പുടിന്‍ ഡല്‍ഹിയില്‍, വിമാനത്താവളത്തിലെത്തി സ്വീകരിച്ചു മോഡി, ഇന്ത്യ-റഷ്യ ബന്ധം പുതിയ ഉയരങ്ങളിലേക്ക്, ആശങ്കയോടെ ട്രംപ് ഭരണകൂടം

Putin Arrives in Delhi, Modi Receives Him at Airport, India-Russia Relations to New Heights, Trump Administration Worried

ന്യൂഡല്‍ഹിയിലെ പാലം എയര്‍ഫോഴ്സ് ബേസില്‍ വന്നിറങ്ങിയ റഷ്യന്‍ പ്രസിഡന്റ് വ്‌ലാഡിമിര്‍ പുടിനും പ്രധാനമന്ത്രി നരേന്ദ്ര മോഡിയും ഒരു കാറില്‍ പുറത്തേയ്ക്ക്‌

സ്വന്തം ലേഖകന്‍

ന്യൂഡല്‍ഹി : രണ്ടു ദിവസത്തെ ഔദ്യോഗിക സന്ദര്‍ശനത്തിനായി ഇന്ത്യയിലെത്തിയ റഷ്യന്‍ പ്രസിഡന്റ് വ്‌ലാഡിമിര്‍ പുടിനെ വിമാനത്താവളത്തിലെത്തി പ്രധാനമന്ത്രി നരേന്ദ്ര മോഡി സ്വീകരിച്ചു.

ഇരുപത്തിമൂന്നാമത് ഇന്ത്യ-റഷ്യ വാര്‍ഷിക ഉച്ചകോടിയുടെ ഭാഗമായാണ് സന്ദര്‍ശനം. 2022-ല്‍ യുക്രെയ്ന്‍ യുദ്ധം ആരംഭിച്ച ശേഷം പുടിന്റെ ഇന്ത്യയിലേക്കുള്ള ആദ്യ ഔദ്യോഗിക യാത്രയാണിത്. 

ഇരു രാജ്യങ്ങളും തമ്മിലുള്ള തന്ത്രപരമായ പങ്കാളിത്തത്തിന്റെ 25-ാം വാര്‍ഷികം ആഘോഷിക്കുന്ന വേളയിലാണ് ഈ സന്ദര്‍ശനം എന്ന പ്രത്യേകതയുമുണ്ട്.

രാഷ്ട്രീയ, സാമ്പത്തിക, തന്ത്രപരമായ ബന്ധങ്ങള്‍ ഉറപ്പിക്കാന്‍ ലക്ഷ്യമിട്ടാണ് പുടിന്‍ എത്തുന്നത്. ഇന്ത്യയ്‌ക്കെതിരേ അമേരിക്ക ചുമത്തിയ വന്‍ തീരുവയുടെയുടെ പശ്ചാത്തലത്തില്‍ ഈ സന്ദര്‍ശനം കൂടുതല്‍ പ്രാധാന്യമര്‍ഹിക്കുന്നു. ഈ സന്ദര്‍ശനത്തിന്റെ അനന്തരഫലങ്ങള്‍ അമേരിക്ക ആശങ്കയോടെയാണ് വീക്ഷിക്കുന്നത്. ഉപരോധസമാനമായ തീരുവ അടിച്ചേല്‍പ്പിച്ചിട്ടും ഇന്ത്യന്‍ സമ്പദ് വ്യവസ്ഥ മുന്നോട്ടു കുതിക്കുന്നതില്‍ ട്രംപ് ഭരണകൂടം അസ്വസ്ഥരുമാണ്.

വൈകുന്നേരം പ്രധാനമന്ത്രി നരേന്ദ്ര മോഡി തന്റെ വസതിയായ 7, ലോക് കല്യാണ്‍ മാര്‍ഗില്‍ ആതിഥേയത്വം വഹിച്ച സ്വകാര്യ അത്താഴ വിരുന്നില്‍ പുടിന്‍ മുഖ്യാതിഥിയായി. വെള്ളി രാവിലെരാഷ്ട്രപതി ഭവനില്‍ ആചാരപരമായ സ്വീകരണം. രാവിലെ മഹാത്മാഗാന്ധിക്ക് ആദരാഞ്ജലി അര്‍പ്പിക്കാന്‍ രാജ്ഘട്ടില്‍ സന്ദര്‍ശനം നടത്തു.

പാലം എയര്‍ഫോഴ്സ് ബേസില്‍ വന്നിറങ്ങിയ റഷ്യന്‍ പ്രസിഡന്റ് വ്‌ലാഡിമിര്‍ പുടിനെ പ്രധാനമന്ത്രി നരേന്ദ്ര മോഡി സ്വീകരിക്കുന്നു

ഉച്ചയ്ക്ക് ഹൈദരാബാദ് ഹൗസില്‍ പ്രധാനമന്ത്രി മോഡിയുമായി 23-ാമത് ഇന്ത്യ-റഷ്യ ഉച്ചകോടി ചര്‍ച്ചകള്‍ നടക്കും. തുടര്‍ന്ന് വര്‍ക്കിംഗ് ലഞ്ച്. ഉച്ചയ്ക്ക് ശേഷം വ്യാപാര, നിക്ഷേപങ്ങള്‍ ചര്‍ച്ച ചെയ്യുന്ന ഇന്ത്യ-റഷ്യ ബിസിനസ് ഫോറത്തെ അഭിസംബോധന ചെയ്യും. വൈകുന്നേരം രാഷ്ട്രപതി ദ്രൗപദി മുര്‍മു ആതിഥേയത്വം വഹിക്കുന്ന ഔദ്യോഗിക വിരുന്ന്.ര ാത്രി വൈകി പുടിന്‍ ഇന്ത്യയില്‍ നിന്ന് പുറപ്പെടും.

ഇരു നേതാക്കള്‍ തമ്മിലുള്ള ചര്‍ച്ചകള്‍ക്ക് ശേഷം 10 അന്തര്‍ സര്‍ക്കാര്‍ ഉടമ്പടികള്‍ ഉള്‍പ്പെടെ നിരവധി ഉഭയകക്ഷി രേഖകളിലും 15 വാണിജ്യ കരാറുകളിലും ഒപ്പുവയ്ക്കുമെന്നാണ് പ്രതീക്ഷിക്കുന്നത്. റഷ്യ ബന്ധത്തിന്റെ കേന്ദ്രബിന്ദു പ്രതിരോധ സഹകരണമാണ്. വിതരണ സ്ഥിരത ഉറപ്പാക്കല്‍, ഭാവിയിലെ ഏറ്റെടുക്കലുകള്‍ എന്നിവ ചര്‍ച്ചകളില്‍ പ്രധാന വിഷയമാകും. റഷ്യയില്‍ നിന്നു കൂടുതല്‍ എസ്-400 എയര്‍ ഡിഫന്‍സ് സ്‌ക്വാഡ്രനുകള്‍ വാങ്ങുന്നതിനും, ഓര്‍ഡര്‍ ചെയ്ത യൂണിറ്റുകളുടെ വിതരണം വേഗത്തിലാക്കുന്നതിനും വേണ്ടിയുള്ള ഇന്ത്യയുടെ നിര്‍ദ്ദേശങ്ങള്‍ ചര്‍ച്ച ചെയ്യും. 

സന്ദര്‍ശനത്തിന് മുന്നോടിയായി റഷ്യന്‍ പാര്‍ലമെന്റ് പരസ്പര ലോജിസ്റ്റിക് സപ്പോര്‍ട്ട് കൈമാറ്റ ഉടമ്പടി അംഗീകരിച്ചു. സൈനിക രൂപീകരണങ്ങള്‍, യുദ്ധക്കപ്പലുകള്‍, വിമാനങ്ങള്‍ എന്നിവ പരസ്പരം രാജ്യങ്ങളിലേക്ക് അയയ്ക്കുന്നതിനുള്ള ലോജിസ്റ്റിക് പിന്തുണ ഈ ഉടമ്പടി ഉറപ്പുനല്കുന്നു. 

നൂതന ബ്രഹ്മോസ് മിസൈല്‍ വകഭേദങ്ങളുടെയും ഭാവിയില്‍ എസ്57 യുദ്ധവിമാനങ്ങളുടെയും സഹ-വികസനവും സഹ-നിര്‍മ്മാണവും സംബന്ധിച്ച ചര്‍ച്ചകള്‍ നടക്കും. ഇന്ത്യയില്‍ അറ്റകുറ്റപ്പണിക്കും നവീകരണത്തിനുമുള്ള സൗകര്യം സ്ഥാപിക്കാന്‍ റഷ്യ പദ്ധതിയിടുന്നുണ്ട്.

റഷ്യന്‍ എണ്ണയുടെ ഉയര്‍ന്ന ഇറക്കുമതി കാരണം റഷ്യയ്ക്ക് അനുകൂലമായി നില്‍ക്കുന്ന വലിയ വ്യാപാര അസന്തുലിതാവസ്ഥ (നിലവില്‍ ഏകദേശം 59 ബില്യണ്‍ ഡോളര്‍) പരിഹരിക്കുക എന്നിവയാണ് സന്ദര്‍ശനത്തിന്റെ പ്രധാന ലക്ഷ്യങ്ങള്‍. 

2030 വരെ റഷ്യന്‍-ഇന്ത്യന്‍ സാമ്പത്തിക സഹകരണത്തിന്റെ തന്ത്രപരമായ മേഖലകളുടെ വികസനത്തിനായുള്ള പരിപാടി എന്ന ദീര്‍ഘകാല പദ്ധതി അംഗീകരിക്കാന്‍ സാധ്യതയുണ്ട്. 2030-ഓടെ ഉഭയകക്ഷി വ്യാപാരം 100 ബില്യണ്‍ ഡോളറായി ഉയര്‍ത്തുകയാണ് ലക്ഷ്യം. 

വ്യാപാര കമ്മി കുറയ്ക്കുന്നതിനായി ഇന്ത്യന്‍ ഉല്‍പ്പന്നങ്ങള്‍ക്ക് വിപണിയില്‍ കൂടുതല്‍ പ്രവേശനം തേടാന്‍ ന്യൂഡല്‍ഹി ശ്രമിക്കുന്നു. ഇന്ത്യന്‍ കയറ്റുമതി വര്‍ദ്ധിപ്പിക്കാന്‍ ലക്ഷ്യമിടുന്ന മേഖലകള്‍: ഫാര്‍മസ്യൂട്ടിക്കല്‍സ്, കെമിക്കല്‍സ്, ഓട്ടോമൊബൈല്‍സ്, എഞ്ചിനീയറിംഗ് ഉല്‍പ്പന്നങ്ങള്‍കാര്‍ഷിക ഉല്‍പ്പന്നങ്ങള്‍, സമുദ്രോത്പന്നങ്ങള്‍

ഇന്ത്യയും യുറേഷ്യന്‍ ഇക്കണോമിക് യൂണിയനും തമ്മിലുള്ള സ്വതന്ത്ര വ്യാപാര കരാറിനായുള്ള ചര്‍ച്ചകള്‍ ആരംഭിക്കുന്നതിനെക്കുറിച്ചുള്ള ചര്‍ച്ചകള്‍ക്ക് സാധ്യതയുണ്ട്.

ഇതേസമയം, പ്രധാനമന്ത്രി നരേന്ദ്ര മോഡിയുടെ പാര്‍ലമെന്റ് മണ്ഡലമായ വാരാണസിയില്‍ റഷ്യന്‍ നേതാവിന്റെ ചിത്രത്തിന് മുന്നില്‍ സ്ത്രീകള്‍ ആരതി ഉഴിയുന്ന ഒരു വീഡിയോ വൈറലായിരിക്കുകയാണ്. ഇതിനെതിരേ സെബര്‍ ലോകത്ത് വന്‍ വിമര്‍ശനവും ഉയരുന്നുണ്ട്. പ്രദേശവാസികള്‍ ത്രിവര്‍ണ്ണ പതാക കൈയിലേന്തിയാണ് ആരതി നടത്തിയത്. വന്ദേ മാതരം, ഭാരത് മാതാ കീ ജയ്, ഇന്ത്യ-റഷ്യ സൗഹൃദം സിന്ദാബാദ് എന്നീ മുദ്രാവാക്യങ്ങളും മുഴക്കിയായിരുന്നു ആരതി. മുന്‍പ് യുഎസ് പ്രസിഡന്റ് ഡൊണാള്‍ഡ് ട്രംപിന്റെ സന്ദര്‍ശനത്തിന് മുമ്പ് അദ്ദേഹത്തിനായി യാഗങ്ങള്‍ സംഘടിപ്പിച്ചതു വാര്‍ത്തയായിട്ടുണ്ട്.

വിദഗ്ധരും അര്‍ദ്ധ വിദഗ്ധരുമായ ഇന്ത്യന്‍ തൊഴിലാളികള്‍ക്ക് റഷ്യയിലെ നിര്‍മ്മാണം, ആരോഗ്യ സംരക്ഷണം, ഹോസ്പിറ്റാലിറ്റി മേഖലകളിലേക്ക് പ്രവേശനം നല്‍കുന്ന ഒരു തൊഴില്‍ മൊബിലിറ്റി കരാര്‍ അന്തിമമാക്കാന്‍ സാധ്യതയുണ്ട്. റഷ്യന്‍ സര്‍ക്കാര്‍ ഉടമസ്ഥതയിലുള്ള ബ്രോഡ്കാസ്റ്ററായ ആര്‍ടി ടിവി ചാനല്‍ ഇന്ത്യയില്‍ ഔദ്യോഗികമായി ആരംഭിക്കുന്ന ചടങ്ങില്‍ പ്രസിഡന്റ് പുടിന്‍ പങ്കെടുക്കും. 

റഷ്യ-യുക്രെയ്ന്‍ സംഘര്‍ഷം സംഭാഷണത്തിലൂടെയും നയതന്ത്രത്തിലൂടെയും പ്രശ്‌നം പരിഹരിക്കണം എന്ന ഇന്ത്യയുടെ നിലപാട് പ്രധാനമന്ത്രി മോഡി ആവര്‍ത്തിക്കാന്‍ സാധ്യതയുണ്ട്. കൂടാതെ റഷ്യന്‍ സൈന്യത്തില്‍ സേവനം ചെയ്യുന്ന ഇന്ത്യന്‍ പൗരന്മാരെക്കുറിച്ചുള്ള ആശങ്കകള്‍ പരിഹരിക്കുന്നത് ഉള്‍പ്പെടെയുള്ള പ്രാദേശിക, ആഗോള വിഷയങ്ങള്‍ ചര്‍ച്ച ചെയ്യും.

Summary: By Our Correspondent New Delhi: Russian President Vladimir Putin, who arrived in India for a two-day official visit, was received by Prime Minister Narendra Modi at the airport.

The visit is part of the 23rd India-Russia Annual Summit. This is Putin's first official trip to India since the war in Ukraine began in 2022.

The visit is also significant as it coincides with the celebration of the 25th anniversary of the strategic partnership between the two countries.

Putin arrives with the goal of strengthening political, economic, and strategic ties. This visit gains further importance in the context of the huge tariffs imposed by America against India. The US is viewing the consequences of this visit with apprehension. The Trump administration is also uneasy over the continued progress of the Indian economy despite the imposition of sanctions-like tariffs.