ശബരിമലയില്‍ സ്വര്‍ണം കൊള്ള സ്ഥിരീകരിച്ച് വി എസ് എസ് സി ശാസ്ത്രീയ പരിശോധനാ റിപ്പോര്‍ട്ട്, നടന്നത് കോടികളുള്ള തട്ടിപ്പ്

In a significant development in the Sabarimala gold theft case, the highly crucial scientific examination report has been handed over to the SIT

സ്വന്തം ലേഖകന്‍

തിരുവനന്തപുരം: ശബരിമല സ്വര്‍ണ്ണം മോഷണം നടന്നുവെന്നു സ്ഥിരീകരിക്കുന്ന ശാസ്ത്രീയ പരിശോധനാ റിപ്പോര്‍ട്ട് തിരുവനന്തപുരം വിക്രം സാരാഭായ് സ്‌പേസ് സെന്റര്‍ പ്രത്യേക അന്വേഷണ സംഘത്തിന് കൈമാറി.  ഈ റിപ്പോര്‍ട്ട് കൊല്ലം വിജിലന്‍സ് കോടതിയില്‍ സമര്‍പ്പിച്ചു.

ശബരിമല ശ്രീകോവിലിലെ ദ്വാരപാലക വിഗ്രഹങ്ങള്‍, വാതില്‍പ്പടികള്‍ എന്നിവയുള്‍പ്പെടെ 15 ഇടത്തുനിന്നു ശേഖലിച്ച സാമ്പിളുകളാണ് ശാസ്ത്രീയ പരിശോധനയ്ക്ക് വിധേയമാക്കിയത്.

ശ്രീകോവിലിലെ സ്വര്‍ണ്ണ പാളികള്‍ മാറ്റി സ്ഥാപിച്ചിട്ടുണ്ടോ എന്നും നിലവില്‍ എത്രത്തോളം സ്വര്‍ണ്ണം അവിടെ ബാക്കിയുണ്ട് എന്നും കൃത്യമായി കണ്ടെത്താനാണ് വി.എസ്.എസ്.സിയിലെ വിദഗ്ധരുടെ സഹായം തേടിയത്.

വിക്രം സാരാഭായ് സ്‌പേസ് സെന്റര്‍ നടത്തിയ ശാസ്ത്രീയ പരിശോധനയില്‍, ശബരിമലയിലെ സ്വര്‍ണ്ണത്തിന്റെ അളവില്‍ വന്‍ കുറവുണ്ടായതായി സ്ഥിരീകരിച്ചു. ശ്രീകോവിലിലെ കട്ടിളപ്പാളികളിലും ദ്വാരപാലക ശില്പങ്ങളിലും സ്വര്‍ണ്ണത്തിന്റെ അളവ് കുറഞ്ഞതായി ശാസ്ത്രീയ പരിശോധനയില്‍ കണ്ടെത്തി.

സ്വര്‍ണ്ണത്തിന്റെ പഴക്കം, പരിശുദ്ധി, അളവ് എന്നിവ അത്യാധുനിക എക്‌സ്-റേ ഫ്‌ലൂറസെന്‍സ്  സാങ്കേതികവിദ്യ ഉപയോഗിച്ചാണ് പരിശോധിച്ചത്. യഥാര്‍ത്ഥ സ്വര്‍ണ്ണപ്പാളികള്‍ മാറ്റി പകരം ചെമ്പ് പാളികളില്‍ സ്വര്‍ണ്ണം പൂശിയ കൃത്രിമ പാളികള്‍ സ്ഥാപിച്ചോ എന്ന് കണ്ടെത്താനായിരുന്നു ഈ പരിശോധന. 1998-ലെ സ്വര്‍ണ്ണത്തിന്റെ അളവുമായി താരതമ്യം ചെയ്തപ്പോഴാണ് ഈ കുറവ് വ്യക്തമായത്.

സീല്‍ ചെയ്ത കവറിലാണ് റിപ്പോര്‍ട്ട് കോടതിയില്‍ എത്തിയത്. ജനുവരി 19-ന് ഹൈക്കോടതിയില്‍ സമര്‍പ്പിക്കാനിരിക്കുന്ന അന്വേഷണ പുരോഗതി റിപ്പോര്‍ട്ടില്‍ ഈ കണ്ടെത്തലുകള്‍ ഉള്‍പ്പെടുത്തും. 

എഡിജിപി എച്ച്. വെങ്കിടേഷിന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് ഈ ശാസ്ത്രീയ റിപ്പോര്‍ട്ട് ഉള്‍പ്പെടുത്തിയുള്ള അന്വേഷണ പുരോഗതി റിപ്പോര്‍ട്ട് നാളെ (ജനുവരി 19) ഹൈക്കോടതിയില്‍ സമര്‍പ്പിക്കുക.

ശബരിമല ശ്രീകോവിലിലെ സ്വര്‍ണ്ണ പാളികളില്‍ തിരിമറി നടന്നുവെന്നും വലിയ അളവില്‍ സ്വര്‍ണ്ണം കടത്തപ്പെട്ടുവെന്നുമുള്ള ആരോപണത്തെത്തുടര്‍ന്നാണ് ഹൈക്കോടതിയുടെ മേല്‍നോട്ടത്തില്‍ അന്വേഷണം നടക്കുന്നത്. സ്വര്‍ണ്ണത്തിന്റെ ഗുണനിലവാരവും അളവും പരിശോധിച്ചതിലൂടെ മോഷണം നടന്നിട്ടുണ്ടോ എന്ന് ശാസ്ത്രീയമായി തെളിയിക്കാന്‍ സാധിക്കുമെന്നാണ് പോലീസ് കരുതുന്നത്.

സ്വര്‍ണ്ണപ്പാളികള്‍ കടത്തിയ ശേഷം പുതിയ അച്ചുകള്‍ നിര്‍മ്മിച്ച്, അവയില്‍ ചെമ്പ് ഉപയോഗിച്ച് പാളികള്‍ ഉണ്ടാക്കി സ്വര്‍ണ്ണം പൂശി തിരിച്ചെത്തിച്ചു എന്നാണ് അന്വേഷണ സംഘം സംശയിക്കുന്നത്. 'സുഭാഷ് കപൂര്‍ മോഡല്‍' പുരാവസ്തു കടത്ത് രീതി ഇതില്‍ പ്രയോഗിച്ചിട്ടുണ്ടോ എന്നും പോലീസ് പരിശോധിക്കുന്നു.

1998-ല്‍ വ്യവസായി വിജയ് മല്യ നല്‍കിയ 30.3 കിലോ സ്വര്‍ണ്ണവും 1900 കിലോ ചെമ്പും ഉപയോഗിച്ചാണ് പാളികള്‍ നിര്‍മ്മിച്ചത്. എന്നാല്‍ ഇപ്പോള്‍ അവിടെയുള്ള പല പാളികളും സ്വര്‍ണ്ണം പൂശിയ ചെമ്പ് കഷണങ്ങള്‍ മാത്രമാണെന്ന് റിപ്പോര്‍ട്ട് സൂചിപ്പിക്കുന്നു.

2019-ല്‍ പരിശോധനയ്ക്കായി ചെന്നൈയിലെ 'സ്മാര്‍ട്ട് ക്രിയേഷന്‍സ്' എന്ന സ്ഥാപനത്തിലേക്ക് കൊണ്ടുപോയ സ്വര്‍ണ്ണപ്പാളികള്‍ ഉരുക്കി ബാറുകളാക്കി മാറ്റിയെന്നും പകരം കൃത്രിമ പാളികള്‍ സ്ഥാപിച്ചുവെന്നും അന്വേഷണ സംഘം സംശയിക്കുന്നു.

ഇതിനിടെ, കേസിലെ പതിനൊന്നാം പ്രതിയും മുന്‍ ദേവസ്വം ബോര്‍ഡ് അംഗവുമായ കെ.പി. ശങ്കരദാസിനെ സ്വകാര്യ ആശുപത്രിയില്‍ നിന്ന് തിരുവനന്തപുരം മെഡിക്കല്‍ കോളേജ് കാര്‍ഡിയോളജി വിഭാഗത്തിലേക്ക് മാറ്റി. റിമാന്‍ഡിലായ അദ്ദേഹത്തിന്റെ ചികിത്സ സര്‍ക്കാര്‍ ആശുപത്രിയില്‍ മതിയെന്ന് ജയില്‍ ഡോക്ടര്‍ റിപ്പോര്‍ട്ട് നല്‍കിയതിനെത്തുടര്‍ന്നാണിത്. ഇദ്ദേഹം റിമാന്‍ഡിലാണ്.

മുന്‍ ദേവസ്വം ബോര്‍ഡ് അംഗങ്ങളായ കെ. രാഘവന്‍, അജയ് തറയില്‍ എന്നിവരെ ചോദ്യം ചെയ്യാനായി നോട്ടീസ് അയക്കാന്‍ സാധ്യതയുണ്ട്. 2017-ല്‍ കൊടിമരം മാറ്റിയതുമായി ബന്ധപ്പെട്ട ക്രമക്കേടുകളിലും ഇവരെ കേന്ദ്രീകരിച്ച് അന്വേഷണം നടക്കുന്നുണ്ട്.

തന്ത്രി കണ്ഠരര് രാജീവരരുടെ വീട്ടില്‍ നടത്തിയ റെയ്ഡില്‍ പഴയ കൊടിമരത്തിന്റെ ഭാഗമായ 'വാജിവാഹനം' (കുതിരയുടെ രൂപം) കണ്ടെത്തിയിരുന്നു. ഇത് തന്ത്രിക്ക് കൈമാറിയത് നിയമവിരുദ്ധമാണെന്ന് അന്വേഷണ സംഘം നിരീക്ഷിക്കുന്നു.

ഈ കേസ് ഏറ്റെടുക്കാന്‍ തയ്യാറാണെന്ന് സി.ബി.ഐ ഹൈക്കോടതിയെ അറിയിച്ചിട്ടുണ്ട്. മോഷണത്തിന് അന്താരാഷ്ട്ര ബന്ധങ്ങളുണ്ടെന്ന ആരോപണവും സ്വര്‍ണ്ണം വിദേശത്തേക്ക് കടത്തിയിട്ടുണ്ടോ എന്ന സംശയവുമാണ് സി.ബി.ഐ അന്വേഷണത്തിന് വഴിതുറക്കുന്നത്. നാളെ എസ്.ഐ.ടി സമര്‍പ്പിക്കുന്ന റിപ്പോര്‍ട്ട് പരിശോധിച്ച ശേഷം സി.ബി.ഐ അന്വേഷണത്തിന്റെ കാര്യത്തില്‍ ഹൈക്കോടതി അന്തിമ തീരുമാനമെടുക്കും.

എന്‍ഫോഴ്‌സ്‌മെന്റ് ഡയറക്ടറേറ്റും ഈ കേസില്‍ അന്വേഷണം ആരംഭിച്ചു കഴിഞ്ഞു. കള്ളപ്പണം വെളുപ്പിക്കല്‍ നിരോധന നിയമപ്രകാരം ഇ.ഡി കേസ് എടുത്തിട്ടുണ്ട്. സ്വര്‍ണ്ണം വിറ്റതിലൂടെ ലഭിച്ച പണം എങ്ങോട്ട് പോയി എന്നാണ് അവര്‍ പ്രധാനമായും അന്വേഷിക്കുന്നത്. കേസുമായി ബന്ധപ്പെട്ട എല്ലാ രേഖകളും പരിശോധിക്കാന്‍ കൊല്ലം വിജിലന്‍സ് കോടതി ഇ.ഡിക്ക് അനുമതി നല്‍കിയിട്ടുണ്ട്.

ഇതുവരെ ഈ കേസില്‍ 12 പേര്‍ അറസ്റ്റിലായിട്ടുണ്ട്. മുന്‍ ദേവസ്വം ബോര്‍ഡ് അംഗം കെ.പി. ശങ്കരദാസാണ് ഒടുവില്‍ അറസ്റ്റിലായത്. ശബരിമല തന്ത്രി കണ്ഠരര് രാജീവര്, മുന്‍ ദേവസ്വം ബോര്‍ഡ് പ്രസിഡന്റുമാരായ എ. പത്മകുമാര്‍, എന്‍. വാസു എന്നിവരും നിലവില്‍ ജുഡിഷ്യല്‍ കസ്റ്റഡിയിലാണ്.

Summary:  In a significant development in the Sabarimala gold theft case, the highly crucial scientific examination report has been handed over to the Special Investigation Team (SIT). The report, prepared by the Vikram Sarabhai Space Centre (VSSC) in Thiruvananthapuram, was submitted to the Kollam Vigilance Court.

Scientific Testing: The investigation involved testing 15 samples collected from the sanctum sanctorum (Sreekovil), including the Dwarapalaka (guardian deity) idols and the doorframes.

Verification of Gold: The primary objective was to determine if the original gold plates had been tampered with or replaced and to calculate the exact amount of gold currently remaining at the shrine.

Methodology: VSSC experts used advanced X-ray Fluorescence (XRF) technology to analyze the age, purity, and quantity of the gold, comparing it with the 1998 records.

Court Action: The report was submitted in a sealed cover. It will be included in the investigation progress report to be presented before the Kerala High Court on January 19, 2026.

The investigation, monitored by the High Court, was launched following allegations that a substantial amount of gold from the sanctum sanctorum had been smuggled out and replaced with replicas. The SIT suspects that the gold layers were removed and replaced with gold-plated copper replicas, a method similar to international antique smuggling patterns.