്യപ്പെട്ടിട്ടുണ്ട്.

2025 ജൂലൈയില്‍ പുറത്തുവന്ന പ്രാഥമികാന്വേഷണ റിപ്പോര്‍ട്ടില്‍ നിര്‍ണ്ണായക വിവരങ്ങളുണ്ടായിരുന്നു. വിമാനം പറന്നുയര്‍ന്നതിന് തൊട്ടുപിന്നാലെ എന്‍ജിന്‍ ഫ്യൂവല്‍ കണ്‍ട്രോള്‍ സ്വിച്ചുകള്‍ താനേ 'കട്ട് ഓഫ്' പൊസിഷനിലേക്ക് മാറുകയും എന്‍ജിനിലേക്കുള്ള ഇന്ധനമൊഴുക്ക് തടസ്സപ്പെടുകയും ചെയ്തതായി കണ്ടെത്തിയിരുന്നു.

എന്താണ് ഇന്ധന നിയന്ത്രണ സ്വിച്ചുകള്‍

വിമാനത്തിന്റെ എന്‍ജിനുകളിലേക്കുള്ള ഇന്ധന പ്രവാഹത്തെ നിയന്ത്രിക്കുന്ന സ്വിച്ചുകളാണിവ. നിലത്തുവച്ച് എന്‍ജിന്‍ സ്റ്റാര്‍ട്ട് ചെയ്യാനും ഓഫ് ചെയ്യാനും, അതുപോലെ പറക്കലിനിടയില്‍ എന്‍ജിന്‍ തകരാര്‍ സംഭവിച്ചാല്‍ സ്വമേധയാ പ്രവര്‍ത്തിപ്പിക്കാനുമാണ് ഇവ ഉപയോഗിക്കുന്നത്. ബോയിംഗ് 787-ല്‍ ത്രസ്റ്റ് ലിവറുകള്‍ക്ക് താഴെയാണ് ഈ രണ്ട് സ്വിച്ചുകള്‍ സ്ഥിതി ചെയ്യുന്നത്.

ഇവ സ്പ്രിംഗ് ഘടിപ്പിച്ചവയാണ്. അതിനാല്‍ ഒരു പ്രത്യേക പൊസിഷനില്‍ നിന്നാല്‍ അവ മാറാന്‍ പാടില്ല. 'റണ്ണില്‍' നിന്ന് 'കട്ട് ഓഫിലേക്ക്' മാറ്റണമെങ്കില്‍ പൈലറ്റ് സ്വിച്ച് ആദ്യം മുകളിലേക്ക് വലിച്ചതിന് ശേഷം മാത്രമേ നീക്കാന്‍ സാധിക്കൂ. അതുകൊണ്ട് തന്നെ പൈലറ്റ് അബദ്ധവശാല്‍ ഇത് മാറ്റാന്‍ സാധ്യതയില്ലെന്ന് വിദഗ്ധര്‍ പറയുന്നു.

അഹമ്മദാബാദ് അപകടസമയത്ത്, വിമാനം ഉയര്‍ന്ന് നിമിഷങ്ങള്‍ക്കുള്ളില്‍ രണ്ട് എന്‍ജിനുകളുടെയും സ്വിച്ചുകള്‍ ഒന്നൊന്നായി 'കട്ട് ഓഫ്' ആയതായി ഫ്‌ലൈറ്റ് റെക്കോര്‍ഡറില്‍ വ്യക്തമായിരുന്നു. സ്വിച്ച് എന്തിനാണ് ഓഫ് ചെയ്തതെന്ന് ഒരു പൈലറ്റ് ചോദിക്കുമ്പോള്‍, താന്‍ അത് ചെയ്തിട്ടില്ലെന്ന് മറ്റേ പൈലറ്റ് മറുപടി നല്‍കുന്നതും കോക്പിറ്റ് വോയിസ് റെക്കോര്‍ഡറിലുണ്ട്.

വിമാനം വായുവിലായിരിക്കുമ്പോള്‍ സ്വിച്ച് അബദ്ധത്തില്‍ 'കട്ട് ഓഫി' ലേക്ക് പോയി ഉടന്‍ തന്നെ 'റണ്‍' ലേക്ക് തിരിച്ചുവന്നാല്‍, എന്‍ജിന്‍ താനേ വീണ്ടും സ്റ്റാര്‍ട്ട് ആകാനുള്ള സാങ്കേതികവിദ്യ ഇതിലുണ്ട്.

അന്വേഷണത്തിലെ ആശങ്കകള്‍

അഹമ്മദാബാദ് അപകടത്തില്‍ പൈലറ്റുമാര്‍ സ്വിച്ച് തൊട്ടിട്ടില്ലെന്ന് പറയുമ്പോഴും സ്വിച്ചുകള്‍ താനേ 'കട്ട് ഓഫ്' പൊസിഷനിലേക്ക് മാറിയത് വലിയൊരു സാങ്കേതിക പിഴവിലേക്കാണ് വിരല്‍ ചൂണ്ടുന്നത്. ഇപ്പോള്‍ ബെംഗളൂരുവില്‍ റിപ്പോര്‍ട്ട് ചെയ്ത സമാനമായ തകരാര്‍ കാരണമാണ് വിമാനം അടിയന്തരമായി പരിശോധനയ്ക്കായി മാറ്റിയത്.

വിമാനം പറന്നുയരുന്ന സമയത്തോ ലാന്‍ഡ് ചെയ്യുന്ന സമയത്തോ ആണ് ഇത്തരം തകരാറുകള്‍ സംഭവിക്കുന്നതെങ്കില്‍ അത് അതീവ അപകടകരമാണ്. 'കട്ട് ഓഫ്' പൊസിഷനിലേക്ക് സ്വിച്ച് മാറിയാല്‍ നിമിഷങ്ങള്‍ക്കകം എന്‍ജിന്‍ നിശ്ചലമാകും.

ഉയരം കുറഞ്ഞ അവസ്ഥയില്‍ എന്‍ജിന്‍ നിലച്ചാല്‍ വിമാനം സുരക്ഷിതമായി തിരിച്ചു ലാന്‍ഡ് ചെയ്യിക്കാന്‍ പൈലറ്റുമാര്‍ക്ക് സമയം ലഭിക്കില്ല.

ബോയിംഗ് 787 ഡ്രീംലൈനര്‍ ലോകത്തിലെ തന്നെ ഏറ്റവും ആധുനികമായ വിമാനങ്ങളില്‍ ഒന്നാണ്. ഇതിലെ ഇന്ധന നിയന്ത്രണ സ്വിച്ചുകള്‍ ഇലക്ട്രോണിക് സംവിധാനങ്ങളുമായി നേരിട്ട് ബന്ധിക്കപ്പെട്ടിരിക്കുന്നു.

സ്വിച്ച് തനിയെ ചലിക്കാതിരിക്കാന്‍ അതിനുള്ളില്‍ ശക്തമായ സ്പ്രിംഗ് ലോക്കുകള്‍ ഉണ്ട്. അത് 'ഫെയില്‍' ആകുക എന്നാല്‍ സ്വിച്ച് ലൂസ് ആവുക എന്നാണ് അര്‍ത്ഥം.

ഓരോ തവണ സ്വിച്ച് മാറ്റുമ്പോഴും അത് വിമാനത്തിന്റെ കമ്പ്യൂട്ടറായ ഫുള്‍ അതോറിറ്റി ഡിജിറ്റല്‍ എന്‍ജിന്‍ കണ്‍ട്രോളിലേക്ക് സിഗ്‌നല്‍ അയയ്ക്കുന്നു.

Summary: An Air India Boeing 787 Dreamliner has been grounded after its fuel control switch failed to remain in the 'Run' position and moved to the 'Cutoff' position twice during engine startup. An Air India spokesperson confirmed that this issue was observed on flight AI 132, which arrived in Bengaluru from London Heathrow on Monday.

"We are aware that one of our pilots has reported a possible defect on the fuel control switch of a Boeing 787-8 aircraft. Upon receiving this initial information, we have grounded the aircraft and are involving the original equipment manufacturer (OEM), Boeing, to check the pilot's concerns on a priority basis," the spokesperson stated.