ബാബറി മസ്ജിദ് തകർത്ത ദിവസം ആഘോഷമാക്കാനുള്ള നീക്കത്തിൽ നിന്നും പിന്മാറി രാജസ്ഥാൻ സർക്കാർ

ജയ്പൂർ: ബാബറി മസ്ജിദ് തകർത്ത ദിവസമായ ഡിസംബർ 6 സ്കൂളുകളിൽ 'ശൗര്യ ദിവസ്' ആയി ആചരിക്കണമെന്ന ഉത്തരവ് രാജസ്ഥാൻ സർക്കാർ പിൻവലിച്ചു. ഉത്തരവ...

ജയ്പൂർ: ബാബറി മസ്ജിദ് തകർത്ത ദിവസമായ ഡിസംബർ 6 സ്കൂളുകളിൽ 'ശൗര്യ ദിവസ്' ആയി ആചരിക്കണമെന്ന ഉത്തരവ് രാജസ്ഥാൻ സർക്കാർ പിൻവലിച്ചു. ഉത്തരവ് പുറത്തിറങ്ങി 12 മണിക്കൂറിനുള്ളിലാണ് വിദ്യാഭ്യാസ മന്ത്രി മദൻ ദിലാവർ ഉത്തരവ് പിൻവലിക്കാൻ നിർദ്ദേശം നൽകിയത്.

സംസ്ഥാനത്തെ സ്കൂളുകളിൽ പരീക്ഷ നടക്കുന്നതിനാലാണ് ഉത്തരവ് പിൻവലിക്കുന്നതെന്ന് വിദ്യാഭ്യാസ മന്ത്രി പ്രസ്താവനയിൽ അറിയിച്ചു. ഡിസംബർ 5, 6 തീയതികളിൽ പരീക്ഷകൾ ഉള്ളതിനാൽ ഈ ദിവസങ്ങളിൽ സ്കൂളുകളിൽ മറ്റു ആഘോഷങ്ങൾ നടത്താൻ സാധിക്കില്ലെന്നും അതിനാൽ 'ശൗര്യ ദിവസ്' ആഘോഷങ്ങൾ മാറ്റിവെക്കുകയാണെന്നും മന്ത്രി അറിയിച്ചു.

നേരത്തെ, ഡിസംബർ 6-ന് സ്കൂളുകളിൽ പ്രത്യേക പരിപാടികൾ സംഘടിപ്പിക്കാൻ സെക്കൻഡറി വിദ്യാഭ്യാസ ഡയറക്ടർ നിർദ്ദേശം നൽകിയിരുന്നു. രാമക്ഷേത്രവുമായി ബന്ധപ്പെട്ട് ഉപന്യാസ മത്സരങ്ങൾ, ചിത്രരചന, ദേശഭക്തി ഗാന മത്സരം തുടങ്ങിയവ സംഘടിപ്പിക്കാനായിരുന്നു നിർദേശം. കൂടാതെ, രാമജന്മഭൂമി പ്രസ്ഥാനവുമായി ബന്ധപ്പെട്ട പ്രദർശനങ്ങൾ സംഘടിപ്പിക്കാനും നിർദ്ദേശമുണ്ടായിരുന്നു.

Key Words : Rajasthan Government, Babri Masjid Demolition Anniversary