ആർഎസ്എസിനെയും ബിജെപിയെയും പുകഴ്ത്തി കോൺഗ്രസ് നേതാവ് ദിഗ് വിജയ് സിംഗ്, വിവാദം കൊഴുക്കുന്നു

ന്യൂഡൽഹി : മുതിർന്ന കോൺഗ്രസ് നേതാവും മുൻ മധ്യപ്രദേശ് മുഖ്യമന്ത്രിയുമായ ദിഗ്‌വിജയ് സിംഗ്  ആർ.എസ്.എസിനെ പുകഴ്ത്തി നടത്തിയ  പ്രസ്താവന  വൻ  വിവാ...

ന്യൂഡൽഹി : മുതിർന്ന കോൺഗ്രസ് നേതാവും മുൻ മധ്യപ്രദേശ് മുഖ്യമന്ത്രിയുമായ ദിഗ്‌വിജയ് സിംഗ്  ആർ.എസ്.എസിനെ പുകഴ്ത്തി നടത്തിയ  പ്രസ്താവന  വൻ  വിവാദത്തിൽ.

അദ്ദേഹം പങ്കുവച്ച ഒരു സോഷ്യൽ മീഡിയ പോസ്റ്റാണ് നിലവിലെ ചർച്ചാവിഷയം.

ബിജെപി നേതാവ് എൽ.കെ. അദ്വാനിയുടെ കാൽക്കൽ പ്രധാനമന്ത്രി നരേന്ദ്ര മോദി തറയിൽ ഇരിക്കുന്ന ഒരു പഴയ ബ്ലാക്ക് ആൻഡ് വൈറ്റ് ചിത്രം ദിഗ്‌വിജയ് സിംഗ് തന്റെ എക്സ്  അക്കൗണ്ടിൽ പങ്കുവച്ചിരുന്നു.
 

ആർ.എസ്.എസിലെ ഒരു സാധാരണ പ്രവർത്തകന് എങ്ങനെ ഒരു സംസ്ഥാനത്തിന്റെ മുഖ്യമന്ത്രിയായും പിന്നീട് രാജ്യത്തിന്റെ പ്രധാനമന്ത്രിയായും വളരാൻ കഴിയുന്നു എന്നത് ആ സംഘടനയുടെ കരുത്താണെന്ന് അദ്ദേഹം കുറിച്ചു. "ഇതാണ് സംഘടനാ ശക്തി" എന്നും അദ്ദേഹം ചിത്രത്തോടൊപ്പം എഴുതി.

പാർട്ടിയിലെ അധികാര വികേന്ദ്രീകരണത്തെക്കുറിച്ച് ദിഗ്‌വിജയ് സിംഗ് നേരത്തെ തന്നെ രാഹുൽ ഗാന്ധിക്ക് കത്തെഴുതിയിരുന്നു. ആർ.എസ്.എസിനെ പുകഴ്ത്തിയതിലൂടെ കോൺഗ്രസ് നേതൃത്വത്തിന് താഴെത്തട്ടിൽ ബന്ധമില്ലെന്ന പരോക്ഷ വിമർശനമാണ് അദ്ദേഹം ഉന്നയിച്ചതെന്ന് വിലയിരുത്തപ്പെടുന്നു. ബിജെപി നേതാക്കൾ ഈ പ്രസ്താവന കോൺഗ്രസിനെ പരിഹസിക്കാൻ ആയുധമാക്കുകയും ചെയ്തു.
 

പോസ്റ്റ് വിവാദമായതോടെ, താൻ ആർ.എസ്.എസ് നയങ്ങളെയല്ല, മറിച്ച് അവരുടെ സംഘടനാ രീതിയെയാണ് മാതൃകയായി ചൂണ്ടിക്കാട്ടിയതെന്ന് സിംഗ്  വിശദീകരിച്ചു.

ദിഗ്‌വിജയ് സിംഗ് മുൻപും പല തവണ തന്റെ പ്രസ്താവനകളിലൂടെ വാർത്തകളിൽ ഇടംപിടിച്ചിട്ടുണ്ട്.
 

പുൽവാമ ഭീകരാക്രമണത്തിന് തിരിച്ചടിയായി ഇന്ത്യ നടത്തിയ സർജിക്കൽ സ്ട്രൈക്കിന് തെളിവുണ്ടോ എന്ന് അദ്ദേഹം ചോദ്യം ചെയ്തിരുന്നു. ഇത് സൈന്യത്തെ അപമാനിക്കുന്നതാണെന്ന് പറഞ്ഞ് ബിജെപി ശക്തമായി രംഗത്തെത്തി. അന്ന് കോൺഗ്രസ് പാർട്ടി അദ്ദേഹത്തിന്റെ പ്രസ്താവനയെ തള്ളുകയും അത് വ്യക്തിപരമായ അഭിപ്രായം മാത്രമാണെന്ന് വ്യക്തമാക്കുകയും ചെയ്തു.
 

ഹിന്ദുത്വ എന്നത് ഒരു ധർമ്മമല്ലെന്നും അത് അക്രമമാണെന്നും അദ്ദേഹം ഒരിക്കൽ പ്രസ്താവിച്ചിരുന്നു. താൻ സനാതന ധർമ്മത്തിലാണ് വിശ്വസിക്കുന്നതെന്നും എന്നാൽ ബിജെപിയുടെ ഹിന്ദുത്വ രാഷ്ട്രീയം വിദ്വേഷം പടർത്തുന്നതാണെന്നും അദ്ദേഹം ആരോപിച്ചിരുന്നു.
 

 മുൻ ആർ.എസ്.എസ് മേധാവി എം.എസ്. ഗോൾവാൾക്കറെക്കുറിച്ച് തെറ്റായ കാര്യങ്ങൾ പ്രചരിപ്പിച്ചു എന്നാരോപിച്ച് അദ്ദേഹത്തിനെതിരെ കേസുകൾ നിലവിലുണ്ട്.

ദിഗ്‌വിജയ് സിംഗിന്റെ പുതിയ നീക്കം കോൺഗ്രസിനുള്ളിൽ തന്നെ വലിയ ചർച്ചകൾക്ക് കാരണമായിട്ടുണ്ട്. ശശി തരൂർ അടക്കമുള്ള നേതാക്കൾ പാർട്ടിയെ ശക്തിപ്പെടുത്തണം എന്ന അദ്ദേഹത്തിന്റെ ആവശ്യത്തെ പിന്തുണയ്ക്കുമ്പോഴും, സംഘ്പരിവാർ സംഘടനകളെ പുകഴ്ത്തിയത് അണികൾക്കിടയിൽ ആശയക്കുഴപ്പമുണ്ടാക്കിയിട്ടുണ്ട്.