പുതുപ്പള്ളി മണ്ഡലത്തിൽ മറ്റൊരാളെ പരിഗണിക്കുകയാണെങ്കിൽ താൻ മാറിനിൽക്കാമെന്ന് ചാണ്ടി ഉമ്മൻ

തിരുവനന്തപുരം : വരുന്ന നിയമസഭാ തിരഞ്ഞെടുപ്പിൽ പുതുപ്പള്ളി മണ്ഡലത്തിൽ മറ്റൊരു സ്ഥാനാർത്ഥിയെ പരിഗണിക്കുകയാണെങ്കിൽ താൻ മാറിനിൽക്കാൻ തയ്യാറാണെന്...

തിരുവനന്തപുരം : വരുന്ന നിയമസഭാ തിരഞ്ഞെടുപ്പിൽ പുതുപ്പള്ളി മണ്ഡലത്തിൽ മറ്റൊരു സ്ഥാനാർത്ഥിയെ പരിഗണിക്കുകയാണെങ്കിൽ താൻ മാറിനിൽക്കാൻ തയ്യാറാണെന്ന് ചാണ്ടി ഉമ്മൻ എംഎൽഎ കോൺഗ്രസ് നേതൃത്വത്തെ അറിയിച്ചു. എഐസിസി ജനറൽ സെക്രട്ടറി ദീപാദാസ് മുൻഷിയെ ആണ് അദ്ദേഹം ഈ സന്നദ്ധത നേരിട്ട് അറിയിച്ചത്. പാർട്ടി മണ്ഡലത്തിൽ മറ്റൊരാളെയാണ് ആഗ്രഹിക്കുന്നതെങ്കിൽ താൻ തടസ്സമാകില്ലെന്നും മാറിനിൽക്കാമെന്നുമാണ് അദ്ദേഹം വ്യക്തമാക്കിയത്.

കഴിഞ്ഞ തദ്ദേശ തിരഞ്ഞെടുപ്പിൽ പുതുപ്പള്ളി മണ്ഡലത്തിലെ ഭൂരിഭാഗം പഞ്ചായത്തുകളിലും യുഡിഎഫിന് മികച്ച വിജയം നേടിക്കൊടുക്കുന്നതിൽ ചാണ്ടി ഉമ്മൻ നിർണ്ണായക പങ്കുവഹിച്ചിരുന്നു. അടുത്തിടെ നടന്ന പാലക്കാട് ഉപതിരഞ്ഞെടുപ്പ് പ്രചാരണ വേളയിൽ താൻ സംഘടനാപരമായി തഴയപ്പെട്ടുവെന്ന് ചാണ്ടി ഉമ്മൻ പരസ്യമായി പ്രതികരിച്ചിരുന്നു. കൂടാതെ, കെപിസിസി നേതൃത്വവുമായി ചില കാര്യങ്ങളിൽ അദ്ദേഹം അതൃപ്തി പ്രകടിപ്പിച്ചതായും റിപ്പോർട്ടുകളുണ്ട്.

2026-ലെ തിരഞ്ഞെടുപ്പ് പ്രവർത്തനങ്ങൾക്കായി കോൺഗ്രസ് ഇതിനകം കലണ്ടർ പുറത്തിറക്കിയിട്ടുണ്ട്. തദ്ദേശ തിരഞ്ഞെടുപ്പ് വിജയാഹ്ലാദത്തിനായി ഈ മാസം 19-ന് കൊച്ചിയിൽ നടക്കുന്ന മെഗാ പഞ്ചായത്ത് പരിപാടിയിൽ രാഹുൽ ഗാന്ധി പങ്കെടുക്കും. 

2023-ലെ ഉപതിരഞ്ഞെടുപ്പിൽ പിതാവ് ഉമ്മൻ ചാണ്ടിയുടെ റെക്കോർഡ് ഭൂരിപക്ഷവും മറികടന്നാണ് ചാണ്ടി ഉമ്മൻ നിയമസഭയിലെത്തിയത്.

Key Words : Chandy Oommen, Puthuppally Constituency