Maharashtra Governor C.P. Radhakrishnan is the next Vice President of India. NDA candidate Radhakrishnan secured victory by securing 452 first votes
അഭിനന്ദ്
ന്യൂഡല്ഹി: മഹാരാഷ്ട്ര ഗവര്ണറായിരുന്ന സി.പി. രാധാകൃഷ്ണന് ഇന്ത്യയുടെ അടുത്ത ഉപരാഷ്ട്രപതി. ഇന്ന് നടന്ന തിരഞ്ഞെടുപ്പില് 452 ഒന്നാം മുന്ഗണനാ വോട്ടുകള് നേടി എന്ഡിഎ സ്ഥാനാര്ത്ഥിയായ രാധാകൃഷ്ണന് വിജയം ഉറപ്പിക്കുകയായിരുന്നു.
പ്രതിപക്ഷ സ്ഥാനാര്ത്ഥിയും സുപ്രീം കോടതി റിട്ടയേര്ഡ് ജഡ്ജിയുമായ ബി. സുദര്ശന് റെഡ്ഡിക്ക് 300 വോട്ടുകളാണ് ലഭിച്ചത്.
ആകെ 754 വോട്ടുകളാണ് രേഖപ്പെടുത്തിയത്. ഇതില് 15 വോട്ടുകള് അസാധുവായിരുന്നു. സാധുവായ വോട്ടുകളില് 452 വോട്ടുകള് രാധാകൃഷ്ണനും 300 വോട്ടുകള് ജസ്റ്റിസ് റെഡ്ഡിക്കും ലഭിച്ചതായി തിരഞ്ഞെടുപ്പ് ഓഫീസര് പി.വി. മോഡി അറിയിച്ചു.
150 വോട്ടിന്റെ ഭൂരിപക്ഷം ഉപരാഷ്ട്രപതി തിരഞ്ഞെടുപ്പുകളിലെ ഏറ്റവും കുറഞ്ഞ ഭൂരിപക്ഷങ്ങളിലൊന്നാണ്. 2022-ല്, ജഗ്ദീപ് ധന്കര് പ്രതിപക്ഷ സ്ഥാനാര്ത്ഥി മാര്ഗരറ്റ് ആല്വയെ 528 വോട്ടുകള്ക്ക് പരാജയപ്പെടുത്തിയിരുന്നു. ആല്വയ്ക്ക് 182 വോട്ടുകളാണ് ലഭിച്ചിരുന്നത്.
വോട്ടിംഗ് കണക്കുകള് പ്രകാരം പ്രതിപക്ഷ എംപിമാര്ക്കിടയില് ക്രോസ് വോട്ടിംഗ് നടന്നതായി വ്യക്തമാണ്. കുറഞ്ഞത് 15 എംപിമാരെങ്കിലും എന്ഡിഎ സ്ഥാനാര്ത്ഥിക്ക് വോട്ട് ചെയ്തതായി കണക്കാക്കുന്നു.
315 പ്രതിപക്ഷ എംപിമാരും ഒരുമിച്ച് നിന്നുവെന്ന് കോണ്ഗ്രസ് അവകാശപ്പെടുമ്പോഴും, തിരഞ്ഞെടുപ്പുകള്ക്ക് മുന്നോടിയായി പ്രതിപക്ഷ നിരയിലെ ആഴത്തിലുള്ള ഭിന്നതയുടെ മറ്റൊരു ഉദാഹരണമാണിതെന്നാണ് എന്ഡിഎയുടെ വാദം.
എന്ഡിഎയ്ക്ക് 427 വോട്ടുകളും, എന്ഡിഎയെ പിന്തുണയ്ക്കുന്ന വൈഎസ്ആര് കോണ്ഗ്രസിന് 11 എംപിമാരുമാണ് ഉണ്ടായിരുന്നത്. അതിനാല് എന്ഡിഎയുടെ വോട്ടുകള് 438-ല് നില്ക്കേണ്ടതായിരുന്നു. എന്നാല് രാധാകൃഷ്ണന് 452 വോട്ടുകള് ലഭിച്ചു. 14 വോട്ടുകള് അധികം ലഭിച്ചു.
15 വോട്ടുകള് അസാധുവാക്കിയതും പ്രതിപക്ഷ വോട്ടുകളെക്കുറിച്ച് ചോദ്യങ്ങള് ഉയര്ത്തുന്നുണ്ട്. കോണ്ഗ്രസ് 315 വോട്ടുകള് ഉണ്ടെന്ന് അവകാശപ്പെടുമ്പോഴും പ്രതിപക്ഷ സ്ഥാനാര്ത്ഥി റെഡ്ഡിക്ക് 300 വോട്ടുകള് മാത്രമാണ് ലഭിച്ചത്.
'നിങ്ങളുടെ കൂട്ടത്തില് നിന്ന് മാറി ഞങ്ങള്ക്ക് വോട്ട് ചെയ്ത ആ 15 പേര് ആരാണ്?'. 'പൊതുജനങ്ങളെപ്പോലെ നേതാക്കളും നിങ്ങളെ വിട്ടോടിയിരിക്കുന്നു... രാഹുല് ഗാന്ധി ജി, ഉപരാഷ്ട്രപതി തിരഞ്ഞെടുപ്പ് നടന്നത് ഇലക്ട്രോണിക് വോട്ടിലല്ല, ബാലറ്റ് പേപ്പറിലാണ്,' ബിജെപി നേതാവ് നിഷികാന്ത് ദുബെ എക്സിലെ പോസ്റ്റില് പറഞ്ഞു.
ക്രോസ് വോട്ടിംഗ് പാര്ട്ടിക്ക് അകത്ത് അന്വേഷണത്തിന് വിധേയമാക്കേണ്ട കാര്യമാണെങ്കിലും, ഈ സാധ്യത ബിജെപി മുന്കൂട്ടി കണ്ടിരുന്നു. അതുകൊണ്ടാണ് തമിഴ്നാട്ടില് നിന്നുള്ള നേതാവിനെ സ്ഥാനാര്ത്ഥിയായി തിരഞ്ഞെടുത്തത്.
ബിജെപിയുടെ മുതിര്ന്ന നേതാവായ രാധാകൃഷ്ണന് കോയമ്പത്തൂരില് നിന്ന് രണ്ട് തവണ ലോക് ്സഭയിലേക്ക് തിരഞ്ഞെടുക്കപ്പെട്ടിട്ടുണ്ട്. 68കാരനായ അദ്ദേഹം മുമ്പ് ബിജെപിയുടെ തമിഴ്നാട് സംസ്ഥാന അധ്യക്ഷനായും സേവനമനുഷ്ഠിച്ചിട്ടുണ്ട്.
2023 ഫെബ്രുവരി മുതല് 2024 ജൂലൈ വരെ ജാര്ഖണ്ഡ് ഗവര്ണറായിരുന്നു. കൂടാതെ തെലങ്കാന ഗവര്ണറുടെയും പുതുച്ചേരി ലെഫ്റ്റനന്റ് ഗവര്ണറുടെയും അധിക ചുമതലകളും അദ്ദേഹം വഹിച്ചിരുന്നു. സൗഹൃദപരമായ വ്യക്തിത്വത്തിന് ഉടമയായ ഇദ്ദേഹത്തിന് വിവിധ രാഷ്ട്രീയ പാര്ട്ടികളിലായി ധാരാളം സുഹൃത്തുക്കളുണ്ട്. തമിഴ്നാട്ടിലെ നിയമസഭാ തിരഞ്ഞെടുപ്പിന് മുന്നോടിയായി പ്രതിപക്ഷ നിരയില് ഭിന്നത ഉണ്ടാക്കാന് അദ്ദേഹത്തിന്റെ തിരഞ്ഞെടുപ്പ് സഹായകമാകുമെന്നും ബിജെപി പ്രതീക്ഷിച്ചിരുന്നു.
ഉപരാഷ്ട്രപതിയായി തിരഞ്ഞെടുക്കപ്പെട്ട സി.പി. രാധാകൃഷ്ണനെ കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ അഭിനന്ദിച്ചു. ''പുതിയ ഉപരാഷ്ട്രപതി പാര്ലമെന്ററി പാരമ്പര്യങ്ങളെ ഉയര്ത്തിപ്പിടിക്കുമെന്നും പ്രതിപക്ഷത്തിന് തുല്യമായ ഇടവും അന്തസ്സും നല്കുമെന്നും ഭരണകൂടത്തിന്റെ സമ്മര്ദ്ദങ്ങള്ക്ക് വഴങ്ങില്ലെന്നും ഞങ്ങള് പ്രതീക്ഷിക്കുന്നു,'' അദ്ദേഹം എക്സില് കുറിച്ചു.
''ക്രമത്തില് രണ്ടാമത്തെ ഉയര്ന്ന ഭരണഘടനാ പദവിയായ ഉപരാഷ്ട്രപതി പദം സ്വതന്ത്രവും നീതിയുക്തവും ജനാധിപത്യ മൂല്യങ്ങള് സംരക്ഷിക്കുന്നതുമായിരിക്കണം,'' അദ്ദേഹം കൂട്ടിച്ചേര്ത്തു.
Summary: Maharashtra Governor C.P. Radhakrishnan is the next Vice President of India. NDA candidate Radhakrishnan secured victory by securing 452 first preference votes in today's election.
COMMENTS