രാഹുലിനെതിരായ നിയമനടപടികളിൽ കോൺഗ്രസ് പാർട്ടിയോ അതിൻ്റെ നേതാക്കളോ ഒരിടത്തും തടസ്സമായി നിന്നിട്ടില്ല - ഷാഫി പറമ്പിൽ

തിരുവനന്തപുരം: യൂത്ത് കോൺഗ്രസ് സംസ്ഥാന മുൻ അധ്യക്ഷൻ രാഹുൽ മാങ്കൂട്ടത്തിൽ ഉൾപ്പെട്ട വിവാദങ്ങളുമായി ബന്ധപ്പെട്ട് കോൺഗ്രസ് പാർട്ടി സ്വീകരിച്ച ന...

തിരുവനന്തപുരം: യൂത്ത് കോൺഗ്രസ് സംസ്ഥാന മുൻ അധ്യക്ഷൻ രാഹുൽ മാങ്കൂട്ടത്തിൽ ഉൾപ്പെട്ട വിവാദങ്ങളുമായി ബന്ധപ്പെട്ട് കോൺഗ്രസ് പാർട്ടി സ്വീകരിച്ച നടപടികൾ വ്യക്തമാക്കി ഷാഫി പറമ്പിൽ എംപി. രാഹുലിനെതിരായ നിയമനടപടികളിൽ കോൺഗ്രസ് പാർട്ടിയോ അതിൻ്റെ നേതാക്കളോ ഒരിടത്തും തടസ്സമായി നിന്നിട്ടില്ലെന്നും അന്വേഷണവുമായി പൂർണമായി സഹകരിക്കുകയാണ് ചെയ്തതെന്നും അദ്ദേഹം മാധ്യമങ്ങളോട് പറഞ്ഞു.

ആരോപണം ഉയർന്ന ഉടൻ തന്നെ പാർട്ടിയുടെ ഉത്തരവാദിത്തം എന്ന നിലയിൽ രാഹുലിനെ സസ്പെൻഡ് ചെയ്തിരുന്നു. തുടർന്ന് പരാതി ലഭിച്ചപ്പോൾ അത് പൊലീസിന് കൈമാറുകയും പിന്നീട് അദ്ദേഹത്തെ പാർട്ടിയിൽ നിന്ന് പുറത്താക്കുകയും ചെയ്തു. നിയമപരമായ നടപടികൾ അതിൻ്റെ വഴിക്ക് പോകട്ടെ എന്നും സത്യസന്ധമായ കാര്യങ്ങൾ പുറത്തുവരട്ടെ എന്നുമാണ് പാർട്ടിയുടെ നിലപാട്. തെറ്റ് ചെയ്തിട്ടുണ്ടെങ്കിൽ നിയമം അതിനനുസരിച്ചുള്ള തീരുമാനമെടുക്കട്ടെ എന്നും ആരെയും സംരക്ഷിക്കാൻ പാർട്ടി കവചമായി നിൽക്കില്ലെന്നും അദ്ദേഹം വ്യക്തമാക്കി. 

കെപിസിസി പ്രസിഡൻ്റും പ്രതിപക്ഷ നേതാവും ഇക്കാര്യത്തിൽ നിലപാട് വ്യക്തമാക്കിക്കഴിഞ്ഞതാണ്. നിലവിൽ രാഹുൽ കോൺഗ്രസ് പാർട്ടിയുടെ ഭാഗമല്ല. താനുമായുള്ള വ്യക്തിപരമായ സൗഹൃദം രാഹുലിനെതിരായ പാർട്ടി നടപടികളെ ഒരിടത്തും ബാധിച്ചിട്ടില്ല. മറ്റ് രാഷ്ട്രീയ പ്രസ്ഥാനങ്ങൾ സമാന സാഹചര്യങ്ങളിൽ സ്വീകരിക്കുന്നതിനേക്കാൾ കൃത്യമായ നിലപാടാണ് കോൺഗ്രസ് ഈ വിഷയത്തിൽ കൈക്കൊണ്ടത്.

Key Words : The Congress Party, Legal Action, Rahul Mamkoottathil, Shafi Parambil