ബംഗ്ലാദേശില്‍ വീണ്ടും അക്രമം: ഹിന്ദു യുവാവിനെ ആള്‍ക്കൂട്ടം മരത്തില്‍ കെട്ടിയിട്ട് അടിച്ചുകൊന്ന് തീക്കൊളുത്തി, ഇന്ത്യ നോക്കിനില്‍ക്കരുതെന്ന് പ്രിയങ്ക ഉള്‍പ്പെടെ നേതാക്കള്‍

Violence in Bangladesh again: Hindu youth beaten to death by mob; Priyanka Gandhi urge India not to remain a silent spectator

സ്വന്തം ലേഖകന്‍

ന്യൂഡല്‍ഹി: ഇന്ത്യാ വിരുദ്ധ തീവ്രവാദി നേതാവിന്റെ മരണത്തെത്തുടര്‍ന്ന് ബംഗ്ലാദേശില്‍ പൊട്ടിപ്പുറപ്പെട്ട പുതിയ അക്രമങ്ങളില്‍ ഒരു ഹിന്ദു യുവാവിനെ ഇസ്ലാം അനുകൂലികള്‍ തല്ലിക്കൊന്ന് കത്തിച്ചു. ഈ സംഭവം അയല്‍രാജ്യത്തെ ന്യൂനപക്ഷങ്ങളുടെ സുരക്ഷയെക്കുറിച്ചുള്ള ആശങ്കകള്‍ വീണ്ടും വര്‍ദ്ധിപ്പിച്ചിരിക്കുകയാണ്.

മൈമെന്‍സിംഗിലെ വസ്ത്രവ്യാപാര ശാലയില്‍ ജോലി ചെയ്തിരുന്ന ദിപു ചന്ദ്ര ദാസ് ആണ് വ്യാഴാഴ്ച രാത്രി കൊല്ലപ്പെട്ടത്. ഇസ്ലാം മതത്തെ അപമാനിച്ചു എന്നാരോപിച്ചായിരുന്നു മര്‍ദ്ദനം. കൊലപാതകത്തിന് ശേഷം ദിപുവിന്റെ മൃതദേഹം മരത്തില്‍ കെട്ടിയിട്ട് തീക്കൊളുത്തുകയും ആള്‍ക്കൂട്ടം ഇത് ആഘോഷമാക്കുകയും ചെയ്യുന്ന ഭീകര ദൃശ്യങ്ങള്‍ പുറത്തുവന്നു.

മകന്റെ മരണവാര്‍ത്ത ഫേസ്ബുക്കിലൂടെയാണ് അറിഞ്ഞതെന്നും ഇടക്കാല സര്‍ക്കാര്‍ നടപടി വാഗ്ദാനം ചെയ്യുന്നുണ്ടെങ്കിലും തങ്ങള്‍ക്ക് ഒരിടത്തുനിന്നും ഉറപ്പുകളൊന്നും ലഭിച്ചിട്ടില്ലെന്നും ദിപുവിന്റെ പിതാവ് രവിലാല്‍ ദാസ് പറഞ്ഞു. സംഭവവുമായി ബന്ധപ്പെട്ട് ഇതുവരെ ഏഴ് പേര്‍ അറസ്റ്റിലായിട്ടുണ്ട്.

തീവ്ര ഇസ്ലാമിസ്റ്റ് ഷരീഫ് ഒസ്മാന്‍ ഹാദിയുടെ വധത്തിന് നീതി തേടി നടന്ന പ്രതിഷേധങ്ങളാണ് അക്രമാസക്തമായത്. ഇതിനിടെ ധാക്കയിലെ പ്രധാന സ്ഥലങ്ങള്‍ പ്രതിഷേധക്കാര്‍ തകര്‍ത്തു.

അക്രമികള്‍, കൊല്ലപ്പെട്ട ദിപു ചന്ദ്ര ദാസ്

ഷാബാഗില്‍ നടന്ന പ്രതിഷേധം ജിഹാദി-തീവ്രവാദ ഘടകങ്ങളുടെ സംഗമമായി മാറുകയായിരുന്നുവെന്ന് മുന്‍ മന്ത്രി മുഹമ്മദ് അലി അറാഫത്ത് പറഞ്ഞു. അല്‍-ഖ്വയ്ദയുമായി ബന്ധമുള്ള അന്‍സാറുല്ല ബംഗ്ലാ ടീം തലവന്‍ ജസിമുദ്ദീന്‍ റഹ്മാനി അടക്കമുള്ളവര്‍ ഇതില്‍ പങ്കെടുത്തു.

പ്രതിഷേധക്കാര്‍ ഐസിസ് പതാകകള്‍ വീശുകയും ധാന്മോണ്ടി 32-ലെ ചരിത്രപ്രധാനമായ വസതിയുടെ അവശിഷ്ടങ്ങള്‍ തകര്‍ക്കാന്‍ ശ്രമിക്കുകയും ചെയ്തു.

ബംഗ്ലാദേശിലെ ന്യൂനപക്ഷങ്ങള്‍ക്കെതിരായ അക്രമങ്ങളില്‍ ഇന്ത്യയില്‍ നിന്ന് ശക്തമായ പ്രതിഷേധം ഉയര്‍ന്നിട്ടുണ്ട്. കോണ്‍ഗ്രസ് നേതാവ് പ്രിയങ്കാ ഗാന്ധി വദ്ര സംഭവത്തെ അതീവ ആശങ്കാജനകമെന്ന് വിശേഷിപ്പിച്ചു. 'ബംഗ്ലാദേശിലെ ഹിന്ദു യുവാവ് ദിപു ചന്ദ്ര ദാസിന്റെ ക്രൂരമായ കൊലപാതകം അങ്ങേയറ്റം ഭയപ്പെടുത്തുന്നതാണ്. അയല്‍രാജ്യത്തെ ഹിന്ദു, ക്രിസ്ത്യന്‍, ബുദ്ധ ന്യൂനപക്ഷങ്ങള്‍ക്കെതിരെ വര്‍ദ്ധിച്ചുവരുന്ന അക്രമങ്ങള്‍ ഇന്ത്യന്‍ സര്‍ക്കാര്‍ ഗൗരവമായി കാണണം. അവരുടെ സുരക്ഷാ പ്രശ്‌നം ബംഗ്ലാദേശ് സര്‍ക്കാരുമായി കര്‍ശനമായി സംസാരിക്കണം,' പ്രിയങ്ക ഗാന്ധി പറഞ്ഞു.

Hadi’s supporters held a sit-in at Shahbagh on Friday (19 December) demanding justice for the murder of Sharif Osman Hadi. The program later turned into a gathering dominated by jihadist and radical Islamist elements, with leaders such as Jasimuddin Rahmani and Ataur Rahman… pic.twitter.com/aMijTFdoLY

— Mohammad Ali Arafat (@MAarafat71) December 19, 2025

ആരാണ് ഒസ്മാന്‍ ഷരീഫ് ഹാദി?

ബംഗ്ലാദേശിലെ തീവ്ര നിലപാടുകളുള്ള ഒരു പ്രധാന രാഷ്ട്രീയ നേതാവായിരുന്നു ഒസ്മാന്‍ ഷരീഫ് ഹാദി. ഷെയ്ക് ഹസീനയെ പുറത്താക്കിയ കലാപത്തിലും ഇയാള്‍ വലിയ പങ്കുവഹിച്ചിരുന്നു. കടുത്ത ഇന്ത്യാ വിരുദ്ധ നിലപാടുകള്‍ക്കും ബംഗ്ലാദേശിലെ തീവ്ര ഇസ്ലാമിസ്റ്റ് ഗ്രൂപ്പുകള്‍ക്കിടയിലുള്ള സ്വാധീനത്തിനും അദ്ദേഹം അറിയപ്പെട്ടിരുന്നു. ബംഗ്ലാദേശ്, പശ്ചിമ ബംഗാള്‍, അസം എന്നിവയുള്‍പ്പെട്ട 'ഗ്രേറ്റര്‍ ബംഗ്ലാദേശ്' എന്ന ആശയത്തെ പിന്തുണച്ചിരുന്ന വ്യക്തികളില്‍ ഒരാളായിരുന്നു ഒസ്മാന്‍ ഷരീഫ് ഹാദി.

ബംഗ്ലാദേശില്‍ പൊതുതിരഞ്ഞെടുപ്പിന് മാസങ്ങള്‍ മാത്രം ബാക്കിനില്‍ക്കെയാണ് ഹാദി വെടിയേറ്റു കൊല്ലപ്പെട്ടത്. ഹാദിയുടെ മരണത്തിന് പിന്നില്‍ വിദേശ ശക്തികളാണെന്നും (പ്രത്യേകിച്ച് ഇന്ത്യ) ഷെയ്ഖ് ഹസീനയുടെ അനുയായികളാണെന്നും ആരോപിച്ച് അനുയായികള്‍ തെരുവിലിറങ്ങി. ഇവര്‍ക്കു തീ പകര്‍ന്നത് പാകിസ്ഥാന്‍ പിന്തുണയുള്ള തീവ്രവാദ ഗ്രൂപ്പുകളാണ്.

ഹാദിയുടെ വധം ബംഗ്ലാദേശിലെ ഇസ്ലാമിസ്റ്റ് ഹാര്‍ഡ്ലൈനര്‍മാരെ പ്രകോപിപ്പിക്കുകയും അവര്‍ രാജ്യത്തുടനീളം അക്രമങ്ങള്‍ അഴിച്ചുവിടുകയും ചെയ്തു. ഹാദിയുടെ മരണത്തിന് നീതി തേടി അദ്ദേഹത്തിന്റെ അനുയായികള്‍ നടത്തിയ പ്രതിഷേധങ്ങള്‍ പിന്നീട് വലിയ അക്രമങ്ങളിലേക്ക് വഴിമാറുകയായിരുന്നു. ഹാദിയുടെ കൊലപാതകത്തിന് പ്രതികാരമെന്നോണമാണ് മൈമെന്‍സിംഗില്‍ ദിപു ചന്ദ്ര ദാസ് എന്ന ഹൈന്ദവ യുവാവിനെ ആള്‍ക്കൂട്ടം തല്ലിക്കൊന്ന് തീക്കൊളുത്തിയത്.

ഹാദിയുടെ അനുയായികള്‍ ധാക്കയിലെ ഷാബാഗില്‍ സംഘടിക്കുകയും അത് ജിഹാദി ഗ്രൂപ്പുകളുടെ കൂടിച്ചേരലായി മാറുകയും ചെയ്തു. മുജീബുര്‍ റഹ്മാന്റെ സ്മരണാര്‍ത്ഥമുള്ള വസതി (ഉവമിാീിറശ 32) വീണ്ടും ആക്രമിക്കപ്പെട്ടതും ഇങ്ങനെയാണ്. ഇവിടെ ഐ എസ് പതാകകള്‍ ഏന്തിയാണ് അക്രമികള്‍ എത്തിയത്.

ഹാദിയുടെ അനുയായികള്‍ ഇന്ത്യ അനുകൂലമെന്ന് അവര്‍ വിശ്വസിക്കുന്ന മാധ്യമ സ്ഥാപനങ്ങള്‍ തകര്‍ക്കുകയും മാധ്യമപ്രവര്‍ത്തകരെ ആക്രമിക്കുകയും ചെയ്തു.

മുഹമ്മദ് യൂനസിന്റെ നേതൃത്വത്തിലുള്ള ഇടക്കാല സര്‍ക്കാര്‍ ഹാദിയുടെ വധത്തില്‍ അന്വേഷണം പ്രഖ്യാപിച്ചിട്ടുണ്ടെങ്കിലും, അദ്ദേഹത്തിന്റെ അനുയായികള്‍ നടത്തുന്ന അക്രമങ്ങള്‍ നിയന്ത്രിക്കാന്‍ മുഹമ്മദ് യൂനുസിന്റെ ഇടക്കാല സര്‍ക്കാരിന് സാധിക്കുന്നില്ലെന്ന വിമര്‍ശനം ശക്തമാണ്. ഹാദിയുടെ മരണം ബംഗ്ലാദേശിലെ ന്യൂനപക്ഷങ്ങള്‍ക്കെതിരെയുള്ള അതിക്രമങ്ങള്‍ വര്‍ദ്ധിപ്പിക്കാനുള്ള ഒരു ആയുധമായി തീവ്രവാദ ഗ്രൂപ്പുകള്‍ ഉപയോഗിക്കുന്നു എന്നാണ് അന്താരാഷ്ട്ര നിരീക്ഷകര്‍ വിലയിരുത്തുന്നത്.

Summary: Violence in Bangladesh again: Hindu youth beaten to death by mob after being tied to a tree and set on fire; leaders including Priyanka Gandhi urge India not to remain a silent spectator.

Key Words : Hindu Youth Killed, Killed by Mob, Blasphemy, Riots in Bangladesh